#ပြည်တွင်းသတင်း
◼ပျောက်ဆုံးကျောင်းသူ ပြန်ရှာတွေ့ဟုဆိုခြင်းသည် သတင်းမှားသာဖြစ်၊ ရှာဖွေမှုရပ်တန့်သွားအောင် လုပ်ဆောင်ခြင်းသာဖြစ်ဟု မိခင်ဖြစ်သူပြော

ပြီးခဲ့သည့် ဧပြီ ၂၄ ရက်တွင် ရန်ကုန်တိုင်း၊လှည်းကူးမြို့နယ်ရှိ မိုးသောက်ပန်းဘော်ဒါဆောင်တွင် ပညာသင်ကြားနေရင်း မုန့်ထွက်ဝယ်ကာ ပျောက်ဆုံးခဲ့သည့် Grade 12 ကျောင်းသူ မဆုရတနာအောင်အား ပြန်လည်တွေ့ရှိသည်မှာ သတင်းအမှားဖြစ်ကြောင်း မိခင်ဖြစ်သူထံမှသိရသည်။

“သမီး ဆုရတနာအောင်ကိုမူဆယ်မှာတွေ့တယ်ဆိုတာ လုံး၀ မဟုတ်ရပါဘူး။ ဦးစိုင်းနောင်ဆိုတဲ့လူ သတင်းမှားဖြန့်ပြီး online ပေါ်က သမီး ဆုရတနာအောင်အားရှာနေတာတွေ ရပ်တန့်သွားအောင်လုပ်နေတာပါ။ သမီးလေးကို ခုထိပြန်မတွေ့သေးပါဘူး” ဟု မိခင်ဖြစ်သူ ဒေါ်စမ်းစမ်းအေးကပြောသည်။

မဆုရတနာအောင်သည် ရခိုင်ပြည်နယ်၊ ကျောက်ဖြူမြို့တွင် မိဘနှစ်ပါး၊ အစ်ကိုဖြစ်သူတို့နှင့်အတူ နေထိုင်သူဖြစ်ပြီး နှစ်ထပ်ကွမ်းလူရည်ချွန်ကျောင်းသူတစ်ဦးဖြစ်ကြောင်း၊ ယခုနှစ်မတ်လပိုင်းတွင် ပညာသင်ကြားရန် ရန်ကုန်တိုင်း၊ လှည်းကူးမြို့နယ်ရှိ ဘော်ဒါဆောင်တွင်အပ်နှံခဲ့ပြီး ဧပြီ ၂၄ ရက်တွင် မုန့်ထွက်ဝယ်မည်ဟုဆိုကာ ည ၈ နာရီအထိ ပြန်ရောက်လာခြင်းမရှိပဲ ပျောက်ဆုံးခဲ့ခြင်း ဖြစ်ကြောင်း မိခင်ဖြစ်သူကဆိုသည်။

၎င်းပျောက်ဆုံးနေသည်မှာ ယနေ့ (ဇူလိုင် ၉ ရက်)တွင် ရက်ပေါင်း ၇၇ ရက်ရှိပြီဖြစ်ပြီး လက်ရှိအချိန်ထိ ရှာမတွေ့သေးကြောင်း၊ မဆုရတနာအောင်အားတွေ့ရှိလက်ခံထားပါက မိဘများထံအမြန်ဆုံးဆက်သွယ်ပေးရန်နှင့် အမှန်တကယ်တွေ့ရှိစောင့်ရှောက်ထားပါက သက်သေခိုင်မာစွာပြနိုင်လျှင် ငွေကျပ်သိန်း ၂၀၀ ပေးအပ်မည်ဖြစ်ကြောင်း ပျောက်ဆုံးသူ၏ မိခင်ဖြစ်သူကထပ်မံအသိပေးကြေညာထားသည်။

သတင်း - အင်ကြင်း
ဓာတ်ပုံ - ပျောက်ဆုံးနေသည့် Grade 12 ကျောင်းသူမဆုရတနာအောင်