#ယနေ့ထုတ်သတင်းစာ_သတင်း
◼ ကန်ချနဘူရီတွင် အထောက်အထားမဲ့ မြန်မာနိုင်ငံသား ၃၆ ဦး ဖမ်းဆီးခံရ
ထိုင်းနိုင်ငံ ကန်ချနဘူရီပြည်နယ် ထောင်ဖာဖွန်မြို့နယ်အတွင်း ဇူလိုင် ၄ ရက် နံနက်ပိုင်းက အထောက်အထားမဲ့ မြန်မာနိုင်ငံသား ၃၆ ဦးကို ထိုင်းအာဏာပိုင်များကဖမ်းဆီးရမိခဲ့ကြောင်း ဒေသတွင်း သတင်းများတွင် ဖော်ပြချက်အရသိရသည်။
ထိုင်းနိုင်ငံ စံခလဘူရီမြို့ဘက်မှ ထောင်ဖာဖွန်မြို့ဘက်သို့ မောင်းနှင်လာသည့် Van ကားတစ်စီးကို ထိုင်းအာဏာပိုင်များက စစ်ဆေးရေးဂိတ်တွင် ရပ်တန့်စစ်ဆေးစဉ် Van ကားမှာ မောင်းနှင်ထွက်ပြေးသွားသည့်အတွက် လိုက်လံဖမ်းဆီးခဲ့ရာ ထောင်ဖာဖွန်မြို့နယ် ဆဟာကွန်နီခွန်ကျေးရွာအနီးတွင် Van ကားအား ထိုင်းအာဏာပိုင်များက ဖမ်းဆီးမိခဲ့ခြင်းဖြစ်ကြောင်း သိရသည်။
Van ကားပေါ်တွင် ထိုင်းလူမျိုးယာဉ်မောင်းဖြစ်သူ အမျိုးသားတစ်ဦးနှင့်အတူ မည်သည့်စာရွက်စာတမ်းအထောက်အထားမှ မပါသော မြန်မာနိုင်ငံသား ၃၆ ဦးကို ဖမ်းဆီးထိန်းသိမ်းနိုင်ခဲ့ကြောင်း သိရသည်။
၎င်းတို့မှာမြန်မာနိုင်ငံ ရန်ကုန်မှ ဘုရားသုံးဆူမြို့သို့ ရောက်ရှိလာခဲ့ ပြီးနောက် ထိုင်း - မြန်မာနယ်စပ်ကို တရားမဝင် ဖြတ်ကျော်ကာ ထိုင်းနိုင်ငံအတွင်းသို့ ဝင်ရောက်လာခဲ့သူများဖြစ်ပြီး ထိုအထောက်အထားမဲ့ မြန်မာနိုင်ငံသားများအား ခေါ်ယူသယ်ဆောင်ရန်အတွက် Van ကားမောင်းနှင်သူ ထိုင်းအမျိုးသားအား ဘတ်ငွေ ၄၆၀၀ ဖြင့် ငှားရမ်းခဲ့ခြင်းဖြစ်ကြောင်း စစ်ဆေး ပေါ်ပေါက်ခဲ့ကြောင်း သိရသည်။
ဓာတ်ပုံ - Thai News