Ballerina ကိုညကကြည့်မိတော့ Action ပိုင်းတွေမှာ တော်တော်လေးမိုက်တာတွေ့ရပါတယ်။
ဒီဇာတ်လမ်းက John Wick: Chapter 3 Parabellum နဲ့ Chapter 4 ကြားကာလမှာ ဖြစ်ပျက်သွားတဲ့ ဇာတ်လမ်းတစ်ခုပါ။
ဇာတ်လမ်းက Eve Macarro ဆိုတဲ့ ကလေးဟာ သူ့အဖေ သတ်ဖြတ်ခံရပြီးနောက် Ruska Roma ဆိုတဲ့ လူသတ်သမားတွေ လေ့ကျင့်ပေးတဲ့ အဖွဲ့ထဲ ဝင်ရောက်ပြီး သူ့အဖေအတွက် လက်စားချေဖို့ ကြိုးစားပါတယ်။ ဒီဇာတ်ကားမှာ Keanu Reeves, Ian McShane, Anjelica Huston နဲ့ Lance Reddick တို့လည်း ပါဝင်ထားပါတယ်။
ဒီဇာတ်လမ်း အားသာချက်က အက်ရှင်ခန်းတွေလို့ပြောရမယ်။ ဒီရုပ်ရှင်ဟာ John Wick ရဲ့ ထုံးစံအတိုင်း သေနတ်ပစ်ခန်းတွေ၊ ဓားသုံးတိုက်ခိုက်တာတွေ၊ ထိုးတာ ကျိတ်တာတွေကို ရှယ်သုံးထားပါတယ်။ အထူးသဖြင့် ဒုတိယပိုင်းမှာပါလာတဲ့ မီးသေနတ်နဲ့ တိုက်ခိုက်တဲ့ခန်းတွေ၊ လက်ပစ်ဗုံးတွေ သုံးထားတဲ့ ခန်းတွေက တော်တော်လေးမိုက်ပါတယ်။
ဗုံးတွေကိုလည်ပင်းမှာပတ်ပြီး ခွဲချလိုက်တဲ့အခန်းဆို လုံးဝ ကျွတ်ဆင်ကြီးပါ။ မီးသေနတ်နဲ့ ရမ်းနေတာကြီးကလည်း အထာကျတယ်လို့တော့ပြောလို့ရပါတယ်။
နောက်တစ်ချက်က Ballerina မှာ John Wick တုန်းကမသိလိုက်ရတဲ့ အဖွဲ့အစည်းတွေနဲ့ ဒီ အဖွဲ့အစည်းတွေရဲ့ နောက်ကွယ်က အကြောင်းတွေကို အတွင်းကျကျပြသွားခဲ့ပါတယ်။
အားနည်းချက်ကတော့ ဇာတ်လမ်းဟာ အရမ်းကိုရိုးရှင်းပါတယ်။ Eve ရဲ့ အဖေအတွက် လက်စားချေတဲ့ ဇာတ်လမ်းဟာ John Wick ရဲ့ ခွေးလေးအတွက် လက်စားချေတဲ့ ဇာတ်လမ်းနဲ့ ဆင်တူပြီး ဆန်းသစ်မှု သိပ်မရှိဘူးလို့မြင်မိပါတယ်။
နောက်ပြီး ဇာတ်လမ်းက John Wick လောင်းရိပ်အောက်က မလွတ်တာကိုလည်းပြသွားပြီး John Wick ပါမှ ပြီးမယ့် ပုံလိုမျိုးဖန်တီးထားပါတယ်။ ပြောရရင်တော့ ကိုယ်ပိုင်ဟန်မရှိတဲ့ ဇာတ်လမ်းလို့ပြောရပါမယ်။
ဇာတ်လမ်းရဲ့ ပထမပိုင်းက အရမ််းကိုနှေးလွန်းတာကလည်း ပြောစရာပါပဲ။ Eve ရဲ့ နောက်ခံဇာတ်လမ်း တည်ဆောက်မှုနဲ့ Ruska Roma ရဲ့ လေ့ကျင့်ရေးပိုင်းတွေက အက်ရှင်ခန်းတွေထက် ပိုကြာရှည်နေတာကြောင့် နည်းနည်း စိတ်မရှည်ချင်ဘူးလို့ခံစားရတယ်။
နောက်ပြီး Norman Reedus ရဲ့ Daniel Pine ကလည်း ဒီဇာတ်လမ်းမှာ ပါတယ်သာ ပြောထားတာ တော်တော်လေးပုတ်နေပါတယ်။
ဆိုတော့ ဇာတ်လမ်းက Action ပိုင်းတွေကြီးပဲသီးသန့်ကြိုက်တဲ့သူဆိုရင်တော့ ကောင်းမှာပါ။ ဒါပေမယ့် ဇာတ်လမ်းကို ခံစားတဲ့သူဆိုရင်တော့ ရိုးရှင်းတဲ့ဇာတ်လမ်းမှန်း ခံစားမိမှာပါ။
Rating အနေနဲ့ သတ်မှတ်ရမယ်ဆိုရင်တော့ 6.8/10 လောက်တော့ ပေးရပါမယ်။ တခြားကတော့ သိပ်ပြီး အပစ်ပြောစရာမရှိသလို စိတ်ဝင်စားဖို့ကောင်းလို့ မကြည့်ရသေးရင် ကြည့်ဖို့ အကြံပေးပါတယ်။
