စစ်ပွဲအတွင်းပျက်စီးသွားသည့် လေကြောင်းရန်ကာကွယ်ရေး စနစ်များအား အီရန်ပြန်လည်အစားထိုး
********************
(နိုင်ငံတကာ) ဇူလိုင် ၂၂
အီရန်နိုင်ငံသည် အစ္စရေးနှင့်ဖြစ်ပွားသည့် စစ်ပွဲအတွင်းပျက်စီးသွားသည့် လေကြောင်းရန် ကာကွယ်ရေး စနစ်များအား ပြန်လည်အစားထိုးတပ်ဆင်လိုက်ပြီ ဖြစ်ကြောင်း အီရန်နိုင်ငံပိုင် မီဒီယာတစ်ခု က ဖော်ပြသည်။
အီရန်နိုင်ငံ၏လေကြောင်းရန်ကာကွယ်ရေးစနစ်များသည် အစ္စရေးနိုင်ငံနှင့်ဇွန်လအတွင်းက ဖြစ်ပွားခဲ့သည့် စစ်ပွဲ အတွင်း ပျက်စီးသွားခြင်း ဖြစ်သည်။
အဆိုပါစစ်ပွဲအတွင်း အစ္စရေးလေတပ်မတော်သည် အီရန်၏ဝေဟင်အတွင်း လွှမ်းမိုးထားနိုင်ခဲ့ပြီး အီရန်နိုင်ငံ၏လေကြောင်းကာကွယ်ရေးစနစ်များအား အထိနာစေခဲ့ကြောင်း သိရသည်။
သို့သော် အစ္စရေးလေတပ်မတော်၏တိုက်ခိုက်မှုအတွင်း အီရန်၏လေကြောင်းကာကွယ်ရေးစနစ်အချို့ ပျက်စီးသွား ခဲ့သော်လည်း အီရန်နိုင်ငံအနေဖြင့် ၎င်းတို့ကြိုတင်ပြင်ဆင်ထားသည့် လက်နက်စနစ်များဖြင့် ပြန်လည်အစားထိုး ၍ နိုင်ငံ၏ဝေဟင်ကာကွယ်ရေးကို ပြန်လည်လုပ်ဆောင်နိုင်ခဲ့ကြောင်း သိရသည်။
အစ္စရေးနိုင်ငံနှင့် စစ်မက်မဖြစ်ပွားမီ အီရန်နိုင်ငံတွင် ရုရှားနိုင်ငံလုပ် S-300 အမျိုးအစား လေကြောင်း ကာကွယ်ရေးစနစ်အပြင် ပြည်တွင်းဖြစ် Bavar-373 ဒုံးခွင်းဒုံးစနစ်ကိုပါ ပိုင်ဆိုင်ထားခဲ့သည်။
ပြီးခဲ့သည့်လ အတွင်းက ဖြစ်ပွားခဲ့သည့်စစ်ပွဲတွင် အစ္စရေးလေတပ်မတော် က အီရန်ပိုင်နက်အတွင်းသို့ ထိုးဖောက်ဝင်ရောက်၍ တိုက်ခိုက်ခဲ့ပြီး အီရန်တပ်မတော်ကမူ ၎င်းတို့၏ရာပေါင်းများစွာသော ဒုံးကျည်များဖြင့်အစ္စရေးပိုင်နက်အတွင်းသို့ ပစ်ခတ် တိုက်ခိုက်ခဲ့ခြင်းဖြစ်ကြောင်း Straight Time သတင်းဌာန ဖော်ပြချက်အရ သိရသည်။
