#နိုင်ငံတကာသတင်း
◼ ထရန့်အခွန်များအား ရှောင်းရှားနိုင်ရန် စွမ်းအင် နှင့် ဂျုံ၊ပြောင်းဝယ်ယူရေး အင်ဒိုနီးရှားက အမေရိကန်နှင့် လက်မှတ်ထိုး
အမေရိကန်သမ္မတဒေါ်နယ်ထရန့်ထံမှ အဆိုးဆုံး အခွန်များကို ရှောင်ရှားနိုင်ရန် ဂျကာတာက ပြင်ဆင်ခြင်းအဖြစ် အမေရိကန် ကုန်ပစ္စည်းများကို တိုးမြှင့်ဝယ်ယူသွားရန် အင်ဒိုနီးရှားနိုင်ငံပိုင် ရေနံကုမ္ပဏီ နှင့် စိုက်ပျိုး ရေးကုမ္ပဏီများက သဘောတူညီချက်များ လက်မှတ်ရေးထိုးလိုက်ကြကြောင်း အင်ဒိုနီးရှားစီးပွားရေးဝန်ကြီးက အေအက်ဖ်ပီသတင်းဌာနအား ပြောကြားသည်။
ဝါရှင်တန်နှင့် ကုန်သွယ်ရေးကွာဟမှု ကျဉ်းမြောင်းစေရန် အမေရိကန်၏ စွမ်းအင်၊ စိုက်ပျိုးရေး နှင့် အခြားကုန်ပစ္စည်းများ ပိုမိုဝယ်ယူသွားမည်ဟု အရှေ့တောင်အာရှမှ အကြီးဆုံးစီးပွားရေး နိုင်ငံ အင်ဒိုနီးရှားက ကတိပြုထားပြီး ယခုသီတင်းပတ်စောစောပိုင်းမှာပင် အမေရိကန်ထံမှ ဂျုံများဝယ်ယူရန် အမေရိကန်ဒေါ်လာ ၁ ဒသမ ၂၅ ဘီလီယံ စာချုပ်ကို ချုပ်ဆိုခဲ့သည်။
ဩဂုတ် ၁ ရက်ရောက်ရှိချိန်၌ ၎င်းတို့နှင့် ကုန်သွယ်ရေး သဘောတူစာချုပ်သစ် မချုပ်ဆိုခဲ့ပါက အခြေခံ ၁၀ ရာခိုင်နှုန်းအခွန်အပြင် နောက်ထပ်အခွန် ၃၂ ရာခိုင်နှုန်း ထပ်မံ ချမှတ်သွားမည်ဟု ထရန့်က ဂျကာတာအား ခြိမ်းခြောက်ထားသည်။
အင်ဒိုနီးရှားအစိုးရရေနံကုမ္ပဏီ Pertamina က အမေရိကန် စွမ်းအင်လုပ်ငန်း ထုတ်ကုန်များ ပိုမို ဝယ်ယူသွားရေးအတွက် နားလည်မှု စာချွန်လွှာကို လက်မှတ်ထိုးလိုက်ကြောင်း ကုန် သွယ်ရေး ဆွေးနွေးပွဲ များအ တွက် ဝါရှင်တန်သို့ သွားရောက်ခဲ့သော စီးပွားရေးဝန်ကြီး အယ်လန်ဂါ ဟာတာတို က ပြောကြားသော်လည်း အသေးစိတ်ကို မပြောပေ။
အင်ဒိုနီးရှားစိုက်ပျိုးရေးကုမ္ပဏီ နှစ်ခုဖြစ်သည့် Sorini Agro Asia Corporindo နှင့် FKS Group တို့ကလည်း အမေရိကန်လယ်ယာထွက်ကုန်များ ဝယ်ယူမှုတိုးမြှင့်ရန် နားလည်မှုစာချွှန်လွှာများ ကို လက်မှတ်ထိုးခဲ့သည်။
ယင်း သဘောတူညီချက်များ၏ တန်ကြေးကို မစ္စတာဟာတာတိုက ဖွင့်ဟပြောကြားခြင်းမရှိသော်လည်း အမေရိကန်ကုန်ပစ္စည်းများအား ဝယ်ယူရန် အင်ဒိုနီးရှားကုမ္ပဏီများ က ကန်ဒေါ်လာ ၃၄ ဘီလီယံ သုံးစွဲရန် ပိုင်းဖြတ်ထားကြကြောင်း ပြီးခဲ့သည့် သီတင်းပတ်အတွင်း ပြောကြားခဲ့သည်။
ယမန်နေ့တွင် ဝါရှင်တန်၌ ပြုလုပ်ခဲ့သော အစည်းအဝေးများ၌ အဆိုပါ သဘောတူညီချက်များရရှိခဲ့ခြင်း ဖြစ်ကြောင်း ဝါရှင်တန်မြို့မှ အင်ဒိုနီးရှားသံရုံးက ပြောသည်။
ပြောင်းဝယ်ယူရေးအတွက် နာလည်မှုစာချွှန်လွှာ ရေးထိုးမှုအများအပြား ပါဝင်ခဲ့ကြောင်း အမေရိကန်အစားအသောက်လုပ်ငန်းကြီး Cargill က ထုတ်ပြန်ချက်တစ်ရပ်တွင် အတည်ပြုပြောကြားသည်။
အင်ဒိုနီးရှားနိုင်ငံနှင့် ကုန်သွယ်မှုတွင် ၂၀၂၄ ခုနှစ်က အမေရိကန်ဘက်၌ ကုန်သွယ်ရေးလိုငွေပြမှု ၁၇ ဒသမ ၉ ဘီလီယံ ဖြစ်ပေါ်ခဲ့ကြောင်း နှင့် ၂၀၂၃ ခုနှစ် ကထက် ၅ ဒသမ ၂ ရာခိုင်နှုန်းပိုများလာကြောင်း အမေရိကန်ကုန်သွယ်ရေးကိုယ်စားလှယ်ရုံး အချက်အလက်များက ပြသနေသည်။
သတင်း-ရဲမင်း
ကိုးကား- AFP
