တောင်ငူရေကြီးမှု ဒိုးသောင်တံတား ကျွံကျ၊ ဘီးလင်းမှာလည်း ရေဝင်ရောက်မှု ဆိုးရွားစွာ ဖြစ်ပေါ်နေ
ဇူလိုင် ၃၀ - ၂၀၂၅
ရေကြီးရေလျှံမှုကြောင့် ပဲခူးတိုင်း တောင်ငူမြို့နယ်နဲ့ ထန်းတပင်မြို့နယ်ကြား ဆက်သွယ်ထားတဲ့ မြတ်စောညီနောင် ဒိုးသောင်တံတား ကျွံကျသွားသလို မွန်ပြည်နယ် ဘီးလင်းမြို့မှာလည်း ရေဝင်ရောက်မှု ဆိုးရွားစွာ ဖြစ်ပေါ်နေတယ်လို့ ကူညီကယ်ဆယ်ရေး လုပ်ဆောင်ပေးနေသူတွေက ပြောပါတယ်။
မနေ့ ဇူလိုင် ၂၉ ရက်၊ မနက်အစောပိုင်းက ဒိုးသောင်တံတား ကျွံကျမှု ဖြစ်ပွားခဲ့တာဖြစ်ပြီး ကားလမ်းတွေလည်း ပျက်စီးသွားတယ်လို့ သိရပါတယ်။
“ဒီတံတားက တောင်ငူမြို့ကနေ ဇရပ်ကြီးကိုသွားတဲ့ လမ်းပေါ်မှာ ရှိတာ။ ရေကြီးတော့ တံတားက ဘေးနှစ်ဖက်ကနေ နိမ့်ဝင်သွားတဲ့ သဘောပေါ့။ လက်ရှိ အခြေအနေအရတော့ သွားလာလို့ လုံးဝ မရတော့ဘူး။ လမ်းပန်း ဆက်သွယ်ရေးကတော့ ခက်ခဲသွားတာပေါ့။ လတ်တလော သွားရေးလာရေးအတွက် ဆိုရင်တော့ ထန်းတပင် - စစ်တောင်းဘက်ကနေ ပတ်ထွက်မှ အဆင်ပြေမယ်” လို့ ကူညီကယ်ဆယ်ရေး လုပ်ဆောင်ပေးနေသူက ပြောပါတယ်။
တောင်ငူမြို့မှာ ပြီးခဲ့တဲ့ ဇူလိုင် ဒုတိယပတ်မှ စတင်ကာ ရေကြီးရေလျှံမှု ဖြစ်ပေါ်နေခြင်းဖြစ်ပြီး မိုးသည်းထန်စွာ ရွာသွန်းမှုကြောင့် သောက်ရေခပ်ချောင်းနဲ့ ခပေါင်းချောင်းရေတွေ စစ်တောင်းမြစ်ထဲ စီးဝင်လာတဲ့အတွက် ရေဝင်ရောက်မှု ပိုမို ဆိုးရွားခဲ့ကာ ရေဘေးသင့်ပြည်သူ သောင်းနဲ့ချီ ရှိနေတာဖြစ်တယ်လို့ သိရပါတယ်။
လက်ရှိမှာ ရေဘေးသင့်ပြည်သူတွေအတွက် တောင်ငူမြို့က TTC ကျောင်းဟောင်း၊ ဘုန်းကြီးကျောင်း၊ ဘုရားဝင်းအတွင်းနဲ့ ဓမ္မာရုံတွေ အပါအဝင် ရေလွတ်ရာ နေရာတွေမှာ ကယ်ဆယ်ရေးစခန်း ၂၀ ကျော် ဖွင့်လှစ်ပေးထားပြီး ပရဟိတ အသင်းအဖွဲ့တွေက ကူညီ ရွှေ့ပြောင်းပေးလျက် ရှိတယ်လို့ သူက ပြောပါတယ်။
“လက်ရှိကတော့ ရေဘေး ဒုက္ခသည်တွေအတွက် သောက်သုံးရေနဲ့ စားစရာတွေ၊ ပြီးတော့ ဖျားနာနေတဲ့ သူတွေလည်း ရှိနေတဲ့အတွက် ဆေးဝါးတွေလည်း လိုအပ်နေပါတယ်။ ရွှေဟင်္သာဘုရားက ရေဘေးရှောင်တွေဆို ရေတောင် သောက်စရာမရှိ ဖြစ်နေတယ်။ အဲဒီမှာ ရေဘေးရှောင်ဦးရေ ၃၀၀ ဝန်းကျင်လောက် ရှိတယ်” လို့ သူက ပြောပါတယ်။
လတ်တလော ရေကြီးမှု အခြေအနေကတော့ တောင်ငူမှာ ရေတန့်နေပြီ ဖြစ်တယ်လို့ သိရပြီး သောက်ရေခပ်ဆည်မှာလည်း ရေ ၃ ပေလောက် လျော့ကျသွားပြီ ဖြစ်တဲ့အတွက် ပြီးခဲ့တဲ့ ဇူလိုင် ၂၈ ရက်နေ့က ရေတံခါး နှစ်ချပ် ပိတ်ထားလိုက်ပြီ ဖြစ်တယ်လို့ သိရပါတယ်။
မိုးလေဝသနှင့် ဇလဗေဒညွှန်ကြားမှု ဦးစီးဌာနရဲ့ မနေ့ ဇူလိုင် ၂၉ ရက်၊ မနက် ၇ နာရီခွဲအချိန် ထုတ်ပြန်ချက်အရ စစ်တောင်းမြစ်ရေဟာ တောင်ငူမြို့မှာ အဆိုပါမြို့ရဲ့ စိုးရိမ်ရေမှတ်အထက် ၂ ပေခန့် ကျော်လွန်နေပြီး နောက်တရက်အတွင်း ပေဝက်ခန့် မြင့်တက်လာနိုင်ကာ မြို့ရဲ့ စိုးရိမ်ရေမှတ်အထက် ဆက်လက် တည်ရှိနိုင်တယ်လို့ သိရပါတယ်။
