ဆေးဖက်ဝင် #ဆီမီးတောက်
အဓိကဆေးဖက်ဝင်ပုံ
ပိုးကြောင့်ဖြစ်သောရောဂါ၊ ထိခိုက်ဒဏ်ရာ ရောင်ရမ်းနာ၊ ညောင်းကျရောဂါ၊ သားမဖွားနိုင်သော ရောဂါ၊ နားကိုက်၊ နားနာ၊ နားတွင်းတွင် မှိုစွဲခြင်း၊ သံကောင်တုတ်ကောင်ရောဂါတို့ ကုသရာတွင် ဆေးဖက်ဝင် အသုံးပြုသည်။
ဆေးကျမ်းများအဆို
ဆီမီးတောက်၏ အထူးသဖြင့် ဥ၏ အရသာနှင့် အကျိုးသွားမှာ ဖန်၏။ ခါး၏။ စပ်၏။ ပူ၏။ ကြေကျက်ပြီးနောက် ဝိပါက၌ စပ်၏။
ဂုဏ်နှင့်စွမ်းရည်မှာ ကြေကျက်လွယ်၏။ ထက်မြက်၏။ သည်းခြေကိုဖြစ်စေ၏။ လေသလိပ်ကိုနိုင်၏။ ဆီးကို ရွှင်စေ၏။ အနာပေါက် ပိုးရောဂါ ဆီးအိမ်နာကျင်ကိုက်ခဲခြင်း၊ အဆိပ်၊ နူနာ၊ မြင်းသရိုက်၊ ဖောရောင်၊ မြစ်ခြောက်ထိုးအောင့်ခြင်းတို့၌ အကျိုးပြု၏။ ကိုယ်ဝန်ကို ပျက်စေတတ်သည်။ ဆီမီးတောက်သည် အဆိပ်ဆေးဖြစ်သဖြင့် သမားကိုင်ဆေးဖြစ်သည်။ လိမ္မာစွာသုံးစွဲရမည်။
ဆေးဖက်ဝင်အသုံးပြုပုံ
၁။ ဆီးမီးတောက်အရွက်ကို နေလှန်းအမှုန့်ပြု၍ ထန်းလျက်နှင့်ရောစားသော် ဝမ်းတွင်းရှိ တုတ်ကောင်၊ သန်ကောင်များ ကျဆင်းလာစေနိုင်သည်။
၂။ အရွက်အမှုန့်ကို အနာပေါ်တွင် ဖြူးပေးလျှင် ပိုးများသေ၍ အနာကျက်မြန်စေသည်။
၃။ အရွက်အမှုန့်ကို သံပရာရည်နှင့် သို့မဟုတ် မုန်ညင်းဆီနှင့်ရောပြီး နားကျပ်ပေးလျှင် နားကိုက်၊ နား ပြည်ယိုရောဂါများ ပျောက်ကင်းစေနိုင်သည်။
၄။ ရှေးက ကျေးလက်တောရွာများတွင် သားမဖွားနိုင်ပါက ဆီမီးတောက်ဥကိုသွေးပြီး ချက်တိုင်နှင့် ဝမ်းဗိုက်တွင် လိမ်းပေးပါက လွယ်ကူစွာ သားဖွားစေနိုင်သည်။
၅။ ထိခိုက်ဒဏ်ရာကြောင့် ရောင်ကိုင်းခဲ့လျှင် ဆီမီးတောက်ဥကို သွေးလိမ်းပေးပါက အရောင်ကျစေနိုင်သည်။
၆။ သားဖွားပြီးနောက် အချင်းမကျခဲ့သော် သားအိမ်နေရာတွင် ဆီမီးတောက်ဥကို သွေးလိမ်းပေးပါက အချင်းကျစေနိုင်သည်။
၇။ ဆီးတွင်ပြည်ပါသောရောဂါ (ပြည်တုလာသရောရောဂါ) ဖြစ်လျှင် ဆီမီးတောက်ဥကို ရေနှင့်စိမ်ပြီး သောက်ပါက သက်သာပျောက်ကင်းစေနိုင်သည်။
၈။ ကိုယ်ရေဝါရောဂါ၊ အသားဝါရောဂါဖြစ်လျှင် ဆီမီးတောက်ဥအမှုန့် ရွေးကြီးစေ့ခန့်ကို ဒိန်ချဉ်ရည်တစ်ဖန်ခွက်ဖြင့် ရောစပ်သောက်သုံးပါက သက်သာပျောက်ကင်းစေနိုင်သည်။
Crdကြည်လွင်မြင့် မုဒြာ