#နိုင်ငံတကာသတင်း
◼ ဂျပန်အထက်လွှတ်တော်လူများစုနေရာအာဏာရမဟာမိတ်အဖွဲ့ ဆုံးရှုံး
ယမန်နေ့ကကျင်းပခဲ့သော ဂျပန်အထက်လွှတ်တော် သက်တမ်းဝက် ရွေး ကောက်ပွဲတွင် အာဏာရမဟာမိတ်အဖွဲ့ က လူများစုနေရာကို ဆုံးရှုံးသွားခဲ့ကာ ၎င်းတို့၏ဩဇာကျဆင်းသွားခဲ့သော်လည်း ပါတီခေါင်းဆောင်နေရာကို ဆက် လက်နေရာရယူထားမည် ဖြစ်ကြောင်း ဝန်ကြီးချုပ် ရှီဂဲရု အီရှီဘာက ကြုံးဝါးပြောဆိုသည်။
ရွေးကောက်ပွဲရလဒ် က အီရှီဘာ၏ အစိုးရအဖွဲ့ပြုတ်ကျသွားရေးကို တိုက်ရိုက် အဆုံးအဖြတ် မပေးခဲ့သော်လည်း ပြီးခဲ့သည့်နှစ် အောက်တိုဘာလက ပို၍ဩဇာကြီးမားသော အောက်လွှတ်တော်တွင် ထိန်းချုပ်မှုဆုံးရှုံးသွားခဲ့သော ခေါင်းဆောင်အပေါ် ဖိအား များလာစေခဲ့သည်။
အမတ်နေရာ ၂၄၈ နေရာရှိသော အထက်လွှတ်တော်မှ ၁၂၅ ‌နေရာကို ယှဉ်ပြိုင်ခဲ့သော ရွေးကောက်ပွဲတွင် အီရှီဘာ၏ လစ်ဘရယ်ဒီမိုကရက်တစ်ပါတီ(LDP) နှင့် မဟာမိတ် ကူမီတိုပါတီ တို့က လူများစုနေရာရရှိရန် အမတ်နေရာ ၅၀ အနိုင်ရရှိရမည်ဖြစ်သော်လည်း ၄၇ နေရာသာ အနိုင်ရရှိခဲ့သည်။
ပြီးခဲ့သည့်နှစ် အောက်တိုဘာလကလည်း အီရှီဘာဦး‌‌ဆောင်သော မဟာမိတ်အဖွဲ့သည် ၁၅ နှစ်အတွင်း အဆိုးရွားဆုံး အောက်လွှတ်တော် ရွေးကောက်ပွဲရလဒ် နှင့် အတူ လူများစုနေရာကို ဆုံးရှုံးသွားခဲ့ပြီးနောက် ခေါင်းဆောင်အပြောင်းအလဲလုပ်ရန် ပါတီတွင်းမှတောင်းဆိုမှုများ ကြုံတွေ့ခဲ့ရသည်။
မဲရုံအထွက် စစ်တမ်းများ ပိတ်သိမ်းပြီးနောက် ယမန်နေ့ညက ပြောဆိုရာတွင် ၎င်းအနေဖြင့် ကြမ်းတမ်းသောရလဒ်ကို အလေးအနက် လက်သင့်ခံပါကြောင်း အီရှီဘာက ပြောကြားသည်။
“ ကျွန်တော်တို့က အခုအချိန်မှာ အမေရိကန်နိုင်ငံနဲ့ အလွန်ပဲ အရေးကြီးတဲ့ အခွန်အကောက် ဆွေးနွေးညှိနှိုင်းမှုတွေ လုပ်ဆောင်နေပါတယ်။ ဒီဆွေးနွေးမှုတွေကို ကျွန်တော်တို့ ဘယ်တော့မှ မဖျက်ဆီးရပါဘူး၊ ကျွန်တော်တို့ အမျိုးသားအကျိုးစီးပွားအတွက် အပြည့်အဝ စိတ်ပိုင်းဖြတ်ပြီး အာရုံစူးစိုက်လုပ်ဆောင်မှသာ သဘာဝ ကျမှာ ဖြစ်ပါတယ်။” ဟု အီရှီဘာ က နောက်ပိုင်းတွင် TV Tokyo အားပြောကြားသည်။
ဝန်ကြီးချုပ်အဖြစ် ဆက်လက်တာဝန်ယူရန် ရည်ရွယ်ထားပါသလားဟု မေးမြန်းချိန်တွင်လည်း “ ဒါဟာ အမှန်ပဲ ဖြစ်ပါတယ်။” ဟု အီရှီဘာ က ပြောသည်။
ကမ္ဘာ့စတုတ္ထအကြီးဆုံးစီးပွားရေးကို ပိုင်ဆိုင်ထားသော ဂျပန်သည် ဩဂုတ် ၁ ရက်အမီ အမေရိကန်နှင့် ကုန်သွယ်ရေးသဘောတူညီချက် ရယူရန် လုပ်ဆောင်နေရပြီး ထိုသို့မဟုတ်ခဲ့ပါက ၎င်းတို့၏ အကြီးမားဆုံး နိုင်ငံခြားဈေးကွက်တွင် ကြီးလေးသောအခွန်အကောက်များနှင့် ရင်ဆိုင်ရမည်ဖြစ်သည်။
အဓိကအတိုက်အခံ ပါတီဖြစ်သော ဒီမိုကရက်တစ်ပါတီ က ၂၂ နေရာ အနိုင်ရရှိပြီး ရွေးကောက်ပွဲတွင် ဒုတိယနေရာလိုက်ခဲ့သည်။
ထိုအ‌တောအတွင်းမှာပင် ယခင်ကအထက်လွှတ်တော်တွင် အမတ်နေရာ တစ်နေရာသာရထားသော လက်ယာစွန်း ဆန်ဆီတိုပါတီက အမတ်နေရာ ၁၄ နေရာ အနိုင်ရရှိခဲ့ပြီး နိုင်ငံရေးပင်မရေစီးကြောင်းသို့ ဝင်ရောက်လာပြီဖြစ်ကြောင်း အချက်ပြခဲ့သည်။
လွန်ခဲ့သော နှစ် အနည်းငယ်က ယူကျူ့ပေါ်တွင် စတင်ခဲ့သော လူထုအကြိုက်လိုက်ပါတီ က မဲဆွယ်ပွဲတွင် ‘ဂျပန်ပထမ’ ကြွေးကြော်သံနှင့်အတူ ဂျပန်နိုင်ငံထဲသို့ နိုင်ငံခြားသားများ တိတ်တဆိတ် ကျူးကျော် ဝင်ရောက်နေမှုကို သတိပေးပြောကြားခဲ့သည်။
သတင်း-ရဲမင်း
ကိုးကား-Reuters