ကြယ်တာရာအသစ်တစ်ခုပေါ်ထွန်းလာခြင်း
ညမိုးကောင်းကင်ရဲ့ လှပထွန်းလင်းတဲ့ ကြယ်တာရာတွေရဲ့ အရေအတွက်ဟာ မရေမတွက်နိုင်အောင် များပြားလှပါတယ်။ ဒီလိုများပြားတဲ့ ကြယ်တာရာဖြစ်စဉ်တွေကလည်း စကြဝဠာကြီးထဲမှာ အမြဲလိုလို ဖြစ်ပေါ်နေတတ်ပါတယ်။
အခုဆိုရင် Lupus (ဝံပုလွေ) ကြယ်တာရာစုအဖွဲ့ထဲမှာ Nova အသစ်တစ်လုံး ပေါ်ထွက်လာပြီ ဖြစ်ကြောင်း နက္ခတ္တသိပ္ပံပညာရှင်တွေက သတင်းထုတ်ပြန်လာပါတယ်။
ဒီကြယ်ဟာ အမြင့်ဆုံး တောက်ပမှုအထိ ရောက်ရှိနေပြီဖြစ်လို့ ကောင်းကင်ယံမှာရှင်းရှင်းလင်းလင်း မြင်တွေ့နိုင်နေမှာလည်းဖြစ်ပါတယ်။
ဒီကြယ်အသစ်ဟာ Nova (နိုဗာ) အမျိုးအစား ကြယ်တစ်လုံး ဖြစ်ပါတယ်။
Nova ဆိုတာ "ကြယ်အသစ်" (new star) လို့ အဓိပ္ပာယ်ရတဲ့ လက်တင်စကားလုံးကနေ ဆင်းသက်လာတာပါ။
သမိုင်းကြောင်းအရ ညကောင်းကင်မှာ ရုတ်တရက် တောက်ပလာတဲ့ ကြယ်တစ်လုံးကို မြင်တွေ့ရတဲ့အခါ "ကြယ်အသစ်ပေါ်လာပြီ" လို့ ယူဆခဲ့ကြတာကြောင့် ဒီဖြစ်စဉ်ကို Nova လို့ နာမည်ပေးခဲ့တာပါ။​လူသိများတဲ့ Supernova ဖြစ်စဉ်မဟုတ်ပါဘူး။
ဒါပေမဲ့ ခေတ်သစ်သိပ္ပံပညာအရ Nova ဟာ တကယ်တမ်း ကြယ်အသစ်တစ်လုံး အစကနေ မွေးဖွားလာတာ မဟုတ်ပါဘူး။ အဲဒီ့အစား Nova ဆိုတာကတော့ အရင်ကရှိပြီးသား ကြယ်နှစ်လုံးတွဲစနစ် (binary star system) တစ်ခုမှာ ဖြစ်ပေါ်တဲ့ ပေါက်ကွဲမှုဖြစ်စဉ်တစ်ခု ကို ပြောတာပါ။
အဓိကအားဖြင့် ကြယ်ဖြူပု (White Dwarf) တစ်လုံးနဲ့ သူ့ရဲ့အဖော်ဖြစ်တဲ့ သာမန်ကြယ်တစ်လုံး တို့ ပါဝင်တဲ့ စနစ်မှာ ဖြစ်ပေါ်တာပါ။ ဒီကြယ်ဖြူပုရဲ့ ဆွဲအားကြောင့် သူ့ရဲ့အနားကအဖော်ကြယ်ဆီကနေ
ဟိုက်ဒရိုဂျင်ဓာတ်ငွေ့တွေကို စုပ်ယူပြီး ကြယ်ဖြူပုရဲ့ မျက်နှာပြင်မှာ စုပုံလာတဲ့အခါ အပူချိန်နဲ့ ဖိအားတွေ မြင့်တက်လာပြီး နျူကလီးယား ပေါင်းစည်းမှု (thermonuclear fusion) ဖြစ်စဉ် ရုတ်တရက် ဖြစ်ပေါ်တာပါ။
