#နိုင်ငံတကာသတင်း
◼ဝီဖာတိုင်ဖွန်းမုန်တိုင်းကိုရင်ဆိုင်ရန်ဗီယက်နမ်အသင့်ပြင်
အင်္ဂါနေ့ အစောပိုင်းတွင် ကုန်းတွင်းသို့ ဝင်ရောက်လာမည်ဟု မျှော်လင့်ထားကြသော ဝီဖာ တိုင်ဖွန်းမုန်တိုင်း သည် ရေကြီးမှုများနှင့် မြေပြိုမှုများဖြစ်ပေါ် စေနိုင်ကြောင်းနှင့်ကမ်းရိုးတန်းဒေသများအား အရေးပေါ် အခြေအနေပုံစံ ပြင်ဆင်ထားကြရန် ဗီယက်နမ်ဝန်ကြီးချုပ်က ပြောကြားသည်။
စနေနေ့က ဗီယက်နမ်မြောက်ပိုင်း ဟာလောင်းပင်လယ်ကွေ့တွင် မိုးသက် မုန်တိုင်းကျရောက်ပြီးနောက် တိမ်းမှောက်သွားခဲ့ကာ လူပေါင်း ၃၀ ကျော် သေဆုံးသွားခဲ့သော ခရီးသွားရေယာဉ်မှ ပျောက်ဆုံးနေသူများအား ရှာဖွေမှုများကို ဝီဖာမုန်တိုင်းကြောင့် ရှုပ်ထွေးသွားစေမည်ဟုလည်း မျှော်လင့်ရသည်။
အဆိုပါမုန်တိုင်းသည် ဗီယက်နမ်နိုင်ငံမြောက်ပိုင်း ကွမ်နင်နှင့် နင်ဘင်း ပြည် နယ်ကြား ကမ်းရိုးတန်းသို့ ဝင်ရောက်မည်ဟု ခန့်မှန်းရကာ မုန်းတိုင်းနှင့်အတူ ပါလာသော မိုးကြီးမှုများကြောင့် အန္တရာယ်ရှိသော ရေကြီး ရေလျှံမှုများ ၊ မြေပြိုမှုများ ဖြစ်ပေါ်လာနိုင်ကြောင်း အမျိုးသားရာသီဥတုအေဂျင်စီက ပြောကြားသည်။
ကမ်းရိုးတန်းပြည်နယ်များသို့ ယမန်နေ့ညကပင် ဝန်ကြီးချုပ် ဖန်မင်ချင် က အ ရေးပေါ်သတင်းစကားပေးပို့ခဲ့ကာရေယာဉ်များကိုကမ်းသို့ပြန်လည်ခေါ်ယူ ထားရန်၊ ရေကြီးတတ်သောဒေသများမှ လူများကို ရွှေ့ပြောင်းထားရန်၊ အရေးပေါ် အထောက်အပံ့နှင့် ကယ်ဆယ်ရေးပစ္စည်းများပြင်ဆင်ထားရှိရန် ဆက်သွယ်ရေးလုပ်ငန်း အခြေခံအဆောက်အဦးများအား လုံခြုံအောင် လုပ်ဆောင်ရန် ပြောကြားခဲ့သည်။
“ ဒီမုန်တိုင်းကအားကောင်းပြီးအလျင်အမြန်ရွေ့လျားနေတဲ့မုန်တိုင်းဖြစ်ပါတယ်။” ဟု ဝန်ကြီးချုပ်ဖန်မင်ချင် က ပြောကြားပြီး မုန်တိုင်းကြောင့်ရုတ်တရက် ရေကြီးမှုများ နှင့် မြေပြိုမှုများအပြင် မြို့ကြီးများတွင်ပါ ရေကြီးမှုများ ဖြစ်ပေါ်နိုင်ကြောင်း ၎င်းက သတိပေးသည်။
ဗီယက်နမ်အမျိုးသားလေကြောင်းလိုင်းဖြစ်သည့် Vietnam Airlines နှင့် ၎င်းတို့လက်အောက်ခံ Pacific Airlines တို့က အနည်းဆုံးလေကြောင်း ခရီးစဉ် ၉ ခုကို ဖျက်သိမ်းခဲ့ပြီး အချိန်နောက်ကျခြင်းများ၊ အချိန်ပြောင်းလဲခြင်းများ ဖြစ်ပေါ်နိုင်ကြောင်းလည်း ပြောကြားထားသည်။
ဘတ်ဂျက်လေကြောင်းလိုင်းဖြစ်သော Vietjet ကလည်း ယနေ့အတွက် လေယာဉ်ခရီးစဉ် ၁၂ ခုကို ဖျက်သိမ်းလိုက်သည်။
တောင်တရုတ်ပင်လယ်အားမျက်နှာမူထားသည့်ရှည်လျားသောကမ်းရိုးတန်းပိုင် ဆိုင်ထားသော ဗီ ယက် နမ် နိုင်ငံသည် မကြာခဏ ဆိုသလို လူ အသေ အ ပျောက်ဖြစ်စေနိုင်သည့် မုန်တိုင်းများဒဏ်ကို ခံစားရသည်။
ပြီးခဲ့သည့် နှစ်ကလည်း တိုင်ဖွန်းမုန်တိုင်း ယာဂီ ကြောင့် လူ ၃၀၀ ခန့် သေဆုံးခဲ့ပြီး တန်ဖိုးအမေရိကန်ဒေါ်လာ သုံးဘီလီယံ ကျော်ခန့် ပျက်စီးဆုံးရှုူံးမှုများ ဖြစ်ပေါ်ခဲ့သည်။
တိုင်ဖွန်းမုန်တိုင်း ဝီဖာ သည် စနေ၊ တနင်္ဂနွေနှစ်ရက်တွင် ဟောင်ကောင်သို့ ဝင်ရောက်ခဲ့ပြီး သစ်ပင်များ လဲကျခြင်း၊ ဆောက်လက်စ အဆောက်အဦးယာယီငြမ်းများ ပြိုကျမှု ဖြစ်စေခဲ့ကြောင်း သိရသည်။
ထို့အတူဟောင်ကောင်တွင်လည်း မုန်တိုင်းမဝင်မီ အမြင့်ဆုံး သတိပေးချက် ထုတ်ပြန်ခဲ့သည်။
သတင်း-ရဲမင်း
ကိုးကား- Reuters
