#ယနေ့ထုတ်သတင်းစာ_နိုင်ငံတကာသတင်း
◼ တရုတ်၏ ဇူလိုင် ၁၆ ရက် ဓာတ်အားသုံးစွဲမှု ကီလိုဝပ် ၁ ဘီလီယံကျော်ရှိ
တရုတ်နိုင်ငံတစ်ဝန်း၌ အပူချိန်စံချိန်တင်မြင့် တက်လာမှုကြောင့် လျှပ်စစ်ဓာတ်အား သုံးစွဲမှုမှာလည်း စံချိန်တင်မြင့်တက်လာခဲ့ရာ ဇူလိုင် ၁၆ ရက်တွင် တရုတ်ပြည်သူများသုံးစွဲခဲ့သော လျှပ်စစ် ဓာတ်အားပမာဏမှာ ကီလိုဝပ် ၁ ဒသမ ၅ ဘီလီယံကျော် ရှိခဲ့ကြောင်း သိရသည်။
နွေရာသီအတွင်းသို့ဝင်ရောက်လာသည်နှင့် အမျှ တရုတ်တစ်နိုင်ငံလုံးအတိုင်းအတာအရ လျှပ်စစ်ဓာတ်အား သုံးစွဲမှုမြင့်တက်လာလိမ့်မည်ဖြစ်ရာ လျှပ်စစ်ဓာတ်အားပြဿနာများနှင့်ရင်ဆိုင်ရနိုင်ခြေရှိကြောင်း စွမ်းအင်ကဏ္ဍကျွမ်းကျင်သူများက သုံးသပ်ထားသည်။
ဇူလိုင် ၁၆ ရက် လျှပ်စစ်ဓာတ်အားသုံးစွဲမှုနှုန်း သည်ယခုလအတွင်း တတိယအကြိမ်မြောက်အဖြစ် စံချိန်တင်မြင့်တက်ခဲ့ခြင်းဖြစ်ကြောင်း တရုတ်အမျိုးသားစွမ်းအင်ဌာနတာဝန်ရှိသူများက ပြောကြားထားသည်။
ယခုနှစ် ဇွန်လအတွင်း တရုတ်နိုင်ငံတစ်ဝန်း၌ အပူဒဏ်ကြောင့် လေအေးပေးစက်များနှင့် လက်ကိုင်ပန်ကာများ ရောင်းအားမြင့်တက်လာခဲ့ရာ လေအေးပေးစက်ရောင်းအားမှာ ၁၁၂ ရာခိုင်နှုန်း အထိ မြင့်တက်လာခဲ့ပြီး လက်ကိုင်ပန်ကာများရောင်းအားမှာ ၁ဝ၃ ရာခိုင်နှုန်းအထိ မြင့်တက်လာခဲ့ကြောင်း သိရသည်။
အလားတူ ယခုနှစ်ဇွန်လအတွင်း တရုတ်နိုင်ငံ၏ လျှပ်စစ်ထုတ်လုပ်ရေးကဏ္ဍတွင် နေစွမ်းအင်ထုတ်လုပ်ရေးမှာ အဓိကအခန်းကဏ္ဍတွင် ပါဝင်လာကြောင်း သိရသည်။
တစ်ချိန်တည်းမှာပင် ယခုနှစ်ဇွန်လအတွင်း တရုတ်နိုင်ငံ၏ တစ်နိုင်ငံလုံးအတိုင်းအတာအရရေအားလျှပ်စစ်ထုတ်လုပ်နိုင်မှုနှုန်းမှာ ၂၀၂၃ ခုနှစ်ကထက် မြင့်တက်လာခဲ့ကြောင်း စွမ်းအင်ထုတ်လုပ်ရေးကဏ္ဍကျွမ်းကျင်သူများက တွက်ချက်ထားသည်။
ရိုက်တာ