ဒါအပြင် မွန်ပြည်နယ်၊ ဘီးလင်းမြို့မှာလည်း မိုးသည်းထန်စွာရွာသွန်းပြီး ဘီးလင်းမြစ်ရေ မြင့်တက်လာတာကြောင့် မနေ့ ဇူလိုင် ၂၉ ရက်၊ မနက်ပိုင်းမှစတင်ကာ ကန်သာယာရပ်ကွက်၊ ဘိုးလှကြီးရပ်ကွက် အပါအဝင် မြစ်ကမ်းနံဘေးက ကျေးရွာ၊ ရပ်ကွက်ပေါင်း ၄၀ ထက်မနည်း ရေနစ်မြုပ်နေတယ်လို့ သိရပါတယ်။
“အောက်ပိုင်းက ရပ်ကွက်တွေဆို အိမ်ခေါင်အထိ မြုပ်နေပြီ။ ကယ်ဆယ်ရေးစခန်း ရောက်နေကြပြီ။ အခက်အခဲ ဘာရှိလဲဆိုရင် ရေဘေးသင့် ပြည်သူတွေက လက်လုပ်လက်စား အများစု ဖြစ်တဲ့အတွက် စားစရာနဲ့ သောက်ရေပဲ အရေးပေါ် လိုနေပါတယ်” လို့ ဒေသခံတယောက်က ပြောပါတယ်။
ရေကြီးမှုကြောင့် လက်ရှိမှာ ရေဘေးသင့်ပြည်သူ သုံးသောင်းဝန်းကျင်အထိ ရှိလာနေပြီဖြစ်ပြီး ဘီးလင်းမြို့က လေသာပရိယတ္တိ စာသင်တိုက်၊ စာသင်ကျောင်း၊ အားကစားရုံ၊ မြို့တော်ခန်းမနဲ့ ရေလွတ်ရာနေရာတွေမှာ ယာယီကယ်ဆယ်ရေးစခန်း ၃၂ ခု ဖွင့်လှစ်ထားရတယ်လို့ သိရပါတယ်။
ဒါအပြင် မနေ့ ဇူလိုင် ၂၉ ရက်၊ မနက် ၈ နာရီ ၂၅ မိနစ်ဝန်းကျင်မှ စတင်ကာ အဆိုပါ မြို့အတွင်းက တောင်ကလေးကျေးရွာနဲ့ အဝန်းကြီးကျေးရွာကြား၊ ရန်ကုန် - မော်လမြိုင် ကားလမ်းမပေါ်နဲ့ ရွှေလှေစံပြကျေးရွာ အဝင်လမ်းတို့မှာ လမ်းရေကျော်မှုတွေလည်း ဖြစ်ပေါ်နေတယ်လို့ သိရပါတယ်။
“ရန်ကုန် - မော်လမြိုင်ကားလမ်း ရေကျော်မှုအခြေအနေက မစောတံတားအဆင်းနဲ့ ဒေါင်းရပ်ရွာရှေ့ ရေကျော်မှု နှစ်ခုပါ။ ရေကျော်နေပေမယ့် ကားသေး၊ ကားကြီး ဖြတ်သန်းသွားလာလို့ ရပါသေးတယ်။ လမ်းပေါ်မှာ ကားတွေ ပိတ်နေပေမယ့် ဖြည်းဖြည်းချင်းတော့ သွားလို့ရနေတယ်” လို့ ဘိုဘိုဝင်း Rescue အရေးပေါ် ကယ်ဆယ်ရေးအဖွဲ့မှ တာဝန်ရှိသူ တယောက်က ပြောပါတယ်။
ရေကျော်နေတဲ့ ရန်ကုန် - မော်လမြိုင် ကားလမ်းမှာ အမျိုးသမီးတယောက် မောင်းနှင်လာတဲ့ ဆိုင်ကယ်တစီး မနေ့ ဇူလိုင် ၂၉ ရက်၊ မွန်းလွဲပိုင်းက ရေစီးနဲ့ မျောပါမှု ဖြစ်ပွားခဲ့တယ်လို့ သိရပြီး တွဲကား မောင်းနှင်သူတွေက ကူညီ ကယ်ဆယ်ပေးခဲ့တဲ့အတွက် ဆိုင်ကယ်မောင်းသူရော၊ ဆိုင်ကယ်ပါ ဘေးကင်းခဲ့တယ်လို့ သိရပါတယ်။
လက်ရှိ ဘီးလင်းမြို့ရဲ့ မြစ်ရေ ခန့်မှန်းချက်နဲ့ ပတ်သက်လို့ မိုး/ဇလ ဌာနရဲ့ မနေ့ ဇူလိုင် ၂၈ ရက်၊ မနက် ၇ နာရီခွဲအချိန် ထုတ်ပြန်ချက်အရ ဘီးလင်းမြစ်ရေဟာ အဆိုပါမြို့မှာ မြို့ရဲ့ စိုးရိမ်ရေမှတ်အထက် ၁ ပေခွဲကျော် ကျော်လွန် ရောက်ရှိနေပြီး နောက်တရက်အတွင်း ပေဝက်ခန့် မြင့်တက်လာနိုင်ကာ မြို့ရဲ့ စိုးရိမ်ရေမှတ်အထက် ဆက်လက် တည်ရှိနိုင်တယ်လို့ သိရပါတယ်။
ဓာတ်ပုံ - ဒေသခံ
