လူသားတွေဟာ ရေ ကို အခဲ ၊ အရည် ၊ ရေငွေ့ ဆိုတဲ့ ပုံစံ (၃) မျိုးနဲ့ပဲ တည်ရှိနိုင်တယ် ဆိုပြီး သိထားတာ ဖြစ်ပါတယ်။ ဒါပေမဲ့ ဒီအယူအဆကို ပိုပြီး တိုးတက်လာစေတဲ့ တွေ့ရှိမှုကို နပ္ပကျွန်း နဲ့ ယူရေးနပ်စ် တို့မှာ ရှာဖွေနိုင်ခဲ့ပါပြီ။ အဲ့ဒီ စတုတ္ထမြောက် တည်ရှိမှုပုံစံကို “ဆူပါအိုင်ယွန်းနစ်ခဲရည်” လို့ အမည်ပေးထားပါတယ်။
ရေဟာ လွန်ကဲတဲ့ အပူချိန်နဲ့ ဖိအားအောက်ရောက်ရင် အခဲ အခြေအနေမှာရော အရည် အခြေအနေမှာပါ တပြိုင်နက် တည်နေတဲ့ ပုံစံပါ။ ဒီနေရာမှာ “တပြိုင်နက်” ဆိုတဲ့စကားလုံးက သိပ်အရေးကြီးပါတယ်။ ရေက အငွေ့ပျံနေဆဲ အခြေအနေမျိုး၊ ရေကနေ ရေခဲဖြစ်နေဆဲ အခြေအနေမျိုး၊ ရေခဲ အရည်ပျော်နေဆဲ အခြေအနေမျိုးကို ဆိုလိုတာ မဟုတ်ပါဘူး။ ဆူပါအိုင်ယွန်းနစ်ခဲရည် ဆိုတာ Liquid Hydrogen နဲ့ Crystallised Oxygen အတူတကွ တည်ရှိနေတာမျိုးပါ။
Hydrogen နဲ့ Oxygen ပါတဲ့ H2O molecules ရဲ့
အောက်ဆီဂျင် အက်တမ်တွေဟာ ပုံဆောင်ခဲအဖြစ်ကို ရောက်သွားပြီး ဟိုက်ဒြိုဂျင် အက်တမ်တွေကတော့ အရည်သဘာဝကိုယူပြီး free-flow state ဖြစ်သွားပါတယ်။ ဒီ အခြေအနေမှာ ရေ ဟာ အနက်ရောင်ဖြစ်နေပြီး၊ သိပ်သည်းဆ အလွန်မြင့်ကာ တခြား သတ္တုတွေလိုပဲ လျှပ်စစ်စီးနိုင်ဦးမှာ ဖြစ်ပါတယ်။
ဒီတွေ့ရှိမှုကနေ ရေခဲဖုံးလွှမ်းတဲ့ ဂြိုဟ်တွေရဲ့ ထူးဆန်းရှုပ်ထွေးတဲ့ လျှပ်စစ်သံလိုက်စက်ကွင်းတွေအကြောင်းကို ကနဦး လေ့လာနိုင်မှာဖြစ်ပြီး ၊ ရေနဲ့ ပတ်သက်လို့ လက်ခံထားတဲ့ ရူပဗေဒ သဘောတရားတွေကိုလည်း ပြန်လည်သုံးသပ်ရတော့မှာ ဖြစ်ပါတယ်။
ရေဟာ အဲ့ဒီလို အင်မတန် ပူပြင်းပြီး ဖိအားများပြားတဲ့ ပတ်ဝန်းကျင် အခြေအနေမှာ ဒီပုံစံနဲ့ တည်ရှိနေနိုင်သေးတယ်ဆိုရင် တခြား မထင်မှတ်ထားတဲ့ အခြေအနေမှာရော ဘယ်လိုပုံစံနဲ့ ရှိနေနိုင်ဦးမလဲ။ လူသားတွေ သိထားသမျှ သိပ္ပံပညာ၊ ရူပဗေဒ သဘောတရားနဲ့ တခြားတွေ့ရှိချက်တွေဟာ အလွန်ကျယ်ပြောတဲ့ စကြဝဠာကြီးထဲက ထူးခြားဆန်းကြယ်မှုတွေရဲ့ ဘယ်နှရာခိုင်နှုန်းလောက်ပဲ ရှိနေသေးတာလဲ။ လူတွေနေတဲ့ နေအဖွဲ့အစည်းမှာတင် စူးစမ်းလေ့လာစရာ မကုန်နိုင်အောင်ကို များပြားလွန်းလျက် ရှိနေပါသေးတယ်။