ဒီပေါက်ကွဲမှုကြောင့် ကြယ်ဟာ ပုံမှန်ထက် ရုတ်တရက် အဆပေါင်း ထောင်ချီပြီး တောက်ပလာတာကို ကျွန်တော်တို့ Nova အဖြစ် မြင်တွေ့ရတာပဲ ဖြစ်ပါတယ်။ပုံမှန်ကျွန်တော်တို့ မျက်စိနဲ့ မမြင်နိုင်တဲ့ကြယ်အသစ်ပေါ်လာသလိုမျိုး မြင်ရမှာဖြစ်ပါတယ်။
အခု Nova အသစ်ကို V462 Lupi လို့ အမည်ပေးထားပါတယ်။
ဒီ Nova V462 Lupi ကို ၂၀၂၅ ခုနှစ်၊ ဇွန်လ ၁၂ရက်နေ့ မှာ All-Sky Automated Survey for Supernovae (ASAS-SN) အဖွဲ့ကနေ Lupus ကြယ်တာရာစုထဲမှာ စတင်တွေ့ရှိခဲ့တာ ဖြစ်ပါတယ်။
ဇွန်လ (၁၇) ရက်နေ့ မှာတော့ သူ့ရဲ့ တောက်ပမှုဟာ အဆင့် ၆.၁ (magnitude 6.1) အထိကို ရောက်ရှိခဲ့ပါတယ်။ အဆင့် ၆.၁ ဆိုတာ မျက်စိအမြင်အာရုံ အလွန်ကောင်းမွန်တဲ့သူတွေအတွက်ဆို မျက်စိနဲ့တိုက်ရိုက်မြင်နိုင်ပြီး၊ တယ်လီစကုတ်နဲ့ကြည့်မယ်ဆိုရင်တော့ ပိုပြီး ရှင်းလင်းစွာ မြင်တွေ့နိုင်တဲ့ အနေအထားမျိုးပါ။
ဒီ Nova V462 Lupi ကို မြောက်ဘက် လတ္တီကျု (latitude) ၄၀ ဒီဂရီထက် ပိုမြင့်တဲ့ နေရာတွေကနေ မြင်ရဖို့ ခဲယဉ်းပါတယ်။
မြန်မာနိုင်ငံအနေနဲ့ဆိုရင်တော့ တနိုင်ငံလုံးကနေ ဒီကြယ်အသစ်ကို မြင်တွေ့နိုင်မှာ ဖြစ်ပါတယ်။ မြန်မာနိုင်ငံရဲ့ တောင်ဘက်အစွန်ဆုံးဒေသကနေ မြောက်ဘက်အစွန်ဆုံးဒေသအထိ လတ္တီကျု အနေအထားဟာ ၄၀ ဒီဂရီရဲ့ အောက်မှာ ရှိနေတဲ့အတွက် မြန်မာနိုင်ငံတစ်ဝှမ်းလုံးကနေ ဒီကြယ်တာရာအသစ်ကို ကြည်လင်တဲ့ မိုးကောင်းကင်အခြေအနေအောက်မှာရှိတယ်ဆိုရင် မြင်တွေ့နိုင်မှာပါ။ ညဘက် ကောင်းကင်ယံကို ကြည့်ရှုပြီး ဒီကြယ်အသစ်ရဲ့ တောက်ပမှုကို ရှာဖွေကြည့်ဖို့ အခွင့်အရေးကောင်းလည်းဖြစ်ပါတယ်။
ဒီကြယ်အသစ် ကိုဘယ်လိုရှာမလည်းဆိုတာကို ပုံ (၂) မှာထည့်ပေးထားပါတယ်။
ဒီလိုကြယ်အသစ်တွေ ပေါ်ထွက်လာတာဟာ စကြဝဠာရဲ့ အလှတရားနဲ့ အစဉ်အမြဲ ပြောင်းလဲနေတဲ့ သဘောသဘာဝကို ပြသနေတာပါပဲ။ ညကောင်းကင်ရဲ့ လှပဆန်းကြယ်မှုတွေကို လေ့လာဖို့ စိတ်ဝင်စားတယ်ဆိုရင် V 462 lupi ကို လိုက်ရှာကြည့်တာဟာ ကောင်းကင်ကို လေ့လာကြည့်ရှုဖို့ အကောင်းဆုံးအချိန်တစ်ခု ဖြစ်ပါတယ်။