ပိုင်းလော့ မလိုဘဲ ပျံနိုင်တဲ့ AI fighter jet ဆွီဒင်စမ်းသပ်
ဆွီဒင်မှာ AI agent နဲ့ မောင်းနိုင်တဲ့ နည်းပညာမြင့်တိုက်လေယာဉ် စမ်းသပ်တာ အောင်မြင်သွားပါတယ်။
တိုက်ပွဲဝင်ဂျက်လေယာဉ်တွေမှာ AI သုံးဖို့ တီထွင်နေတဲ့ ဆွီဒင်ကာကွယ်ရေးပစ္စည်း ထုတ်လုပ်မှုအဖွဲ့ FMV ရဲ့ Project Beyond ထဲက စမ်းသပ်မှုပါ။ Gripen E ဖိုက်တာဂျက်မှာ Centaur ဆိုတဲ့ AI agent တပ်ပြီး ဘောလ်တစ်ပင်လယ်ပေါ် ဖြတ်မောင်းခိုင်းတာပါ။
test flight ကို သုံးခါ စမ်းပါတယ်။ လုံခြုံရေးအတွက် ယာဉ်ကို အချိန်မရွေး ထိန်းချုပ်နိုင်အောင် ပိုင်းလော့တစ်ယောက်တော့ ထည့်ပေးခဲ့ပါတယ်။ မေလ ၂၈ ရက်ကနေ ဇွန် ၃ ရက်အတွင်း ၃ ကြိမ် ပျံသန်းခိုင်းရာမှာ နောက်ဆုံးတစ်ကြိမ်ကို တခြား Gripen D လေယာဉ်တစ်စီးနဲ့ head-to-head တိုက်ပွဲပုံစံ ဖော်ဆောင်ခိုင်းခဲ့ပါတယ်။
အစမ်းပျံသန်းမှုတွေမှာ AI က ထူးချွန်တဲ့ ပိုင်းလော့တစ်ယောက်လို ရှုပ်ထွေးခက်ခဲတဲ့ လေကြောင်းပျံသန်းမှုတွေ လုပ်ပြနိုင်ခဲ့ပြီး ပျံနေတုန်းမှာ ရလာတဲ့ realtime data တွေကို AI စနစ်ထဲ ထည့်ပြီး တွက်ချက်နိုင်ပါတယ်။ တိုက်ပွဲပုံစံပျံသန်းမှုမှာဆို လေယာဉ်မှူးကိုတောင် လက်နက်ပစ်ခတ်ဖို့ အကြံပြုချက်တွေ ပေးခဲ့တာပါ။
ဒါတွေ မစမ်းခင်ကတည်းက Centaur AI ကို ကွန်ပျူတာပုံရိပ်ယောင်အစမ်းပျံသန်းမှု simulated flight hours နာရီ ၅ သိန်းကျော် လေ့ကျင့်ထားတာပါ။ ဒီ AI က နာရီပိုင်းလေးနဲ့ နှစ် ၅၀ အတွေ့အကြုံရှိတဲ့ ပိုင်းလော့တစ်ယောက်ရဲ့ experience ကို ရခဲ့တယ်လို့ ဆိုပါတယ်။
ဒီ AI ကို ထွင်တဲ့ ဂျာမန်ကာကွယ်ရေးကုမ္ပဏီ Helsing ကတော့ ခေတ်သစ်လေကြောင်းတိုက်ပွဲ လိုအပ်ချက်တွေနဲ့အညီ AI ကို လေ့ကျင့်ထားတာလို့ ပြောပါတယ်။ အခု စမ်းသပ်ချက်က ဆွီဒင်လေကြောင်းကုမ္ပဏီ Saab နဲ့ ဂျာမန်ကာကွယ်ရေးဆော့ဖ်ဝဲလ်ကုမ္ပဏီ Helsing တို့ ပူးပေါင်းစမ်းသပ်ချက်ရဲ့ ရလဒ်ပါ။
AI နည်းပညာကတော့ ပညာရေး ၊ ကျန်းမာရေး နဲ့ လုပ်ငန်းခွင်တွေကနေ စစ်ပွဲတွေထဲအထိ ရောက်လာတာ မြင်ရဖို့ ရှိပါတယ်။