◼ ပေကျင်းတွင် ရက်ပိုင်းအတွင်း တစ်နှစ်စာ မိုးရွာသွန်းကြောင့် လူ ၃၀ ဦး သေဆုံး
တရုတ်နိုင်ငံမြို့တော် ပေကျင်းတွင် ရက်ပိုင်းအတွင်းမှာပင် တစ်နှစ်နီးပါးစာ ရှိသော မိုးများ ရွာသွန်းခဲ့သဖြင့် တနင်္လာနေ့ ညသန်း‌ခေါင်အထိ လူပေါင်း ၃၀ သေဆုံးခဲ့ကြောင်း အစိုးရ ဆင်ဟွာသတင်းဌာနက ယနေ့ ဖော်ပြသည်။
ပေကျင်းမြို့၏ တောင်ကုန်းထူထပ်သော မြောက်ပိုင်းခရိုင်များတွင် သေဆုံးမှု သတင်းများ ကြားရကြောင်းနှင့် မီယန်းခရိုင်တွင် ၂၈ ဦး ၊ ယန်ကင်းခရိုင်တွင် ၂ ဦး သေဆုံးခဲ့ကြောင်း သိရသော်လည်း မည်သည့်အချိန်တွင် မည်သို့ သေဆုံးခဲ့သည်ဟူသော အချက်များ သတင်း၌ ပါဝင်ခြင်းမရှိ‌‌ပေ။
ပြီးခဲ့သည့် ဗုဒ္ဒဟူးနေ့မှစ၍ မိုးသည်းထန်စွာ ရွာသွန်းမှုစတင်ခဲ့ပြီး တနင်္လာနေ့တွင် ပေကျင်းနှင့် အနီးတစ်ဝိုက်ခရိုင်ဒေသကြီးများ၌ မိုးသည်းထန်မှု ပိုဆိုးလာခဲ့သည်။
ပေကျင်းနှင့်မြောက်ပိုင်းခရိုင်များတွင် မိုးရေချိန် ၅၄၄ မီလီမီတာ ခန့် ရွာသွားခဲ့ရာ ယခင်နှစ်များက ရွာသွန်းခဲ့သည့် တစ်နှစ်ပျှမ်းမျှ ၆၀၀ မီလီမီတာ နီးပါးပင်ဖြစ်ကြောင်း ဆင်ဟွာသတင်းအရ သိရသည်။
မိုးသည်းထန်နေချိန်တွင် အာဏာပိုင်များက ပေကျင်းမှ ဒေသခံ ၈၀၀၀၀ ခန့်ကို ဘေးလွတ်ရာရွှေ့ပြောင်းပေးခဲ့ရသည်။ လမ်းများနှင့် ဆက်သွယ်ရေးအခြေခံ အဆောက်အဦ များ ပျက်စီးခဲ့ရကာ ယမန်နေ့ည သန်း‌ခေါင်အထိ ကျေးရွာပေါင်း ၁၃၆ ရွာတွင် လျပ်စစ်ဓါတ်အား ပြတ်တောက်နေကြောင်း သိရသည်။
အပြင်းထန်ဆုံး မိုးရွာသွန်းမှုကို စနေနေ့က ပေကျင်းမြို့မှ ဟွာအီရူ ဒေသ ၌ ကြုံတွေ့ခဲ့ရကာ တစ်နာရီအတွင်း မိုးရေချိန် ၉၅ ဒသမ ၃ မီလီမီတာ ရွာသွန်းခဲ့သည်။
မိုးသည်းထန်မှုများကြောင့် ပေကျင်း၊ ဟီဘေး၊ ကျီလင်း နှင့် ရှန်ဒေါင်းပြည်နယ်တို့တွင် ထိခိုက်နစ်နာမှုနှင့် ပျက်စီးဆုံးရှုံးမှုများ ကြီးကျယ်ကြောင်း နှင့် ရှာဖွေ ကယ်ဆယ်ရေးလုပ်ငန်းများကို အစွမ်းကုန်လုပ်ဆောင်ကြရန် တရုတ်သမ္မတ ရှီကျင့်ဖျင် က ယမန်နေ့ နှောင်းပိုင်းတွင် ပြောကြားခဲ့သည်။
ပေကျင်းဒေသ မီယန်းခရိုင်တွင် မိုးသည်းထန်မှုနှင့် ရေကြီးမှုများကြောင့် ကြီးမားသောပျက်စီးဆုံးရှုံးမှုများ ဖြစ်ပေါ်ခဲ့ကြောင်း ဝန်ကြီးချုပ် လီချန်းကလည်း ပြောကြားခဲ့သည်ဟု ဆင်ဟွာက ဖော်ပြသည်။
ရေကြီးရေလျှံမှု အမြင့်ဆုံး သတိပေးချက်များအား ပေကျင်းက ယမန်နေ့တွင် ထုတ်ပြန်ခဲ့ကာ ဒေသခံများ နေအိမ်တွင်သာ နေထိုင်ကြရန် အကြံပေးတိုက်တွန်းခဲ့သည်။
ယနေ့နံနက်ပိုင်းအထိ တရုတ်နိုင်ငံမြောက်ပိုင်းတွင် အကြီးဆုံးဖြစ်သော မီယန်းရေလှောင်တမံ အတွင်းသို့ ရေကုဗမီတာ ၇၃၀ သန်း ‌‌ကျော်ဝင်ရောက်ခဲ့ပြီး တနင်္ဂနွေနေ့ မှ စ၍ ရေထုထည် ကုဗမီတာ သန်း ၁၂၀ ကို ပြန်လွှတ်ခဲ့သည်။
အောက်ခြေပိုင်းမှ မြစ်များတွင် ရေလယ်ဗယ် မြင့်တက်နေနိုင်ခြင်းကြောင့် ဒေသခံများ ရှောင်ရှားနေကြရန် ပေကျင်းက တိုက်တွန်းထားသည်။
ပေကျင်းနှင့်အခြားပြည်နယ်များမှ ရေဘေးကယ်ဆယ်ရေးလုပ်ငန်းများအား ကူညီပံ့ပိုးပေးရန် တရုတ်ဘဏ္ဍာ‌ရေးဝန်ကြီးဌာနက ယွမ်ငွေ သန်း ၃၅၀ ချထားပေးခဲ့ကြောင်း သိရသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း