ဂျပန်တောင်ပိုင်းမှာ နှစ်ပတ်အတွင်း ငလျင်အကြိမ်ရေ ၉၀၀ ကျော်လှုပ်လို့ ဒေသခံတွေ ထိတ်လန့်တုန်လှုပ်နေ
တိုကျို၊ ဇူလိုင်-၃-၂၀၂၅
မျိုးဆက်(VOM)
ဂျပန်နိုင်ငံတောင်ပိုင်း ဝေးလံခေါင်သီပြီး လူဦးရေကျဲပါးတဲ့ ကျွန်းစုတခုမှာ နှစ်ပတ်အတွင်း ငလျင်အကြိမ်ရေ ၉၀၀ ကျော်လှုပ်ခတ်မှုကြောင့် ဒေသခံတွေဟာ ထိတ်လန့်တုန်လှုပ်နေကြပါတယ်။
ဇွန် ၂၁ ရက်ကစပြီး တိုကာယာကျွန်းစုတဝိုက် ပင်လယ်ပြင်မှာ ရစ်ချ်တာစကေး ၅ ဒဿမ ၅ အဆင့်ရှိ ငလျင်အပါအဝင် ငလျင်လှုပ်ခတ်မှု အကြိမ်ရေမြင့်မားလာတဲ့အပေါ် အာဏာပိုင်တွေက သတိပေးချက် ထုတ်ပြန်ထားပါတယ်။
ငလျင်ကြောင့် ထိခိုက်ပျက်စီးမှုနဲ့ ဆူနာမီဖြစ်ပေါ်ခြင်းမရှိသေးပေမယ့် လိုအပ်ပါက ဘေးလွတ်ရာရွေ့ပြောင်းကြဖို့ အာဏာပိုင်တွေက သတိပေးထားပါတယ်။ “ အိပ်ပျော်သွားမှာတောင် ကြောက်နေတယ်။ ငလျင်က အမြဲတမ်း လှုပ်နေသလိုပဲ ”လို့ ဒေသခံတယောက်က ပြောပါတယ်။
အထူးသဖြင့် ညဘက်တွေမှာ ငလျင်မလှုပ်ခင် သမုဒ္ဒရာထဲက ထူးဆန်းတဲ့ အသံတွေပါ ကြားရတယ်လို့ ပင်လယ်ကမ်းစပ်မှာနေတဲ့ အသက် ၅၄ နှစ်အရွယ် အမျိုးသားကပြောပါတယ်။ လူတိုင်း စိုးရိမ်မှုတွေနဲ့အတူ နွမ်းနယ်နေကြပြီလို့ သူက ဆိုပါတယ်။
တိုကာရာဒေသမှာ ယခင်ကလည်း ငလျင်အကြိမ်ရေအများအပြား လှု်ပခတ်ခဲ့ဖူးပေမယ့် လက်ရှိငလျင်လှုပ်ခတ်တဲ့ အကြိမ်ရေဟာ ယခင်နဲ့မတူဘဲ ပုံမှန်မဟုတ်ဘူးလို့ ဒေသတွင်း သတင်းဌာနတွေက ဖော်ပြထားပါတယ်။ ဂျပန်နိုင်ငံဟာ ကမ္ဘာပေါ်မှာ ငလျင်လှုပ်ခတ်မှု အများဆုံးနိုင်ငံတနို်ငငံဖြစ်ပါတယ်။
ပစိဖိတ်ငလျင်ကြောပေါ်မှာ တည်ရှိတဲ့ ဂျပန်နိုင်ငံဟာ နှစ်စဉ် ငလျင်ပေါင်း ၁၅၀၀ ကို ကြုံတွေ့ရလေ့ရှိပါတယ်။ တိုကာယာကျွန်းစုမှာ ကျွန်းပေါင်း ၁၂ ကျွန်းရှိပြီး ခုနှစ်ကျွန်းမှာတော့ လူ ၇၀၀ နေထိုင်ကြပါတယ်။ ဆေးရုံဆေးခန်း ရှားပါးပြီး အနီးဆုံးကတော့ ခြောက်နာရီကြာ သွားရတဲ့ စီရင်စုမြို့တော် ကာ ဂိုရှီးမားက အနီးဆုံးဖြစ်ပါတယ်။
Ref:BBC