တာချီလိတ်မှာ လေပြင်းတိုက်လို့ သစ်ပင်ကြီးတွေ လဲကျ၊ ဓာတ်ကြိုးတချို့ ပျက်ကျပြီး နှစ်ယောက် ဒဏ်ရာ ရ
ဇူလိုင် ၂၃ - ၂၀၂၅
SN (VOM)
ရှမ်းပြည်နယ် (အရှေ့ပိုင်း)၊ တာချီလိတ်မြို့မှာ လေပြင်း တိုက်ခတ်မှုကြောင့် မနေ့ ဇူလိုင် ၂၁ ရက်၊ ညပိုင်းက သစ်ပင်ကြီးတွေ လဲကျကာ ဓာတ်ကြိုးတချို့ ပျက်ကျပြီး နှစ်ယောက် ဓာတ်လိုက်ကာ မစိုးရိမ်ရဒဏ်ရာတွေ ရရှိခဲ့တယ်လို့ ဒေသခံတွေဆီက သိရပါတယ်။
မနေ့ည ၇ နာရီခွဲကျော် ဝန်းကျင်မှာ လေပြင်း တိုက်ခတ်ပြီးနောက် တာချီလိတ်၊ ဝိန်းကျောက်ရပ်ကွက်က ဗိုလ်ချုပ်လမ်းမပေါ်ရှိ ရွှေဘူးသီးဟိုတယ်ရှေ့က သစ်ပင်ကြီး တပင်နဲ့ တော်ကော့ ဘုန်းကြီးကျောင်း အရှေ့က သစ်ပင်ကြီး တပင် လဲကျခဲ့ပြီး လျှပ်စစ် ဓာတ်အားလိုင်းကြိုးတွေလည်း ပျက်ကျမှု ဖြစ်ပွားခဲ့တယ်လို့ သိရပါတယ်။
အဲဒီလိုပဲ ရန်အောင်မြေရပ်ကွက်၊ ပါလျှံ (၁) နယ်မြေ၊ လွှမ်းမိုး ဘုန်းတော်ကြီးကျောင်းရှေ့ လမ်းမပေါ်မှာလည်း လေပြင်း တိုက်ခတ်မူကြောင့် သစ်ပင်ကြီးတွေလဲကျကာ လျှပ်စစ်မီးကြိုးတွေ ပြတ်တောက်သွားပြီး အနီးရှိ ဆိုင်ကယ်ပြင်ဆိုင်က အမျိုးသား နှစ်ယောက် ဓာတ်လိုက်မှု ဖြစ်ပွားခဲ့တယ်လို့ သိရပါတယ်။
“ဓာတ်လိုက်သွားတာက အသက်အန္တရာယ်အထိတော့ မစိုးရိမ်ရပါဘူး။ လက်ရှိတော့ နီးစပ်ရာ ဆေးခန်းမှာ ဆေးကုသမှု ခံယူနေပါတယ်။ တယောက်ကတော့ ခြေသလုံး မီးလောင်ဒဏ်ရာ ရသွားတယ်” လို့ ဒေသခံတယောက်က ပြောပါတယ်။
သစ်ပင်လဲကျရာ နေရာတွေကို မြို့နယ်မီးသတ်ဌာနမှ တာဝန်ရှိသူတွေက သွားရောက် ရှင်းလင်းရေး လုပ်ဆောင်ခဲ့သလို မြို့မီးလင်းရေး ကော်မတီမှလည်း လျှပ်စစ်ဓာတ်အားလိုင်းကြိုး ပြတ်တောက်မှုတွေကို သွားရောက် စစ်ဆေးခဲ့တယ်လို့ သိရပါတယ်။
“ပါလျှံ ဝန်ထမ်းအိမ်ရာဘက်မှာလည်း ဓာတ်ကြိုးတွေ ပြုတ်ကျကုန်တယ်။ ချက်ချင်းကြီး လမ်းပေါ်မှာ လေတွေတိုက်၊ မိုးတွေရွာလာတာ ဘာမှကို မမြင်ရတော့ဘူး။ သစ်ပင်တွေလည်း ကျိုးကျ၊ လဲကျနဲ့၊ ဆိုင်းဘုတ်တွေလည်း လွှင့်ကုန်တယ်။ သစ်ပင်ကြီးတွေ ခံနေတာဆိုတော့ လမ်းမပေါ်မှာ ရှေ့ဆက်မရ၊ နောက်ဆုတ်မရနဲ့ လမ်းတွေလည်း ပိတ်ကုန်တယ်။ ဘာမှ၊ ဘယ်သူမှ ဆိုးဆိုးရွားရွားမဖြစ်လို့ ကံကောင်းတယ်ပြောရမယ်။ ဓာတ်ကြိုးတွေလည်း ပျက်ကျကုန်တော့ မီးပါ ပျက်သွားတယ်။ ဒါတောင် မုန်တိုင်း အဖျားခတ်မယ်ဆိုတာ မလာသေးဘူး။ လေပြင်းတိုက်ရုံပဲ ရှိသေးတာ” လို့ နောက်ထပ် ဒေသခံတယောက်က ပြောပါတယ်။
