◼ ဂါဇာတွင် လူသားချင်းစာနာထောက်ထားမှုဆိုင်ရာ အချိန်ပိုင်းတိုက်ခိုက်မှု ရပ်တန့်ခြင်းကို အစ္စရေးကြေညာ
ဂါဇာကမ်းမြောင်ဒေသတစ်ဝန်း လူနေထူထပ်သောနေရာများတွင် ယနေ့နံနက်ပိုင်းမှ ညနေပိုင်းအထိ ကြာမြင့်မည့် လူသားချင်းစာနာထောက်ထားမှုဆိုင်ရာ အချိန်ပိုင်းတိုက်ခိုက်မှု ရပ်တန့်ခြင်းကို အစ္စရေးစစ်ဘက်က အကောင်အထည် ဖော်သွားမည်ဖြစ်ကြောင်း အစ္စရေးအရာရှိကြီးများက ပြောကြားသည်။
ယမန်နေ့ညတွင် အစ္စရေးလေတပ်က ဂါဇာဒေသထဲသို့ စားနပ်ရိက္ခာများ ချပေးခဲ့ ကြောင်း သိရသည်။ ယင်းသို့ လေကြောင်းမှ စားနပ်ရိက္ခာများ ချပေးခြင်းကို ရှေ့လာမည့်ရက်များတွင်လည်း ပြုလုပ်သွားမည်ဖြစ်ကြောင်း နှင့် ဂျော်ဒန်နှင့် ယူအေအီးတို့ကလည်း အလားတူလုပ်ဆောင်သွားမည်ဖြစ်ကြောင်း အစ္စရေးစစ်ဘက်က ပြောသည်။
ဂါဇာမှ လူသားချင်းစာနာထောက်ထားမှုအကျပ်အတည်း ပြင်းထန်လာခြင်းအပေါ် နိုင်ငံတကာမှ ဝေဖန်မှုများ မြင့်တက်လာခဲ့ပြီးနောက်တွင် အစ္စရေးဝန်ကြီးချုပ် ဘင်ဂျမင်နေတန်ယာဟု က ကျယ်ပြန့်သော တုံ့ပြန်မှု အစီအစဉ်များကို ယမန်နေ့က အတည်ပြုပေးခဲ့ခြင်းဖြစ်သည်။
မတ်လတွင် စစ်ပွဲကို တစ်ဖက်သတ်ပြန်လည်စတင်ပြီး လူသားချင်း စာနာထောက်ထားမှု အကူအညီများကို ရပ်တန့်လိုက်ပြီးနောက် အစ္စရေးက ဂါဇာတွင် ယခုအခါ စစ်ရေးလှုပ်ရှားမှုများကို ပထမဆုံးအကြိမ်အဖြစ် အချိန်ပိုင်းရပ်တန့်ပေးလိုက်ခြင်းဖြစ်သည်။
ဂါဇာတောင်ပိုင်း နှင့် မြောက်ပိုင်းရှိ လူနေထူထပ်သောစင်တာများ၌ စာနာထောက်ထားမှု အပစ်ရပ်ခြင်း လုပ်ဆောင်သွားမည်ဖြစ်ကြောင်း အစ္စရေးအရာရှိများက ပြောကြားကြသည်။
ထိုသို့ ရပ်တန့်ထားချိန်အတွင်း ကုလသမဂ္ဂနှင့် အခြားအကူအညီပေးရေး အဖွဲ့အစည်းများ လူနေထူထပ်သောနေရာများသို့ ဘေးကင်းစွာ သွားရောက်နိုင်အောင် အစ္စရေးစစ်ဘက် က ခွင့်ပြုမည်ဖြစ်ကြောင်း သိရသည်။
ထိုကဲ့သို့ တိုက်ခိုက်မှု ရပ်တန့်ခြင်းများအား အခါအားလျော်စွာ ခွင့်ပြုပေးသွားမည်ဟုလည်း အစ္စရေးအရာရှိများက ပြောကြားကြသည်။
စားနပ်ရိက္ခာနှင့် ဆေးဝါးများပေးပို့မည့် ကုလယာဉ်တန်းများနှင့် အခြားအဖွဲ့အစည်းများ ဘေးကင်းစွာ သွားလာနိုင်ရန် လူသားချင်းစာနာထောက်ထားမှု လမ်းကြောင်းများ ဖွင့်လှစ်ပေးသွားမည်ဖြစ်ကြောင်း သို့ရာတွင် အခြားနေရာများ၌ အကြမ်းဖက်တိုက်ဖျက်ရေး စစ်ဆင်ရေးများဆက်လုပ်သွားမည်ဖြစ်ကြောင်း အစ္စရေးစစ်ဘက် က ထုတ်ပြန်ချက်တစ်ရပ်တွင် ပြောကြားသည်။
ဂါဇာတောင်ပိုင်းရှိ ပင်လယ်ရေအား သောက်သုံးရေအဖြစ် ပြောင်းလဲသည့် စက်ရုံသို့လည်း လျပ်စစ်ဓာတ်အား ပြန်လည်ချိတ်ဆက်ပေးသွားမည်ဖြစ်ကြောင်း စစ်ဘက် က ပြောကြားသည်။
Axios
#နိုင်ငံတကာသတင်း