ပင်စင်စားတွေကို စမတ်ကတ် UID နေ့ချင်းပြီးလုပ်ပေးမယ်
ဇူလိုင် ၂၃ ၊ ၂၀၂၅
GG (VOM)
စမတ်ကတ် UID မရှိသေးတဲ့ နိုင်ငံ့ဝန်ထမ်းအငြိမ်းစား ပင်စင်စားတွေကို ဒီနေ့ ဇူလိုင် ၂၃ ရက်မှစပြီး ပင်စင်လစာထုတ်ပေးတဲ့ကာလအတွင်း
မြန်မာစီးပွားရေးဘဏ်တွေမှာ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ မြို့နယ်ဦးစီးမှူးရုံးမှ ဝန်ထမ်းတွေကကွင်းဆင်းပြီး စမတ်ကတ် ပြုလုပ်ပေးသွားမယ်လို့ သိရပါတယ်။
နိုင်ငံ့ဝန်ထမ်းအငြိမ်းစားတွေအနေနဲ့ UID နံပါတ်ရရှိရေးအတွက် မြို့နယ်ဦးစီးမှူးရုံးကို လာရောက်လျှောက်ထားဆောင်ရွက်မှု များပြား နေတဲ့ အတွက် လုပ်ငန်းအဆင်ပြေလွယ်ကူစေရေး အထူးအစီအစဉ်တရပ်အဖြစ် စီးပွားရေးဘဏ်မှာကွင်းဆင်းလုပ်ဆောင်ပေးတာဖြစ်ကြောင်း ၊ ဆောင်ရွက်တဲ့အခါ One-Stop Service နဲ့ နေ့ချင်းပြီး အဆင်ပြေစွာ ဆောင်ရွက်ပေးသွားမှာဖြစ်တယ်လို့ ဝန်ကြီးဌာနသတင်းပြန်မှုအရသိရပါတယ်။
မြန်မာ့စီးပွားရေးဘဏ်မှာ စမတ်ကတ်ကို ကွင်းဆင်းဆောင်ရွက်ပေးမယ့်အပေါ် ပင်စင် အငြိမ်းစားဝန်ထမ်းတယောက်က " ဘဏ်မှာလာလုပ်ပေးတော့ အဆင်ပြေတာပေါ့။ပင်စင်လာထုတ်တဲ့သူအကုန်လုံးက အသက်အရွယ်ကြီးသူတွေချည်းပဲဆိုတော့ ဟိုပြေးဒီပြေးမသွားရတော့ဘူးပေါ့။မဟုတ်ရင် လဝက ကိုသွားနေရသေးတယ်။တကယ်တော့ကျွန်တော်ပင်စင်စားတွေက လိမ်ထုတ်စရာလည်းမရှိကြပါဘူး။အဆင်ပြေအောင်လုပ်ပေးစေချင်တယ်။" လို့ ပြောပါတယ်။
စမတ်ကတ်ကို မြန်မာ့စီးပွားရေးဘဏ်မှာ ကွင်းဆင်းဆောင်ရွက်ပေးသလို အသက်အရွယ်ကြီးရင့်ပြီး ကျန်းမာရေးအရ သွားလာဖို့ခက်ခဲသူတွေ၊ မသွားမလာနိုင်သူတွေကိုလည်း နေအိမ်အရောက် ကွင်းဆင်းလုပ်ဆောင်ပေးဖို့ အငြိမ်စားဝန်ထမ်းမိသားစုတွေက ဆန္ဒရှိနေကြပါတယ်။
" အိမ်ကအဖွားဆို လေဖြတ်နေတာ။လမ်းမလျှောက်နိုင်ဘူး။ပင်စင်လစာဆို ကျွန်တော်က ကိုယ်စားထုတ်ရတယ်။ထောက်ခံစာအပြည့်အစုံနဲ့ပေါ့လေ။ကျွန်တော့်အဖွားလို မကျန်းမာသူတွေ လမ်းမသွားနိုင်သူတွေအတွက်လည်းစီစဥ်ပေးစေချင်တာပါ။ဘာလို့ဆို စမတ်ကတ်ကလည်းမဖြစ်မနေလုပ်ရမယ့်အရာဖြစ်နေတယ်။အခုဆို ခြောက်လတခါ အဖွားအသက်ရှိကြောင်း video call ပြရပါတယ်။" လို့ ပင်စင်စားဝန်ထမ်းရဲ့မိသားစုဝင်ကပြောပါတယ်။
မြန်မာ့စီးပွားရေးဘဏ်ကလက်ရှိ ဘဏ်ပေါင်း ၁၇၁ ဘဏ်မှာ UID နံပါတ်ရရှိပြီးသူ အငြိမ်းစားဝန်ထမ်းတွေဆီကနေ အချက်အလက်တွေရယူထည့်သွင်းနေသလို UID နံပါတ် မရရှိသေးသူတွေကိုလည်း ဆက်သွယ်ဆောင်ရွက်ပေးနေတယ်လို့ မြန်မာ့စီးပွားရေးဘဏ်က ဆိုထားပါတယ်။
UID နံပါတ်မရရှိသေးသူတွေကို ဆက်သွယ်ဆောင်ရွက်ရာမှာ အသက်အရွယ် ၊ကျန်းမာရေးအခြေအနေနဲ့ အခြားအုပ်ချုပ်မှုဆိုင်ရာ ကိစ္စအခက်အခဲကြောင့် UID နံပါတ်မရရှိသေးသူတွေကိုလည်း အငြိမ်းစားပင်စင်လစာကို ယခင်ထုတ်ယူနေကြအတိုင်း မြန်မာစီးပွားရေးဘဏ်တွေမှာ ထုတ်ပေးနေတယ်လို့ အသိပေးထားပါတယ်။
အကယ်လို့ UID နံပါတ်မရှိသေးသူများအနေနဲ့ ပင်စင်လစာထုတ်ယူဖို့အခက်အခဲရှိပါက သက်ဆိုင်ရာ ဘဏ်ခွဲမန်နေဂျာကို ဆက်သွယ်ဆောင်ရွက်နိုင်တယ်လို့ သိရပါတယ်။