#ယနေ့ထုတ်သတင်းစာ_သတင်း
◼ ထိုင်းရောက်မြန်မာအလုပ်သမားများကို နေထိုင်ခွင့် ခြောက်လ ထပ်တိုးပေးမည်ဖြစ်ကြောင်း အတည်ပြု
ထိုင်းနိုင်ငံတွင်အလုပ်လုပ်ကိုင်ရန် နေထိုင်ခွင့်အထောက်အထား ပန်းရောင်ကတ်ပြုလုပ်ထားသူများနှင့် အလုပ်လုပ်ကိုင်ခွင့်ပါမစ် သက်တမ်းတိုးထားသူ မြန်မာအလုပ်သမားများကို နေထိုင်ခွင့် ခြောက်လ ထပ်တိုးပေးမည်ဖြစ်ကြောင်း သိရသည်။
ထိုင်းအလုပ်သမားဝန်ကြီး (အသစ်) ဖုန်ကဝင်ကျွန်လုန့်လူ ယန်ကစ်က ဇူလိုင် ၈ ရက် နံနက်ပိုင်းတွင် ယင်းသို့အတည်ပြုပြောကြားခဲ့ခြင်းဖြစ်ကြောင်း ထိုင်းသတင်းဌာနများ၌ ဖော်ပြချက်အရ သိရသည်။
ယင်းသို့ သက်တမ်းတိုးပေးရခြင်းမှာ မြန်မာနိုင်ငံဘက်မှ မည်သူ မည်ဝါဖြစ်ကြောင်း သက်သေခံလက်မှတ် (CI) စာအုပ်စသည့် မြန်မာအလုပ်သမားများနှင့် ပတ်သက်သည့် စာရွက်စာတမ်းများအား ဇူလိုင် ၁၅ ရက်တွင်စတင်ဆောင်ရွက်ပေးမည် ဖြစ်ကြောင်း အကြောင်းကြားလာသောကြောင့် CI စာအုပ်ဆောင်ရွက်ရေးလုပ်ငန်းစဉ်နှင့် အလုပ်လုပ်ကိုင်ခွင့်ပါမစ် သက်တမ်းတိုးထားသူ အလုပ်သမားများ အချိန်မီဆောင်ရွက်နိုင်အောင် ခွင့်ပြုပေးခြင်းဖြစ်ကြောင်း သိရသည်။
နေထိုင်ခွင့်အထောက်အထား ပန်းရောင်လက်မှတ် ပြုလုပ်ထားသူ မြန်မာရွှေ့ပြောင်းအလုပ်သမားများ နှင့် အလုပ်လုပ်ကိုင်ခွင့်ပါမစ်သက်တမ်းတိုးထားသူ အလုပ်သမားများမှာ စာရွက်စာတမ်းအထောက်အထားအပြည့်အစုံမရရှိသေးသော်လည်း ၂ဝ၂၆ ခုနှစ် ဖေဖော်ဝါရီ ၁၃ ရက်အထိ နေထိုင်ခွင့်ရရှိမည်ဖြစ်ကြောင်း သိရသည်။
မြန်မာရွှေ့ပြောင်း အလုပ်သမားများအား နေထိုင်ခွင့် ခြောက်လ ထပ်တိုးပေးသည့်ကိစ္စနှင့် ပတ်သက်ပြီး ရာထူးမှနုတ်ထွက်သွားသည့် (ယခင်)အလုပ်သမားဝန်ကြီးက ပြောကြားထားသော်လည်း မြန်မာဘက်မှ ဇူလိုင် ၁၅ ရက်တွင် CI စာအုပ်နှင့် အလုပ်သမားများနှင့် ပတ်သက်သည့် စာရွက်စာတမ်းများဆောင်ရွက်ပေးရန် အဆင်သင့်ဖြစ်နေပြီဖြစ်ကြောင်း ထိုင်းအစိုးရအဖွဲ့ထံ အကြောင်း ကြားလာသည့်အတွက် ထပ်မံအသိပေးခြင်းဖြစ်ကြောင်း သိရသည်။
