#ယနေ့ထုတ်သတင်းစာ_သတင်း
◼ ထိုင်း-မလေးနယ်စပ်တွင် မြန်မာရွှေ့ပြောင်းလုပ်သား ၁၁ ဦးနှင့် ထိုင်းနိုင်ငံသားအချို့ ဖမ်းဆီးခံရ
ထိုင်း-မလေး နယ်စပ်တွင် ဇူလိုင် ၂ဝ ရက်က မြန်မာရွှေ့ပြောင်း လုပ်သား ၁၁ ဦးနှင့် ထိုင်းနိုင်ငံသားအချို့ ဖမ်းဆီးခံခဲ့ရကြောင်း ဒေသတွင်းသတင်းများ၏ ဖော်ပြချက်အရသိရသည်။
ထိုင်းတောင်ပိုင်း ထိုင်း -မလေးရှား နယ်စပ်ဘက် ဆုန်ခလာခရိုင် ပါချင်ခရိုင်ခွဲထဲက လမ်းဆုံတစ်ခု၌ တိုယိုတာကားတစ်စီးကို ထိုင်းအမြန်လမ်းရဲတပ်ဖွဲ့က စစ်ဆေးချိန်တွင် တရားမဝင် မြန်မာရွှေ့ပြောင်းလုပ်သား ၁၁ ဦးနှင့် ထိုင်းနိုင်ငံသားသုံးဦး ဖမ်းဆီးခံခဲ့ရခြင်းဖြစ်ကြောင်း သိရသည်။
အဆိုပါ ကားရှေ့ခန်းတွင် မြန်မာရွှေ့ပြောင်းလုပ်သား အမျိုးသမီးလေးဦးနှင့်နောက်ခန်းတွင် အမျိုးသားရှစ်ဦး လိုက်ပါလာခဲ့ပြီး ၎င်းတို့အနက်မှ မြန်မာနိုင်ငံသားတစ်ဦးသာ အထောက်အထားရှိသောကြောင့် ကျန်သည့် ၁၁ ဦးနှင့်၎င်းတို့အား ခေါ်ဆောင်လာသည့် ထိုင်းနိုင်ငံသားသုံးဦးအား တရားမဝင် နယ်စပ်ဖြတ်ကျော်မှု၊ လူကုန်ကူးမှုနှင့်အရေးယူသွားမည်ဖြစ်ကြောင်း သိရသည်။
၎င်းတို့အထဲမှ ယာဉ်မောင်းဖြစ်သော အသက်(၃၆) နှစ်အရွယ် ထိုင်းနိုင်ငံသားမှာ ၉ မမ သေနတ်တစ်လက် ခါးကြားထဲထည့်ထားကြောင်း ထိုင်းရဲတပ်ဖွဲ့က တွေ့ရှိခဲ့ပြီး ၎င်းအားတရားမဝင်လက်နက်ကိုင်ဆောင်မှုနှင့် ထပ်တိုးပုဒ်မတပ်ကာ အရေးယူသွားမည် ဖြစ်ကြောင်းသိရသည်။
