e-ID စနစ်သည် ပြည်သူလူထုကို စောင့်ကြည့်ရန် ရည်ရွယ်လုပ်ဆောင်သည်ဟူသော သတင်းများသည် အခြေအမြစ်မရှိသော ဝါဒဖြန့်မှုများသာဖြစ်သည်ဟု လဝကထုတ်ပြန်
********************
(ပြည်တွင်း) ဇူလိုင် ၂၂
e-ID စနစ်သည် ပြည်သူလူထုကို စောင့်ကြည့်ရန် ရည်ရွယ်လုပ်ဆောင်သည်ဟူသော သတင်းများသည် အခြေအမြစ်မရှိသော ဝါဒဖြန့်မှုများသာဖြစ်သည်ဟု လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက ထုတ်ပြန်ထားပါတယ်။
e-ID စနစ်နှင့်ပတ်သက်၍ အချို့သောလူမှုကွန်ရက်စာမျက်နှာများတွင် “ e-ID စနစ်သည် ပြည်သူများကို စောင့်ကြည့်ရန်” ရည်ရွယ်လုပ်ဆောင်ခြင်းဖြစ်ကြောင်း မဟုတ်မမှန် ဝါဒဖြန့်ချိလျက် ရှိသည်ကို တွေ့ရှိရကြောင်း၊ e-ID စနစ်သည် ပြည်သူလူထုကို စောင့်ကြည့်ရန် ရည်ရွယ်လုပ်ဆောင်သည်ဟူသော သတင်းများသည် အခြေအမြစ် မရှိသော ဝါဒဖြန့်မှုများသာဖြစ်ကြောင်း ဝန်ကြီးဌာနက ထုတ်ပြန်ထားပါတယ်။
e-ID စနစ်၏ အဓိကရည်ရွယ်ချက်မှာ အချိန်/နေရာမရွေး မည်သူမည်ဝါဖြစ်ကြောင်း အထောက်အထား ခိုင်လုံစွာဖြင့် သက်သေခံနိုင်သည့် Digital Platform တစ်ခုအဖြစ် ဆောင်ရွက်ပေး ရန်အတွက်ဖြစ်ကြောင်း၊ e-ID စနစ်၏ အဓိကလုပ်ဆောင်ချက်မှာ လူပုဂ္ဂိုလ်ဆိုင်ရာ ကိုယ်ရေးအချက်အလက်များကို လုံခြုံစွာစီမံခန့်ခွဲနိုင်ရန်နှင့် နိုင်ငံသားများ၏ အထောက်အထားကို မှန်ကန်တိကျစွာ အတည်ပြုပေးနိုင်ရန်အတွက်ဖြစ်ပြီး ဥပမာအားဖြင့်၊ ဘဏ်တွင် ငွေလွှဲ၊ ငွေထုတ်ပြုလုပ်ရာတွင်ဖြစ်စေ၊ အစိုးရဝန်ဆောင်မှုများ ရယူရာတွင်ဖြစ်စေ၊ သို့မဟုတ် မဲပေးရာတွင် ဖြစ်စေ မိမိ၏ အထောက်အထားကို Online/Offline စနစ်များဖြင့် လွယ်ကူလျင်မြန်စွာ သက်သေပြနိုင်ပြီး၊ မိမိမည်သူ မည်ဝါဖြစ်ကြောင်း အထောက်အထားခိုင်လုံစွာဖြင့် အာမခံနိုင်စေရန် ရည်ရွယ်ကြောင်း ဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
e-ID စနစ်ဆိုသည်မှာ နိုင်ငံသားများ၏ ကိုယ်ရေးအချက်အလက်များဖြစ်သည့် အမည်၊ မွေးသက္ကရာဇ်၊ အဘအမည်၊ အမိအမည်၊ ကျား/မ စသည့် Demographic အချက်အလက်များနှင့် Biometrics အချက်အလက်များဖြစ်သည့် လက် ၁၀ ချောင်းလက်ဗွေ၊ မျက်စိသူငယ်အိမ်၊ မျက်နှာသွင်ပြင်တို့ကို ကောက်ယူ ပေါင်းစပ်၍ ဂဏန်း ၁၀ လုံး ပါဝင်သည့် Unique Identification (UID) နံပါတ်ထုတ်ပေးသည့်စနစ်တစ်ခုဖြစ်ကာ လူတစ်ဦးလျှင် UID နံပါတ် တစ်ခုသာရရှိမည်ဖြစ်ပြီး ၎င်းနံပါတ်သည် ဘဝတစ်သက်တာလုံးအတွက် အသုံးပြုရမည့် နံပါတ်တစ်ခု ဖြစ်ကြောင်း သိရပါတယ်။
