#ယနေ့ထုတ်သတင်းစာ_နိုင်ငံတကာသတင်း
◼ လော့စ်အိန်ဂျလိစ်၌ လူအုပ်ကို ကားဝင်တိုး၊ လူပေါင်း ၃ဝ ဒဏ်ရာရ
အမေရိကန်ပြည်ထောင်စု လော့စ်အိန်ဂျလိစ်မြို့ ဟောလိဝုဒ်ရပ် ကွက် နိုက်ကလပ်တစ်ခုပြင်ပ၌ စုရုံးနေသော လူအုပ်တစ်အုပ်ကို မော်တော်ယာဉ်တစ်စင်းက ဇူလိုင် ၁၉ ရက်တွင် ဝင်တိုက်ခဲ့ရာ လူပေါင်း ၃ဝ ဒဏ်ရာများရရှိခဲ့ကြောင်း သိရသည်။
ယာဉ်မောင်းကိုလမ်းသွားလမ်းလာများက တိုက်ခိုက်တားဆီးခဲ့ပြီး နောက် ရဲတပ်ဖွဲ့ဝင်များက ဖမ်းဆီးထိန်းသိမ်းနိုင်ခဲ့သည်။
လူအုပ်ကိုကားဝင်တိုးမှုဖြစ်ပွားခဲ့ပြီးနောက် ယာဉ်မောင်းကို လူအုပ်ကြီးက ယာဉ်ပေါ်မှဆွဲချ၍ထိုးကြိတ်ခဲ့ပြီး သေနတ်ဖြင့်လည်း ပစ်ခတ်ခဲ့ကြောင်း သိရသည်။
လက်ရှိအချိန်တွင် ယာဉ်မောင်းကို ဆေးရုံသို့ပို့ဆောင်ထားရပြီး လူသတ်ရန် ကြိုးပမ်းမှုဖြင့်တရားစွဲရန် ရဲတပ်ဖွဲ့က စဉ်းစားနေကြောင်း အမေရိကန်မီဒီယာများက သတင်းထုတ်ပြန်ထားသည်။
အလားတူ လူအုပ်ကို မော်တော်ယာဉ်ဖြင့်ဝင်တိုက်ခဲ့သော ယာဉ် မောင်းအား သေနတ်ဖြင့်ပစ်ခတ်ခဲ့ပြီးနောက် ထွက်ပြေးတိမ်းရှောင်သွားသူ အမျိုးသားကိုလည်း လော့စ်အိန်ဂျလိစ် ရဲတပ်ဖွဲ့က ရှာဖွေနေကြောင်း သိရသည်။
ယာဉ်မောင်းအမျိုးသားအနေ အဘယ်ကြောင့် မော်တော်ယာဉ်ဖြင့် ဖြင့် နိုက်ကလပ်ပြင်ပမှ လူအုပ်ကိုဝင်တိုက်ခဲ့ရသည်ကို မသိရသေးပေ။
အထက်ပါဖြစ်စဉ်အတွင်း လူပေါင်း ၃ဝ ဒဏ်ရာရရှိခဲ့ရာ ခုနစ်ဦးမှာ အခြေအနေစိုးရိမ်ရပြီး ခြောက်ဦးမှာ ဒဏ်ရာပြင်းထန်ကြောင်းလော့စ်အိန်ဂျလိစ်ရဲတပ်ဖွဲ့ တာဝန်ရှိသူများက မီဒီယာများသို့ ထုတ်ဖော်ပြောကြားထားသည်။
ရိုက်တာ
