#ပြည်တွင်းသတင်း
◼ ဖားကန့်၌ မြေစာပြိုကျမှုဖြစ်၊ နှစ်ဦးသေဆုံး၍ ၁၇ ဦးခန့်ပျောက်ဆုံးနေ
ကချင်ပြည်နယ်၊ ဖားကန့်မြို့နယ်ရှိမှော်စီစာတောင်ယာကုန်း၌ ယနေ့(ဇူလိုင် ၂၁ ရက်) နံနက် ၈ နာရီခွဲခန့်တွင် မြေစာပြိုကျမှုဖြစ်ပွားရာ မွန်းလွဲ ၂ နာရီအထိရုပ်အလောင်းနှစ်လောင်းတွေ့ရှိထားပြီး ၁၇ ဦး ခန့်ပျောက်ဆုံးလျက်ရှိကြောင်း မြန်မာနိုင်ငံလူမှုကယ်ဆယ်ရေးအဖွဲ့(ဖားကန့်)ထံမှသိရသည်။
မြေစာပြိုကျသည့်နေရာမှာ မှော်စီစာတောင်ယာကုန်း စိန်စိန်ဂျိတ်ပါဝါကြောဖြစ်ပြီး မြေစာပြိုကျသည့်အထဲတွင် ကျောက်လာရှာသူများနှင့်စျေးဆိုင်များပါသွားကြောင်းသိရသည်။
"အခုပြိုကျတဲ့မြေစာပုံက ကျောက်တောင်တွေပေါ်မှာပုံထားတာ။ မိုးကလည်းရွာနေတော့ မြေစာပုံကအိပြီးပြိုကျသွားတာ။ လက်ရှိအချိန်ထိတော့ ရှာဖွေမှုတွေဆက်လုပ်နေပါတယ်။ ပျောက်ဆုံး၊ ဒဏ်ရာရရှိ မှုနဲ့သေဆုံးမှုကလက်ရှိအချိန်ထိပျောက်ဆုံးသူ ၁၇ ဦးခန့်ရှိပြီးသေဆုံးသူနှစ်ဦးတွေ့ရှိထားပါတယ်" ဟုမြန်မာနိုင်ငံလူမှုကယ်ဆယ်ရေးအဖွဲ့(ဖားကန့်)မှ တာဝန်ရှိသူတစ်ဦးကပြောသည်။
အဆိုပါမြေစာပြိုကျသည့်အခင်းဖြစ်ရာနေရာ၌ ဖားကန့်မြို့နယ်အတွင်းရှိမီးသတ်တပ်ဖွဲဝင်များ၊ ကြက်ခြေနီများ၊ လူမှုကူညီရေးအသင်းများဖြင့်ပူးပေါင်းရှာဖွေမှုများပြုလုပ်လျက်ရှိကြောင်းသိရသည်။
သတင်း - ပိုင်လေး
