#နိုင်ငံတကာသတင်း
◼အစ္စရေး က ယီမင်ဆိပ်ကမ်းသုံးခုကို ဟူသီပစ်မှတ်များအဖြစ် တိုက်ခိုက်
ယီမင်ဆိပ်ကမ်းသုံးခုနှင့် ဓာတ်အားပေးရုံ တစ်ခုတို့အား ဟူသီပစ်မှတ်များအဖြစ် တိုက်ခိုက်ခဲ့ကြောင်း အစ္စရေးစစ်ဘက် က ယနေ့နံနက်အစောပိုင်းတွင်ပြောကြားခဲ့ပြီး ယင်းမှာ တစ်လနီးပါးကာလအတွင်း အစ္စရေးက ယီမင်ကို ပထမဆုံး ပြန်လည်တိုက်ခိုက်မှုဖြစ်ကြောင်း ရိုက်တာသတင်းအရ သိရသည်။
ဟူသီအဖွဲ့က အစ္စရေးအား အကြိမ်ကြိမ်တိုက်ခိုက်နေခြင်းကို လက်တုံ့ပြန်၍ ဟိုဒေးဒါ၊ ရက်စ်အီဆာ နှင့် ဆာလစ်ဆိပ်ကမ်းတို့ကို တိုက်ခိုက်ခြင်းဖြစ်ကြောင်း စစ်ဘက်ကပြောသည်။
ယင်းတိုက်ခိုက်မှုများလုပ်ဆောင်ပြီးနောက် နာရီပိုင်းအကြာတွင် ယီမင်နိုင်ငံမှ ဒုံးကျည်နှစ်စင်း ပစ်လွှတ်ခဲ့ပြီး ၎င်းတို့ကို ကြားဖြတ်ပစ်ချရန် လုပ်ဆောင်ခဲ့ကြောင်း ၊ ရလဒ်ကို စိစစ်နေဆဲဖြစ်ကြောင်း အစ္စရေးစစ်ဘက် က ထပ်လောင်းပြောကြားသည်။
ယင်းဒုံးကျည်များ၏ရိုက်ခတ်မှု သို့မဟုတ် ထိခိုက်ဒဏ်ရာရခြင်းများနှင့် ဆက်စပ်၍ ဖုန်းခေါ်ဆိုမှုမရရှိခဲ့ကြောင်း အစ္စရေးအရေးပေါ်ဌာနက ပြောကြားသည်။
၂၀၂၃ ခုနှစ်အောက်တိုဘာလတွင် ဂါဇာစစ်ပွဲ စတင်ပြီးနောက်ပိုင်း ပါလက်စတိုင်းများနှင့် သွေးစည်းညီညွတ်မှု ပြသခြင်းဖြစ်ကြောင်း ပြောကြားကာ အီရန်တို့နှင့် လက်တွဲထားသော ဟူသီအဖွဲ့က အစ္စရေးနှင့် ပင်လယ်နီမှ သင်္ဘောများအား ပစ်ခတ်ခဲ့ပြီး ကမ္ဘာ့ကုန်သွယ်ရေးအား ထိခိုက်စေခဲ့သည်။
ဟူသီအဖွဲ့က အစ္စရေးသို့ ပစ်လွှတ်ခဲ့သော ဒါဇင်နှင့်ချီသော ဒုံးကျည်များနှင့် ဒရုန်းအများစုမှာ ကြားဖြတ်ပစ်ချခံရ သို့မဟုတ် ပစ်မှတ်အထိ မရောက်ခဲ့ဘဲ အစ္စရေးက လက်တုံ့ပြန်သော တိုက်ခိုက်မှုအများအပြား လုပ်ဆောင်ခဲ့သည်။
ယခုနောက်ဆုံး အစ္စရေး၏ တိုက်ခိုက်မှုတွင် ဟူသီတို့က ပြန်ပေးဆွဲသိမ်းပိုက်ထားပြီး ရက်စ်အီဆာဆိပ်ကမ်းတွင် ကမ်းကပ်ထားသော Galaxy Leader သင်္ဘောလည်း ပါဝင်ခဲ့ကြောင်း စစ်ဘက် က ပြောသည်။
ဟူသီအကြမ်းဖက်အဖွဲ့ က ယင်းသင်္ဘောပေါ်တွင် ရေဒါစနစ်တစ်ခု တပ်ဆင်ထားကာ နိုင်ငံ တကာ ရေ လမ်း ကြောင်းမှ သင်္ဘောများအား ခြေရာခံနေကြောင်း အစ္စရေးစစ်ဘက် က ပြောသည်။
အစ္စရေးတို့၏ တိုက်ခိုက်မှုများအား ၎င်းတို့အဖွဲ့က ပြည်တွင်းမှာပင် ထုတ်လုပ်ထားသော မြေပြင်မှ ဝေဟင်ပစ် ဒုံးကျည်များဖြင့် တန်ပြန်ခဲ့ကြောင်း ဟူသီစစ်ဘက်ပြောခွင့်ရသူ က ပြောကြားသည်။
ပင်လယ်နီပေါ်ရှိ ဟိုဒေးဒါ ဆိပ်ကမ်းမြို့မှ လျှပ်စစ်ဓာတ်အားပေးရုံကို အစ္စရေးက တိုက်ခိုက်ခဲ့ပြီးနောက် မြို့မှာ မှောင်အတိကျသွားခဲ့ကြောင်း ဒေသခံများက ရိုက်တာသတင်းဌာနကို ပြောကြားသည်။
လက်ရှိတွင်ထိခိုက်ဒဏ်ရာရမှုသတင်းများကို မသိရသေးကြောင်း သတင်းက ဆက်လက်ဖော်ပြသည်။
သတင်း-ရဲမင်း
ကိုးကား-Reuters