မိုးလေဝသနှင့် ဇလဗေဒ ညွှန်ကြားမှုဦးစီးဌာနရဲ့ မနေ့ ဇူလိုင် ၂၁ ရက်၊ ညနေ ၆ နာရီအချိန် ထုတ်ပြန်ချက်အရ တုံကင်ပင်လယ်ကွေ့မှာ ဖြစ်ပေါ်နေတဲ့ အပူပိုင်းမုန်တိုင်း “ဝီဖာ” (WIPHA) ဟာ အနောက် - အနောက်တောင်ဘက်ကို ဆက်လက်ရွေ့လျားနိုင်ပြီး ဒီကနေ့ ဇူလိုင် ၂၂ ရက်မှာ ဗီယက်နမ်နိုင်ငံ မြောက်ပိုင်းဒေသတွေကို ဖြတ်ကျော်နိုင်တယ်လို့ သိရပါတယ်။
အဆိုပါမုန်တိုင်းရဲ့ အကြွင်းအကျန် တိမ်တိုက်တွေဟာ မြန်မာနိုင်ငံကို ရောက်ရှိလာနိုင်ခြင်းကြောင့်အပြင် လာမယ့် ဇူလိုင် ၂၄ ရက်နေ့မှာ ဘင်္ဂလားပင်လယ်အော် မြောက်ပိုင်းမှာ ဖြစ်ပေါ်လာနိုင်တဲ့ လေဖိအားနည်းရပ်ဝန်းရဲ့ အရှိန်ကြောင့်လည်းကောင်း၊ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေ အားကောင်းရာမှ အားအလွန် ကောင်းနေခြင်းကြောင့်လည်းကောင်း မနေ့ ဇူလိုင် ၂၁ ရက်၊ ညနေပိုင်းကနေ ၂၇ ရက်နေ့အထိ တိုင်းနဲ့ ပြည်နယ်တချို့မှာ မိုးကြီး၊ ရေလျှံမှု၊ မြေပြိုမှုတွေ ဖြစ်ပေါ်နိုင်တယ်လို့ သိရပါတယ်။
မိုးရွာသွန်းနိုင်တဲ့ ဒေသတွေနဲ့ မိုးရွာသွန်းမှု အခြေအနေတွေကတော့ နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နဲ့ ရှမ်းပြည်နယ်တို့မှာ နေရာစိပ်စိပ်မှ နေရာအနှံ့အပြား မိုးထစ်ချုန်း ရွာသွန်းနိုင်ပြီး ဒေသအလိုက်နဲ့ နေရာကွက်ပြီး မိုးကြီးနိုင်တယ်လို့ သိရပါတယ်။
မိုးသည်းထန်စွာ ရွာသွန်းခြင်းနဲ့အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တပြက်ရေကြီးခြင်းနဲ့ မြေပြိုခြင်း စတဲ့ သဘာဝဘေးအန္တရာယ်တွေလည်း ဖြစ်ပေါ်နိုင်တယ်လို့ သိရပါတယ်။
ဒါကြောင့် အဆိုပါဒေသတွေရှိ ကုန်းမြင့်ဒေသအနီး နေထိုင်ကြသူတွေအနေနဲ့ မြေပြိုမှုအန္တရာယ်၊ မြစ်ငယ်၊ ချောင်းငယ်တွေအနီး နေထိုင်ကြသူတွေအနေနဲ့ ရေကြီး၊ ရေလျှံမှု အန္တရာယ်တွေကို ကြိုတင်သတိပြု ရှောင်ရှားကြဖို့ လိုအပ်တယ်လို့ ဆိုပါတယ်။
ဒါကြောင့် ဆည်မြောင်း တာတမံတွေအနေနဲ့လည်း လိုအပ်တာတွေကို ကြိုတင်ပြင်ဆင် ဆောင်ရွက်ထားကြဖို့ လိုအပ်ပြီး ပြည်တွင်းရေကြောင်း သွားလာရေး၊ လေကြောင်းပျံသန်းရေး အနေနဲ့လည်း သတိပြုဖို့ လိုအပ်တယ်လို့ သိရပါတယ်။
ဒါအပြင် မြန်မာ့ကမ်းရိုးတန်း တလျှောက်နဲ့ ကမ်းလွန်ပင်လယ်ပြင် တို့မှာလည်း ရံဖန်ရံခါ မိုးသက်လေပြင်းတွေ ကျရောက်ပြီး လှိုင်းကြီးရာမှ လှိုင်းအလွန်ကြီးနိုင်တယ်လို့ မိုး/ဇလရဲ့ ထုတ်ပြန်ချက်မှာ ဖော်ပြထားပါတယ်။
မိုးသက်လေပြင်းကျစဉ် ရေပြင်/မြေပြင်လေဟာ တနာရီကို မိုင် ၄၀ ကနေ ၄၅ မိုင်အထိ တိုက်ခတ်နိုင်ပြီး မြန်မာ့ကမ်းရိုးတန်း တလျှောက်နဲ့ ကမ်းလွန်ပင်လယ်ပြင်တို့မှာ လှိုင်းအမြင့် ၁၀ ပေမှ ၁၅ ပေခန့်အထိ ရှိနိုင်တယ်လို့ သိရပါတယ်။
