အငြင်းပွားဖွယ် နယ်စပ်ကို ထိုင်းနဲ့ ကမ္ဘောဒီးယားခေါင်းဆောင်တွေ သွားရောက်
ဘန်ကောက်၊ ဇွန်-၂၆-၂၀၂၅
မျိုးဆက်(VOM)
ထိုင်းနဲ့ ကမ္ဘောဒီးယားတို့အကြား နယ်မြေအငြင်းပွားမှုဖြစ်ပွားနေတဲ့ နေရာတွေကို ထိုင်းဝန်ကြီးချုပ် ပေတုန်တန် ရှင်နာဝပ်ထရနာနဲ့ ကမ္ဘောဒီးယားဝန်ကြီးချုပ်ဟောင်း ဟွန်ဆန်တို့ ဒီကနေ့မှာ သွားရောက်ခဲ့ကြပါတယ်။
နယ်စပ်ပြဿနာကြောင့် ခဏတာ တိုက်ပွဲအတွင်း ကမ္ဘောဒီးယားစစ်သားတယောက်သေဆုံးခဲ့ပြီး နှစ်နိုင်ငံအကြား တင်းမာမှုတွေ မြင့်တက်ခဲ့ပြီး ထိုင်းအစိုးရဟာ လည်း နိုင်ငံရေးဖိအားတွေကြောင့် ပြိုလဲလုနီးပါး ဖြစ်နေချိန်မှာ နှစ်နိုင်ငံခေါင်းဆောင်တွေ နယ်စပ်ဒေသကို သွားရောက်ခဲ့တာပါ။
နယ်စပ်ပြဿနာနောက်ဆက်တွဲအနေနဲ့ တပ်ဖွဲ့ဝင်တွေ အများအပြား စေလွှတ်ဖြန့်ကြက်တာ၊ ၈၁၇ ကီလိုမီတာရှိ နယ်စပ်မှာ နယ်စပ်ဖြတ်ကျော်ဂိတ်တွေကို ပိတ်လိုက်တာအပြင် နှစ်နိုင်ငံ ကုန်စည်စီးဆင်းမှုတွေကိုပါ ကန့်သတ်မှုတွေ ချမှတ်ခဲ့ကြပါတယ်။
ထိုင်းစီးပွားရေးကို ပြန်လည်နာလန်ထူအောင် လုပ်နေရတဲ့ ထိုင်းဝန်ကြီးချုပ် ပေတုန်တန်အစိုးအရအတွက် ဒီကိစ္စဟာ မီးလောင်ရာလေ့ပင့်ဖြစ်စေခဲ့ပြီး လက်ရှိမှာလည်း ဆန္ဒပြပွဲတွေနဲ့ ရင်ဆိုင်နေရကာ ညွှန့်ပေါ့င်းအစိုးရအဖွဲ့ကို ထိန်းသိမ်းဖို့ ရုန်းကန်နေရပါတယ်။
ကမ္ဘောဒီးယားနိုင်ငံ ပွိုင်ပက်နဲ့ဆန့်ကျင်ဘက်ရှိ ထိုင်းနယ်စပ် ဆာကေအိုခရိုင် အရန်ယာပရာပရာပက် ကို ထိုင်းဝန်ကြီးချုပ် ဒီကနေ့မနက်က ရောက်ရှိချိန်မှာတော့ ထောက်ခံသူတွေက ကြိုဆိုခဲ့ကြပါတယ်။ ထိုင်းဝန်ကြီးချုပ်ကတော့ ဒီခရးစဉ်ရည်ရွယ်ချက်ဟာ နိုင်ငံဖြတ်ကျော် ရာဇဝတ်မှုနှိမ်နင်းရေး၊ စစ်အင်အားနဲ့ နယ်စပ်ကန့်သတ်ချက်တွေရဲ့ အကျိုးသက်ရောက်မှုတွေကို သိရှိအကဲဖြတ်ဖို့ ဖြစ်တယ်လို့ ပြောပါတယ်။
ထိုင်းနိုင်ငံဟာ ကမ္ဘောဒီးယားထဲကို ကုန်းလမ်းဖြတ်ကျော်ဝင်ရောက်လာတဲ့ မော်တော်ယာဉ်၊ ခရီးသွားတွေနဲ့ ကုန်တွေအားလုံးကို ဖြတ်သန်းခွင့် ပိတ်ပင်ထားပါတယ်။ လက်ရှိမူဝါဒတွေရဲ့ အကျိုးသက်ရောက်မှုနဲ့ အစိုးရက ဘာကူညီနိုင်မလဲဆိုတာ သိလိုတဲ့အတွက် လာရောက်ခဲ့တာလို့ ထိုင်းဝန်ကြီးချုပ်က ပြော ပါတယ်။
တချိန်တည်းမှာပဲ ကမ္ဘောဒီးယားဝန်ကြီးချုပ်ဟောင်း ဟွန်ဆန်ဟာ ဒီကနေ့မနက်ပိုင်းမှာ ထိုင်းနယ်စပ် ဆူရင်ခရိုင်နဲ့ ဆန့်ကျင်ဘက် ကမ္ဘောဒီးယား အိုဒါမီချေးပြည်နယ်ကို စစ်သားတွေနဲ့အတူ သွားရောက်ခဲ့ပါတယ်။ မကြားသေးမီက သူနဲ့ ထိုင်းဝန်ကြီးချုပ်တို့ရဲ့ တယ်လီဖုန်းဆက်သွယ်တဲ့ အသံဖိုင် ပေါက်ကြားမှုကြောင့် နှစ်နိုင်ငံ တင်းမာမှုတွေ ပိုဆိုးခဲ့ပါတယ်။
အသံဖိုင်ပေါက်ကြားမှုကြောင့် ထိုင်းနိုင်ငံရေးမှာလည်း မရေရာမှုတွေ တိုးပွားစေခဲ့ပြီး ထိုင်းညွှန့်ပေါင်း အစိုးရရဲ့ အဓိကမဟာမိတ် Bhumjaithai ပါတီဟာ ညွှန့်ပေါင်းအစိုးရကနေ နုတ်ထွက်ခဲ့ပါတယ်။
Ref:CNA