ပင်းတယနယ် ကုန်းစောင်းရွာ၌ တောင်ကျရေနှင့် မြေပြိုမှုကြောင့် ၆ ဦး သေ၊ ၂ ဦး ပျောက်ဆုံး

ဧရာဝတီ၊ ဇူလိုင် ၂၉၊ ၂၀၂၅

ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ် သိမ်ကုန်းကျေးရွာအုပ်စု ကုန်းစောင်းရွာတွင် တောင်ပြိုကျမှု နှင့် တောင်ကျရေကြောင့် ဒေသခံ ၆ ဦး သေဆုံးပြီး ၂ ဦး ပျောက်ဆုံးနေဆဲဖြစ်သည်ဟု ရှာဖွေကူညီပေးနေသူများက ပြောသည်။

မိုးများသည်းထန်စွာရွာသွန်းမှုကြောင့် တောင်စောင်းအောက်ခြေရှိ ကုန်းစောင်းရွာတွင် ယမန်နေ့ နံနက်အစောပိုင်း တောင်ကျရေထိုးဆင်းမှုများနှင့် မြေပြိုမှုများဖြစ်ပေါ်ခဲ့ပြီး ပျောက်ဆုံး ဒေသခံ ၈ ဦးအနက် သေဆုံးအလောင်း ၆ ဦးပြန်ရှာတွေ့ကြောင်း ဒေသခံများထံက သိရသည်။

ရှာဖွေကယ်ဆယ်ရေး လုပ်နေသူဒေသခံတဦးက “၂ ဦးကပျောက်နေတုန်းပဲ။ ဒီနေ့တော့ ရေချောင်းတလျောက် ထပ်ရှာကြည့်ဦးမယ် ။ ကမ်းပါးပေါ်တင်နေရင် ရှာတွေ့နိုင်တယ်။ ဟိုး ချောင်းကြီးထဲထိ ရောက်သွားရင်တော့ ရှာလို့ မလွယ်တော့ဘူး”ဟု ပြောသည်။

သေဆုံးသူများတွင် အမျိုးသား ၃ ဦးနှင့် အမျိုးသမီး ၃ ဦးပါဝင်ပြီး ပျောက်ဆုံးနေသူများမှာ သက်ကြီးပိုင်း အမျိုးသမီးနှင့် အမျိုးသား ကလေးတဦးတို့ ဖြစ်ကြောင်းသိရသည်။

တောင်ကျရေများနှင့် မြေပြိုကျခြင်းတို့ကြောင့် ကုန်းစောင်း၊ သိမ်ကုန်း၊ ရွှေပုထိုး၊ ဖနန်၊ ညောင်ကောက်၊ သရက်ကုန်း စသောကျေးရွာများတွင် နေအိမ်များပျက်စီးခြင်းနှင့် တောင်ယာစိုက်ခင်း ဧကရာချီ ပျက်စီးခဲ့ကြောင်း ဒေသခံများက ပြောသည်။

ပင်းတယမြို့နယ်တွင် တောင်ကျရေများကြောင့် ရေကြီး၊ ရေလျှံမှုများဖြစ်ပေါ်နေရာ လမ်းတံတားတချို့ ပျက်စီးမှုများ ရှိနေသည့်အပြင် ပင်းတယမြို့၏ အထင်ကရနေရာတခုဖြစ်သောရွှေဥမင်လှိုဏ်ဂူဘုရားအနီး ရေတိုက်စားမှုကြောင့် စားသောက်ဆိုင်နှင့် အရောင်းဆိုင်တချို့ ပြိုကျပျက်စီးခဲ့သည်။

ပုံစာ-ပင်းတယ ရေကြီးမှုမြင်ကွင်း/