#အာလူး စားဖို့မမေ့နဲ့နော်
အသက်ကြီးငယ်မရွေး စားသုံးဖို့သင့်လျော်တဲ့ အာလူးမှာအာဟာရဓာတ်ကြွယ်၀စွာပါ၀င်ပြီး အစာကြေလွယ်စေတဲ့အပြင် ဆီးရွှင်စေခြင်း၊ တက်ခြင်းနဲ့ဆိုင်တဲ့ရောဂါများကို ပျောက်ကင်းစေနိုင်တဲ့ အစွမ်းအာနိသင်တွေပါရှိပါတယ်။ ဒါကြောင့် ကျန်းမာရေးအတွက် အခြားအကျိုးကျေးဇူးများစွာကိုလည်း ရရှိစေနိုင်တဲ့အာလူးအကြောင်းကို ရေးသားဖော်ပြလိုက်ပါတယ်။
- အာလူးမှာသွေးနီဥများစွာထုတ်လုပ်ပေးနိုင်တဲ့ သံဓာတ်နဲ့ ဖောလစ်အက်ဆစ်တို့ ပါ၀င်တာကြောင့် သွေးအားကောင်းစေပါတယ်။
- အာလူးဟာရောင်ရမ်းမှုတွေကို သက်သာစေတဲ့အကောင်းဆုံး အစားအစာဖြစ်ပါတယ်။ အာလူးကိုအခွံမနွှာဘဲ ပါးပါးလှီးကာ ပေါင်းခံရည်ထဲမှာစိမ်ပြီး နံနက်တိုင်း အစာမစားမီသောက်ပေးခြင်းဖြင့် ရောင်ရမ်းမှုကို သက်သာစေနိုင်ပါတယ်။
- အာလူးအစိမ်းကိုပါးပါးလှီးကာ အရေပြားပေါ်မှာကပ်ပေးခြင်းဖြင့် အရေပြားနဲ့သက်ဆိုင်တဲ့ ရောဂါတွေဖြစ်တဲ့ အနီကွက်အဖုအပိမ့်များထခြင်း၊ အရေပြားနီမြန်းခြင်း၊ ယားယံခြင်းနဲ့ အသားရေခြောက်သွေ့ခြင်းမှ ကင်းေ၀းစေပါတယ်။
- အာလူးပြုတ်စားပေးခြင်းဖြင့် ၀မ်းချုပ်ခြင်းမရှိစေနိုင်တဲ့အပြင် လိပ်ခေါင်းရောဂါဖြစ်ခြင်းမှလည်း ကာကွယ်ပေးနိုင်ပါတယ်။
- အာလူးဖျော်ရည်ကိုသောက်ပေးခြင်းဖြင့် အစာအိမ်ရောင်နာ၊ အူမရောင်နာ၊ အစာအိမ်ကင်ဆာနဲ့ အူမကြီးကင်ဆာတို့ကို သက်သာစေနိုင်ပါတယ်။ ယင်းဖျော်ရည်ကိုတစ်နေ့လျှင် 3 ကြိမ် (သို့) 4 ကြိမ်လောက် ရေဖန်ခွက်ထက်၀က်ခန့် အနည်းဆုံးတစ်လကြာသောက်ပေးသင့်ပါတယ်။
- အာလူးမှာပိုတက်ဆီယမ်ဓာတ်ပါရှိတာကြောင့် သွေးဖိအားကိုပုံမှန်ဖြစ်စေပြီး သွေးပေါင်တက်ခြင်းမှ ကာကွယ်ပေးပါတယ်။
- အာလူးဖျော်ရည်ကိုသောက်ပေးခြင်းဖြင့် အရိုးအဆစ်ရောင်ရမ်းနာ၊ ဂေါက်ရောဂါနဲ့ ခေါင်းကိုက်ခြင်းကိုလည်း သက်သာပျောက်ကင်းစေနိုင်ပါတယ်။
- အာလူးဖျော်ရည်ဟာ Autoimmune ရောဂါတစ်မျိုးဖြစ်တဲ့ အဆစ်အမြစ်ရောင်ရမ်းခြင်း (Rheumatoid Arthritis) ကိုသက်သာစေပြီး ခန္ဓာကိုယ်တွင်းရှိ အဆိပ်အတောက်ကိုလည်း ပြေစေနိုင်ပါတယ်။ အာလူးအစိမ်းကိုဖျော်ရည်လုပ်ပြီး နေ့စဉ်အစာမစားမီ လက်ဖက်ရည်ဇွန်း 2 ဇွန်း သောက်ပေးသင့်ပါတယ်။
