မိုင်းအန္တရာယ်ကြောင့် အမ်းဒေသခံတွေ ဥယျာဉ်ခြံမြေတွေကို မလုပ်ကိုင်နိုင်ဘဲ စွန့်ပစ်ထားရ
သဉ္ဇာနွယ်၊ နိရဉ္စရာ၊ ဇူလိုင် ၁၇/၂၀၂၅
အနောက်ပိုင်းတိုင်းစစ်ဌာနချုပ်(နပခ)တည်ရှိခဲ့ရာ ရခိုင်ပြည်၊ အမ်းမြို့နယ်မှာ မိုင်းအန္တရာယ်ကြောင့် ဒေသခံတွေမှာ ဥယျာဉ်ခြံမြေတွေကို မလုပ်ကိုင်နိုင်ဘဲ စွန့်ပစ်ထားရတယ်လို့ သိရပါတယ်။
အမ်းမြို့နယ်က နပခအပါအဝင် မြို့ပတ်ပတ်လည်၊ တိုက်ပွဲဧရိယာတွေနဲ့ ဆက်စပ်တဲ့ဒေသတွေက ဥယျာဉ်ခြံမြေတွေနဲ့ ကားလမ်းဘေးတွေမှာ စစ်ကောင်စီတပ်က မြေမြှုပ်မိုင်းတွေ အများအပြားထောင်ထားခဲ့တယ်လို့ သိရပါတယ်။
ဒါကြောင့် ဒေသခံတွေ အဓိက လုပ်ကိုင်စားသောက်နေရတဲ့ ဥယျာဉ်ခြံမြေတွေကို လက်ရှိအချိန်ထိ မလုပ်ကိုင်နိုင်ဘဲ စွန့်ပစ်ထားရတယ်လို့ အမ်းမြို့နယ်၊ ကျောက်စကွဲရွာက ဥယျာဉ်ခြံပိုင်ရှင် အမျိုးသားတစ်ယောက်က နိရဉ္စရာကို ပြောပါတယ်။
"တောဟိန်းတောင်မှာစဖြစ်ကတည်းက ဥယျဉ်ခြံတွေပစ်ထားရတာပါ။ ပြီးတော့ မဲတောင်ကနေ စစ်ကောင်စီတပ်တွေ နောက်ဆုတ်ပြီးပြေးလာတော့ ကားလမ်းဘေးတွေ၊ ဟိုဖက်ခြမ်း၊ ဒီဖက်ခြမ်းမှာရှိတဲ့နေရာတွေမှာ အားလုံးထောင်ထားတယ်။ အကုန်လုံးက ဥယျာဉ်ခြံတွေများတယ်။ စစ်ကောင်စီနေခဲ့တဲ့နေရာတွေပါ။ ခြံထဲမှာ မိုင်းရှိ/မရှိသိရတာက ကျွဲနွားတွေ သေနေတယ် မိုင်းနင်းမိပြီး။ အရင်ကဆို လူတွေပါနင်းမိတဲ့ဖြစ်စဉ်တွေရှိတယ်။ အခုဥယျာဉ်ခြံတွေ အကုန်ပစ်ထားရတယ်။ ရာသီပေါ်သီးနှံတွေတောင် ခူးမစားနိုင်ဘူး။ မိုင်းအန္တရာယ်ကြောင့်။ စားဝတ်နေရေးကလည်း ခြံမလုပ်ရတော့ ပိုကျပ်တည်းတယ်" လို့ ပြောပါတယ်။
စစ်ကောင်စီဟာ အမ်း-တပ်တောင်ကျော်လမ်း၊ မအီကျော်လမ်း၊ ရိုးကျော်လမ်း၊ ကဇူးကိုင်းသွားလမ်း၊ အမ်းချောင်း ဒေသပတ်ဝန်းကျင်နဲ့ ဥယျာဉ်ခြံမြေတွေမှာ စစ်ကြောင်းချနေထိုင်ခဲ့ပြီး မြေမြှုပ်မိုင်းတွေ ထောင်ထားခဲ့တာပါ။
အလားတူ သူတို့ နောက်ဆုတ်ထွက်ပြေးစဉ်ကလည်း လမ်းတစ်လျှောက် မြေမြှုပ်မိုင်းတွေ အထပ်ထပ်ထောင်ထားခဲ့တယ်လို့ ဒေသခံတွေက ပြောပါတယ်။
ဒါ့အပြင် ထွက်ပြေးစဉ်က မသယ်နိုင်ခဲ့တဲ့ စက်ကျန်လက်နက်နဲ့ မိုင်းတွေကိုလည်း ဥယျဉ်ခြံမြေတွေမှာ မြှုပ်နှံထားမှုနဲ့ စွန့်ပစ်ခဲ့မှုတွေလည်းရှိခဲ့တယ်လို့ ဥယျာဉ်လုပ်ငန်းလုပ်ကိုင်သူတွေက ပြောပါတယ်။
အမ်းမြို့နယ်အတွင်း ဒီနှစ် ဖေဖော်ဝါရီ၊ မတ်၊ ဧပြီ၊ မေနဲ့ ဇွန်လတွေမှာ မိုင်းနင်းမိလို့ အရပ်သားသေဆုံး၊ ဒဏ်ရာရမှုတွေလည်း ရှိခဲ့ပါတယ်။