◼ ရေကြီးနေသဖြင့် ထိုင်း-မြန်မာနယ်စပ် ချစ်ကြည်ရေး အမှတ်(၁)တံတား သွားလာ၍မရဖြစ်
ကရင်ပြည်နယ်၊ ထိုင်း-မြန်မာနယ်စပ် ချစ်ကြည်ရေးအမှတ်(၁) တံတားမှာ ပိတ်ထားခြင်းမရှိသော်လည်း မြဝတီမြို့ပေါ်တွင် ရေကြီးရေလျှံနေခြင်းကြောင့် သွားလာကူးလူး၍မရဖြစ်နေကြောင်း မြဝတီမြို့ရှိ ဒေသခံများထံမှ သိရသည်။
"မြဝတီ-မဲဆောက်တံတားကမပိတ်ပါဘူး။ ရေကြီးနေလို့သွားမရလို့ မသွားကြတာ။ လူကတော့သွားလို့ရတယ်။ မြန်မာဘက်ခြမ်းမှာတံတားထိပ်ထိ လှေလေးတွေ ဘောလေးတွေနဲ့ပို့ဆောင်ပေးနေတယ်။ ပြီးတော့တံတားပေါ်မှာလည်း ဒေသခံတွေကသူတို့ရဲ့ကားတွေကို ရေဘေးလွတ်အောင်ဆိုပြီး တံတားပေါ်သွားထားကြတော့ တံတားပေါ်မှာကားပိတ်သလိုမျိုးဖြစ်နေတယ်။ အမှန်တော့ တံတားပေါ် မှာရှိနေတဲ့ကားတွေက အကုန်ရပ်ထားတာ။ ရေပြန်ကျတာနဲ့ပိုင်ရှင်တွေကလာပြန်ယူကြတာပါ" ဟု မြဝတီမြို့ရှိဒေသခံတစ်ဦးကပြောသည်။
လက်ရှိတွင်သောင်ရင်းမြစ်ရေမြင့်တက်နေခြင်းကြောင့် မြဝတီမြို့ရှိအနိမ့်ပိုင်ရပ်ကွက်များဖြစ်သည့် အမှတ် (၁)၊ (၂)၊ (၃)၊ (၄)၊ (၅) တို့တွင် ယနေ့(ဇူလိုင် ၃၀ ရက်) နံနက်ပိုင်မှစတင်ကာ ရေဝင်ရောက် မှုများရှိပြီး အမြင့်ပိုင်းဖြစ်သည့်မြဝတီမြို့လယ်၊ ချစ်ကြည်ရေးတံတားအရှေ့၊ ရွှေမြင်းဝန်စေတီရှေ့ စသည့်နေရာများမှာလည်း ရေနစ်မြုပ်လျက်ရှိကြောင်းသိရသည်။
အလာတူမြဝတီ - မဲဆောက်သယ်ယူပို့ဆောင်ရေးလုပ်ငန်းရှင်တစ်ဦးကလည်း “လူကတော့ရတယ် ခင်ဗျ။ မြန်မာဘက်ခြမ်းမှာ လှေလေးတွေဘောလေးတွေနဲ့ပို့ဆောင်ပေးပါတယ်။ ညွှန်ကြားချက်အရ လို့သိရပါတယ်။ ရေကအခုတော့ကျစပြုလာပါပြီ။ ရေကျလို့ကားသွားရရင်တော့ တံတားပြန်ဖွင့်မှာပါ။ ထိုင်းဘက်ကတံတားအောက်ပိတ်ပါတယ်" ဟု ပြောသည်။
မြဝတီမြို့တွင်ယနေ့မွန်လွဲ ၁ နာရီခွဲခန့်မှစတင်ပြီးရေများပြန်လည်းကျဆင်းလျက်ရှိကြောင်းနှင့် အနိမ့်ပိုင်းရပ်ကွက်မှရေဘေးသင့်ဒေသခံများမှာ ယာယီကယ်ဆယ်ရေးစခန်းများတွင် နေထိုင်လျက်ရှိကြောင်းသိရသည်။
သတင်း - ပိုင်လေး
ဓာတ်ပုံ - ဘီဝမ်း
#ပြည်တွင်းသတင်း