- အာလူးကိုပါးပါးလှီးကာ မျက်လုံးပေါ်မှာကပ်ပေးခြင်းဖြင့် ပင်ပန်းနွမ်းလျမှုကြောင့်ဖြစ်ပေါ်စေတဲ့ မျက်ကွင်းညိုခြင်းကို ပျောက်ကင်းစေနိုင်ပါတယ်။
- များသောအားဖြင့် အာလူးကိုကိုယ်အလေးချိန်တက်စေနိုင်တဲ့ အစားအစာလို့ မှတ်ယူထားကြပါတယ်။ တကယ်တော့ အာလူးကြော်စားသုံးတဲ့အခါ ၎င်းမှာပါ၀င်တဲ့ အကြော်ဆီတွေကြောင့် ကိုယ်အလေးချိန် တက်တာဖြစ်ပြီး အာလူးအစိမ်းမှာ ကယ်လိုရီနည်းပါးစွာပါ၀င်တာကြောင့် ကိုယ်အလေးချိန်လျှော့ချလိုသူတွေ အတွက် အာလူးကိုပြုတ်ပြီးဒီအတိုင်းပဲဖြစ်ဖြစ်၊ သုတ်စားတာပဲဖြစ်ဖြစ် စားသုံးသင့်ပါတယ်။
♦ ဈေးသွားလို့ အာလူး၀ယ်တော့မယ်ဆိုရင်
အစို့အညှောက်ပေါက်နေပြီး စိမ်းဖန့်ဖန့်ဝါကြင့်ကြင့်ဖြစ်နေတဲ့အာလူးတွေကို မ၀ယ်သင့်ဘဲ အာဟာရဓာတ်ကြွယ်၀စွာပါ၀င်တဲ့ အာလူးသေးသေးလေးတွေကိုသာ ရွေးချယ်၀ယ်ယူသင့်ပါတယ်။
♦ အာလူးကိုသိုလှောင်သိမ်းဆည်းတဲ့အခါ
အာလူးမှာပါ၀င်တဲ့ရေဓာတ်တွေ မကုန်ဆုံးစေဖို့နဲ့ အစို့အညှောက်ထွက်ခြင်း မဖြစ်စေဖို့ အေးမြပြီးခြောက်သွေ့တဲ့နေရာမှာ သိုလှောင်ပါ။ အအေးခန်းမှာသိုလှောင်ပါက အာလူးမှာပါ၀င်တဲ့ ကစီဓာတ်ဟာသကြားဓာတ်အဖြစ်သို့ အာနိသင်ပြောင်းနိုင်တာကြောင့် ရေခဲသေတ္တာထဲမှာ သိုလှောင်ခြင်းမပြုပါနဲ့။
♦ အခြားသီးနှံနဲ့အတူသိုလှောင်တဲ့အခါ
အာလူးနဲ့ကြက်သွန်နီကိုတစ်နေရာတည်းမှာ သိုလှောင်ခြင်းမှရှောင်ကျဉ်ပါ။ အညှောင့်ထွက်နေပြီးပုပ်နေတဲ့ အာလူးများကိုဖယ်ရှားပေးခြင်းဖြင့် အရည်အသွေးကောင်းမွန်တဲ့ အာလူးတွေကိုထိန်းသိမ်းပါ။
♦ အာလူးနဲ့ပတ်သက်၍ ဆောင်ရန်၊ ရှောင်ရန်အချက်
အာလူးမှာ ပိုးသတ်ဆေးအကြွင်းအကျန်တွေပါရှိနိုင်တာကြောင့် ဆားရည် (သို့) ပန်းသီးရှာလကာရည် (Apple Cider Vinegar) တို့နဲ့ဆေးကြောပါ။ အညှောင့်ထွက်နေတဲ့ အစိမ်းရောင်ပြောင်းနေပြီဖြစ်တဲ့ အာလူးတွေဟာ ပျို့အန်ခြင်း၊ ၀မ်းပျက်၀မ်းလျှောခြင်း၊ ဗိုက်အောင့်ခြင်း၊ ခေါင်းကိုက်ခြင်း၊ မူးေ၀ခြင်း စတဲ့ရောဂါများကို ဖြစ်စေနိုင်တာကြောင့် ယင်းကဲ့သို့အာလူးမျိုးကို စားသုံးခြင်းမှရှောင်ကျဉ်ပါ။