◼ ညောင်ဦးရှိ Denko ဆီဆိုင်ဓားပြတိုက်သူများထဲမှနှစ်ဦးကို အသေပစ်ခတ်ဖမ်းဆီးမိဟုဆို
မန္တလေးတိုင်း၊ ညောင်ဦးမြို့နယ်ရှိ Denko ဆီဆိုင်ဓားပြတိုက်ခံရမှုတွင် ကျူးလွန်သူများထဲမှနှစ်ဦးကို အသေပစ်ခတ်ဖမ်းဆီးရမိခဲ့ကြောင်း နစက ကယနေ့(ဇူလိုင် ၃၀ ရက်)တွင် ထုတ်ပြန်သည်။
ယခုလဇူလိုင် ၂၈ ရက်၊ ညနေ ၅ နာရီခန့်တွင် ညောင်ဦးမြို့နယ်၊ တောင်ဘကျေးရွာအနီးညောင်ဦး-ကျောက်ပန်းတောင်းကားလမ်းဘေးရှိ DENKO စက်သုံးဆီဆိုင်သို့ အမည်မသိအမျိုးသားခြောက်ဦး (စိစစ်ဆဲ)မှ ဆိုင်ကယ်သုံးစီးဖြင့်ရောက်ရှိလာပြီး ဆီဆိုင်ဝန်ထမ်းများထံမှ လက်ကိုင်ဖုန်းလေးလုံး၊ ရွှေနားကပ်နှစ်ရံ၊ ဆိုင်ကယ်နှစ်စီး၊ ဆီရောင်းချရငွေငါးသိန်းကျပ်ကို ယူဆောင်သွားခဲ့ကြောင်းသိရသည်။
ထို့နောက် ဆီဆိုင်မန်နေဂျာဖြစ်သူ အသက်(၄၀)အရွယ်ရှိ ဦးဝင်းမြင့်ထွန်း(ခ)ဦးညီညီထွန်းနှင့် ဒုမန်နေဂျာဖြစ်သူ အသက်(၄၂)နှစ်အရွယ်ရှိ ဦးဆန်းလွင်ဦးတို့နှစ်ဦးအား ဆီဖြည့်ရန်ရောက်ရှိနေသည့် အသက် (၃၈)နှစ်အရွယ်ရှိ ဦးစန်းယု၏ HONDA Fit အမျိုးအစား (အဖြူရောင်) မော်တော်ယာဉ်ဖြင့် ဖမ်းဆီးခေါ်ဆောင်ခဲ့ကြောင်း ထုတ်ပြန်ထားသည်။
လုံခြုံရေးတပ်ဖွဲ့ဝင်များက နယ်မြေရှင်းရေးလုပ်ငန်းများဆောင်ရွက်စဉ် စက်သုံးဆီဆိုင်၏ အနောက် တောင်ဘက်ငါးမိုင်ခန့်အကွာ ကန်ပေါက်(အရှေ့) ကျေးရွာနှင့် ကျောက်ကန်ကျေးရွာကြားအရောက် တွင် ကျူးလွန်သူဟုယူဆရသူများအနက် လေးဦး(စိစစ်ဆဲ)မှ လက်နက်ငယ်များဖြင့် ပစ်ခတ်တိုက်ခိုက် ခဲ့၍ အပြန်အလှန်ပစ်ခတ်မှုများဖြစ်ပွားခဲ့ကြောင်း၊ ၎င်းတို့အနက်နှစ်ဦးအား MA-13 သေနတ်တစ်လက်၊ ကျည် ၁၀ တောင့်နှင့် ကျည်အိမ်တစ်ခု၊ MA- 1 သေနတ်တစ်လက်၊ ကျည် ၁၀ တောင့်နှင့် ကျည်အိမ် တစ်ခုတို့နှင့်အတူ အသေပစ်ခတ်ဖမ်းဆီးရမိခဲ့ပြီး ကျန်နှစ်ဦးမှာလွတ်မြောက်သွားခဲ့ကြောင်း ထုတ်ပြန်ချက်အရ သိရသည်။
ဆီဆိုင်ဝန်ထမ်းနှစ်ဦးအား ဖမ်းဆီးခေါ်ဆောင်သွားသူများကို ညောင်ဦးမြို့မရဲစခန်း၌ (ပ)၆၂/၂၀၂၅၊ အကြမ်းဖက်မှုတိုက်ဖျက်ရေး ဥပဒေပုဒ်မ ၅၀(ခ) ဖြင့် အမှုဖွင့်လှစ်ထားပြီး ၎င်းတို့နှစ်ဦးအား ကယ်တင်နိုင်ရန်နှင့်ပါရှိသွားသည့်ပစ္စည်းများအား ပြန်လည်သိမ်းဆည်းရရှိရေးအတွက် ဆက်လက် ဆောင်ရွက်လျက်ရှိကြောင်း နစက ကထုတ်ပြန်ထားသည်။
သတင်း - အင်ကြင်း
#ပြည်တွင်းသတင်း