Alan Ritchson က Batman ဖြစ်လာမယ်ဆိုတဲ့သတင်းအပေါ် James Gunn တုံ့ပြန်
ဇူလိုင် ၁၉ရက်၊ ၂၀၂၅။
DC Studios ရဲ့ ဥက္ကဋ္ဌ James Gunn ဟာ Reacher မင်းသား Alan Ritchson က Batman အသစ်ဖြစ်လာနိုင်ခြေနဲ့ ပတ်သက်ပြီး စိတ်ဝင်စားဖွယ်ရာ တုံ့ပြန်မှုတစ်ခု ပြုလုပ်ခဲ့ပါတယ်။
သူဟာ မကြာသေးခင်က Happy Sad Confused podcast မှာ ပရိသတ်တွေက Alan Ritchson ကို Batman နေရာမှာ သရုပ်ဆောင်စေချင်တဲ့အကြောင်း မေးမြန်းခံခဲ့ရတာ ဖြစ်ပါတယ်။ Gunn ကတော့ "ကျွန်တော်က Alan Ritchson ကို သရုပ်ဆောင်တစ်ယောက်အနေနဲ့ရော လူတစ်ယောက်အနေနဲ့ပါ အမာခံပရိသတ်တစ်ယောက်ပါပဲ။ ကျုပ်တို့ ဘာဆက်ဖြစ်မလဲဆိုတာ စောင့်ကြည့်ကြတာပေါ့" လို့ ဖြေကြားခဲ့ပါတယ်။ ဒီလို တိတိကျကျမဖြေကြားခဲ့တာကြောင့် Ritchson အတွက် DCU မှာ နေရာတစ်ခုရှိနေနိုင်တယ်လို့ ပရိသတ်တွေက ယူဆနေကြတာ ဖြစ်ပါတယ်။
Alan Ritchson ကလည်း Wired နဲ့ အင်တာဗျူးတစ်ခုမှာ ဒီကောလာဟလတွေနဲ့ ပတ်သက်ပြီး အံ့ဩမိကြောင်း ပြောကြားခဲ့ဖူးပါတယ်။ သူက "ကျွန်တော့်အတွက် အံ့ဩစရာကောင်းတာကတော့ James Gunn က သူ့ရဲ့ Twitter မှာ 'LOL. သူ Batman အဖြစ် သရုပ်ဆောင်မှာ မဟုတ်ပါဘူး' လို့ လူသိရှင်ကြား ကြေညာခဲ့ပြီးသားဖြစ်ပေမယ့်၊ ဒီသတင်းက ပျောက်မသွားဘူးဖြစ်နေတာပါပဲ" လို့ ပြောကြားခဲ့တာ ဖြစ်ပါတယ်။
Alan က "ကျွန်တော် Batman အဖြစ် သရုပ်ဆောင်မှာလား? ဟုတ်ကဲ့၊ သရုပ်ဆောင်မှာပေါ့။ Batman အဖြစ် သရုပ်ဆောင်ဖို့ဆိုရင် ကျွန်တော့်ကို ပိုက်ဆံပေးစရာတောင်မလိုပါဘူး။ ဟုတ်ပါတယ်၊ ကျွန်တော် ဒီဝတ်စုံကို ဝတ်မှာပါ" လို့ ပြောကြားခဲ့တာ ဖြစ်ပါတယ်။
James Gunn ကတော့ Batman ဇာတ်ညွှန်းဟာ အခုမှစတင်နေဆဲဖြစ်ပြီး၊ သူအလေးထားလုပ်ဆောင်နေတဲ့ အရာတွေထဲက တစ်ခုဖြစ်တယ်လို့ Rolling Stone နဲ့ အင်တာဗျူးမှာ ပြောကြားထားတာကြောင့်၊ သရုပ်ဆောင်ရွေးချယ်ပွဲတွေကိုတော့ မစတင်ရသေးဘူးလို့ သိရပါတယ်။