◼ ကျပ်ဘီလီယံ ၅၀ နီးပါးရှိ မူးယစ်ဆေးများဖမ်းမိရာမှ မူးယစ်တရားခံပြေး တစ်ဦးပါဖမ်းဆီးမိ
မလေးရှားနိုင်ငံသို့ သယ်ယူပို့ဆောင်ရန်စီစဉ်ထားသည့် ကျပ်ဘီလီယံ ၅၀ နီးပါးတန်ဖိုးရှိစိတ်ကြွရူးသွပ် ဆေးပြားများနှင့် အိုက်စ်ဆေးပြားများနှင့်ဆက်စပ်သူကိုးဦးကို ယခုလအတွင်းဖမ်းဆီးမိခဲ့ကြောင်း ရဲတပ်ဖွဲ့ကထုတ်ပြန်သည်။
အင်းစိန်မြို့နယ်၊ ကြို့ကုန်းအရှေ့ရပ်ကွက်ရှိ နေအိမ်တစ်အိမ်သို့ ယခုဇူလိုင်လ ၁၂ ရက် ညခြောက်နာရီခွဲတွင် သတင်းအရဝင်ရောက်စစ်ဆေးရာမှ ကျပ်ဘီလီယံချီတန်ကြေးရှိမူးယစ်ဆေးများနှင့်ဆက်စပ်နေသူများကို ခြောက်ရက်အတွင်းဖမ်းမိခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြထားသည်။
အဆိုပါနေအိမ်မှ ကျပ် ၄၇ ဘီလီယံနီးပါးတန်ဖိုးရှိ အိုက်စ်(မက်သ်အဖက်တမင်း) ၁၈၇၅ ကီလို၊ ကျပ် တစ်ဘီလီယံကျော်တန်ဖိုးရှိ စိတ်ကြွရူးသွပ်ဆေးပြား ၁၆ သိန်း၊ Toyota Dyna မော်တော်ယာဉ်တစ်စီး တို့နှင့်အတူ ဇော်ဇော်လွင်ဆိုသူအားဖမ်းဆီးမိခဲ့သည်ဟုသိရသည်။
ကွင်းဆက်ဖော်ထုတ်ချက်အရ အထက်ပါမူးယစ်ဆေးဝါးများအားလွှဲပြောင်းပေးခဲ့သည့် နေမျိုးကျော်ဆို သူကို ယင်းနေ့ညပိုင်းတွင် လှိုင်မြို့နယ် (၁၆)ရပ်ကွက်၊ ပါရမီလမ်း၌ ဆက်လက်ဖမ်းဆီးမိခဲ့ကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ထုတ်ပြန်ချက်အရသိရသည်။
ယင်းဆေးဝါးများကိုတာဝန်ခံသယ်ဆောင်သူဟု ရဲတပ်ဖွဲ့ကဖော်ပြထားသည့် ကြည်ဖြူ(ခ) ကျော်ဝင်းဌေးနှင့် ဇော်မင်းနိုင်တို့နှစ်ဦးကို ဝေါမြို့နယ်ညောင်ခါးရှည်ကျေးရွာအနီး၌ လည်းကောင်း၊ မူး ယစ်ဆေးများကို မလေးရှားရေပိုင်နက်သို့ပို့ဆောင်သူဟုဆိုထားသည့် စိုးလင်းပိုင်(ခ) လင်းလင်းကို ပြည်မြို့နဝဒေးတံတားတွင်လည်းကောင်း ဇူလိုင် ၁၅ ရက်တွင် ဆက်လက်ဖမ်းဆီးခဲ့သည်ဟုသိရသည်။
အလားတူ မူးယစ်ဆေးဝါးများကို ရန်ကုန်မြစ်ဝမှ မလေးရှားရေပိုင်နက်အထိ ပို့ဆောင်ရာတွင်အသုံးပြု မည့် စက်လှေပိုင်ရှင် ရဲထွန်း(ခ)ပဲ့နင်း(ခ) ဖိုးသာဂိ ဆိုသူကို ပုသိမ်ကြီးမြို့နယ်အတွင်း ဇူလိုင် ၁၆ ရက် တွင် ဖမ်းဆီးခဲ့ပြီး ၎င်းသည် မူးယစ်အမှုဖြင့် အလိုရှိနေသည့် တရားခံပြေးတစ်ဦးလည်းဖြစ်သည်ဟု ရဲတပ်ဖွဲ့က ဆိုသည်။
ထို့ပြင် မူးယစ်ဆေးဝါးများကို ရန်ကုန်မြစ်ဝသို့ တာဝန်ခံသယ်ဆောင်ပေးမည့် သိန်းသန်းဌေး(ခ) ဇော် ဇော်အောင်(ခ)ငဌေး၊ ကျော်စွာမင်း(ခ)မင်းမင်း၊ မျိုးထွန်း(ခ)ကိုထွန်းတို့ကို ဇူလိုင် ၁၇ ရက်၊ ညနေပိုင်း တွင်မင်္ဂလာဒုံမြို့နယ်၌ ဆက်လက်ဖမ်းမိခဲ့ကြောင်းသိရသည်။
လက်ရှိဖမ်းမိထားသူများအပြင် အဆိုပါ မူးယစ်ဆေးဝါးများကို ပိုင်ဆိုင်သူ၊ နေအိမ်ငှားရမ်း၍ သိမ်းဆည်းပေးထားသူနှစ်ဦး၊ မလေးရှားရေပိုင်နက်အတွင်း အဓိက သယ်ယူရောင်းဝယ်သူနှစ်ဦး အပါအဝင် ပြစ်မှုကျူးလွန်သူများကို ဆက်လက်ဖော်ထုတ်နေသည်ဟုလည်း ရဲတပ်ဖွဲ့ထုတ်ပြန်ချက် တွင်ဖော်ပြ ထားသည်။
အထက်ပါ မူးယစ်မှောင်ခိုအဖွဲ့သည် ပင်လယ်ရေကြောင်းဖြင့် ပြည်ပသို့ မူးယစ်ဆေးဝါးများသယ်‌ဆောင် ရောင်းဝယ်မှုအကြိမ်ကြိမ်ကျူးလွန်ခဲ့ကြောင်း ဖော်ထုတ်ရရှိထားသည်ဟုဆိုသည်။
ဖမ်းဆီးထားသူများ၊ ဆက်စပ်နေသူများ၏ မူးယစ်ဆေးရောင်းဝယ်ရာမှ ရရှိသောငွေကြေး၊ အကျိုး အမြတ်၊ ပိုင်ဆိုင်မှုများကိုငွေကြေးခဝါချမှုတိုက်ဖျက်ရေးဥပဒေအရ ထပ်မံအရေးယူနိုင်ရန် ဆောင်ရွက်လျက်ရှိကြောင်း ရဲတပ်ဖွဲ့ကထုတ်ပြန်ထားသည်။