တရုတ်နိုင်ငံ ဒေသအများအပြားမှာ ရေကြီးရေလျှံမှု အနီရောင်သတိပေးချက် ထုတ်ပြန်
ပေကျင်း၊ ဇွန်-၂၀-၂၀၂၅
ရတီ(VOM)
တရုတ်နိုင်ငံ အရှေ့ပိုင်း၊ အလယ်ပိုင်း၊ တောင်ပိုင်းနဲ့ အနောက်တောင်ပိုင်းဒေသတွေမှာ ရုတ်တရက်ရေကြီး ရေလျှံမှုနဲ့ပတ်သက်ပြီး တရုတ်အာဏာပိုင်တွေက ယခုနှစ်အတွင်း ပထမဆုံးအကြိမ်အဖြစ် အနီရောင်သတိပေးချက် ထုတ်ပြန်လိုက်ပါတယ်။
ဟီနန်၊ ဟူဘေး၊ ဟူနန်နဲ့ ကွေ့ကျိုးဒေသတွေမှာ သတိပေးချက်တွေ ထုတ်ပြန်ထားတာဖြစ်တယ်လို့ တရုတ်မိုးလေဝသဌာနကို ကိုးကားပြီး ဆင်ဟွာသတင်းဌာနက ဆိုပါတယ်။ တရုတ်နိုင်ငံမှာ မကြာသေးမီနှစ်တွေအတွင်း ရုတ်တရက်မိုးသည်းထန်စွာရွာသွန်းပြီး ရေကြီးရေလျှံမှုတွေနဲ့ မကြာခဏဆိုသလို ရင်ဆို်ငနေရပါတယ်။
ဟူနန်ပြည်နယ်တောင်ပိုင်းတွင် မိုးသည်းထန်စွာရွာသွန်းပြီးနောက် လီရှူးမြစ်ဟာ စိုးရိမ်ရေမှတ်ထက် နှစ်မီတာကျော်သွားပြီးနောက် မြစ်ရဲ့ အထက်ပိုင်းနဲ့ အောက်ပိုင်းတွေမှာ ၁၉၉၈ ခုနှစ်နောက်ပိုင်း အဆိုးရွားဆုံး ရေကြီးရေလျှံမှုတွေ ဖြစ်ပွားနေပါတယ်။
ချုံကင်းအနောက်တောင်ပိုင်းမှာလည်း ရေကြီးမှုကြောင့် လူနေတိုက်ခန်းတွေမှာ ရေဝင်ခဲ့ပြီး မော်တော်ယာဉ်အချို့ပါ ရေမျောပါခဲ့ကာ အချို့နေရာတွေမှာ လျှပ်စစ်ဓါတ်အားနဲ့ ရေပြတ်တောက်နေတယ်လို့ တာဝန်ရှိသူတွေက ဆိုပါတယ်။
နေ့စဉ်မိုးရေချိန် ၃၀၄ မီလီမီတာထိ ရွားသွန်းနေသည့် ပန်ရှူးခရိုင်မှာ လူ ၃၀၀ လောက်ကို ဘေးလွတ်ရာ ရွှေ့ပြောင်းပေးထားပါတယ်။ ၁၉ မီတာထိ မြင့်တက်လာတဲ့ ဒိုင်တန်မြစ်ဟာ ရေကြီးရေလျှံမှု ပိုမိုဆိုးရွားလာတယ်လို့ အာဏာပို်ငတွေက သတိပေးထားပါတယ်။
ချုံကင်းရှိ အခြားမြစ်တွေဟာလည်း မိုးသည်းထန်းစွာရွာသွန်းမှုကြောင့် စိုးရိမ်ရေမှတ်ကျော်လွန်နေပြီဖြစ်ပါတယ်။ ကွမ်တုံပြည်နယ်တောင်ပိုင်းမှာလည်း ရေကြီးရေလျှံမှုဟာ ပြည်နယ်သမိုင်းမှာ အဆိုးရွားဆုံးလို့ ဆိုပါတယ်။
Ref:CNA
Photo:Reuters