နာမည်ကျော်အဆိုတော် Connie Francis အသက် ၈၇ နှစ်အရွယ်တွင် ကွယ်လွန်
ဇူလိုင် ၁၇ရက်၊ ၂၀၂၅။
၁၉၅၀ နဲ့ ၆၀ ခုနှစ်တွေက နာမည်ကျော် ပေါ့ပ်အဆိုတော် Connie Francis ဟာ အသက် ၈၇ နှစ်အရွယ်မှာ ကွယ်လွန်သွားကြောင်း သူ့ရဲ့ ရင်းနှီးတဲ့မိတ်ဆွေတစ်ဦးဖြစ်သူ Ron Roberts က အတည်ပြုပြောကြားလိုက်ပါတယ်။
Connie Francis ဟာ "Who's Sorry Now?", "Lipstick on Your Collar" နဲ့ "Where the Boys Are" စတဲ့ နာမည်ကျော်သီချင်းများစွာနဲ့ လူသိများပြီး၊ Billboard Hot 100 မှာ နံပါတ် ၁ နေရာကို ပထမဆုံးရရှိခဲ့တဲ့ တစ်ကိုယ်တော်အမျိုးသမီးအဆိုတော်လည်း ဖြစ်ပါတယ်။ သူ့ရဲ့ ၁၉၆၂ ခုနှစ်က သီချင်းတစ်ပုဒ်ဖြစ်တဲ့ "Pretty Little Baby" ဟာ မကြာသေးခင်က TikTok မှာ ပြန်လည်ခေတ်စားလာခဲ့ပါသေးတယ်။
Francis ဟာ သူ့အဖေရဲ့တိုက်တွန်းမှုကြောင့် အောင်မြင်မှုမရတော့တဲ့ သီချင်းဟောင်းတပုဒ်ဖြစ်တဲ့ "Who's Sorry Now?" ကို ပြန်လည်သီဆိုခဲ့ရာကနေ ဂီတလောကမှာ အောင်မြင်မှုစတင်ရရှိခဲ့တာ ဖြစ်ပါတယ်။ ဒီသီချင်းဟာ Dick Clark ရဲ့ American Bandstand မှာ ထုတ်လွှင့်ပြသပြီးနောက်ပိုင်းမှာ အမေရိကန်နဲ့ ဗြိတိန်မှာပါ အောင်မြင်မှုကြီးမားစွာ ရရှိခဲ့ပါတယ်။
Francis ဟာ ဂီတလောကမှာ အောင်မြင်ခဲ့သလို၊ သူ့ရဲ့ ကိုယ်ပိုင်ဘဝမှာတော့ အခက်အခဲများစွာနဲ့ ကြုံတွေ့ခဲ့ရသူဖြစ်ပါတယ်။ ၁၉၇၄ ခုနှစ်မှာ ကြုံတွေ့ခဲ့ရတဲ့ အကြမ်းဖက်ခံရမှုနဲ့ ၁၉၈၁ ခုနှစ်မှာ သူ့ရဲ့မောင်ဖြစ်သူ လုပ်ကြံသတ်ဖြတ်ခံရမှုတွေကြောင့် စိတ်ပိုင်းဆိုင်ရာ ထိခိုက်မှုတွေ ပြင်းထန်စွာ ခံစားခဲ့ရပြီး၊ စိတ်ကျန်းမာရေးဆေးရုံတွေမှာ အကြိမ်ကြိမ်တက်ရောက်ကုသခဲ့ရတယ်လို့ သိရပါတယ်။