#ယနေ့ထုတ်သတင်းစာ_နိုင်ငံတကာသတင်း
◼ သုံးနှစ်အတွင်း ကမ္ဘာ့အပူချိန်ကန့်သတ်ချက်ကို ကျော်လွန်လာနိုင်ကြောင်း သတိပေး
ကမ္ဘာပေါ်တွင် လက်ရှိကာဗွန်ဒိုင်အောက်ဆိုက် ထုတ်လွှတ်မှုအဆင့်အရ သုံးနှစ်အတွင်းကမ္ဘာ့ပျမ်းမျှအပူချိန် ၁ ဒသမ ၅ ဒီဂရီစင်တီဂရိတ် ကန့်သတ်ချက်ကိုကျော်လွန်ရန် အလားအလာများ ကြောင်း သိပ္ပံပညာရှင်များက ဇွန် ၁၈ ရက်တွင် သတိပေးလိုက်သည်။
နိုင်ငံပေါင်း ၂ဝဝ ကျော်သည် ယင်းကန့်သတ်ချက်အတိုင်း အပူချိန်ကိုထိန်းသိမ်းရန် ၂ဝ၁၅ ခုနှစ်က သဘောတူညီခဲ့ကြပြီး လက်ရှိနောက်ဆုံး အကဲဖြတ်ချက်တွင် ထိပ်တန်းသိပ္ပံပညာရှင် ၆ဝ ကျော်၏အထက်ပါသတိပေးချက် ထွက်ပေါ်လာခြင်းဖြစ်သည်။
သို့သော် နိုင်ငံအများအပြားသည် ကျောက်မီးသွေး၊ ရေနံနှင့် သဘာဝဓာတ်ငွေ့ထုတ်လုပ်သုံးစွဲမှုများ စံချိန်တင်ခဲ့ပြီး ကာဗွန်ဒိုင်အောက်ဆိုက်ကို စုပ်ယူနိုင်သည့်သစ်တောသစ်ပင် ပြုန်းတီးမှုများကလည်း ကမ္ဘာ့အပူချိန်ကို ပိုမိုတိုးစေခဲ့သည်။
အရာအားလုံးသည် လမ်းကြောင်းအမှားကိုဦးတည်နေကြောင်း လိဒ်တက္ကသိုလ်မှ ရာသီဥတုပြောင်းလဲမှုအနာဂတ်ဆိုင်ရာ ပါမောက္ခ ဖော်စတာကပြောသည်။ မကြုံစဖူးအပြောင်းအလဲအချို့ကို မြင်တွေ့နေရပြီး ကမ္ဘာ့အပူချိန်နှင့်ပင်လယ်ရေမျက်နှာပြင်သည်လည်း အရှိန်အဟုန်ဖြင့် မြင့်တက်နေသည်ဟု သတိပေးထားသည်။
၂ဝ၂ဝ ပြည့်နှစ်အစောပိုင်းက သိပ္ပံပညာရှင်များ၏ တွက်ချက်မှုတွင် ကမ္ဘာ့အပူချိန်ကို စက်မှုခေတ်မတိုင်မီကာလ ကမ္ဘာ့အပူချိန်၏ အထက် ၁ ဒသမ ၅ ဒီဂရီ စင်တီဂရိတ်တွင် ထိန်းသိမ်းရန် လူသားတို့အနေဖြင့် ကာဗွန်ဒိုင်အောက်ဆိုက်တန်ချိန် ဘီလီယံ ၅ဝဝ သာထုတ်လွှတ်နိုင်ကြမည်ဟုဆိုထားပြီး ၂၀၂၅ ခုနှစ် အစောပိုင်း ခန့်မှန်းမှုတွင်မူ ထုတ်လွှတ်နိုင်သည့် ပမာဏတန်ချိန် ဘီလီယံ ၁၃၀ သာရှိတော့ကြောင်း ဖော်ပြထားသည်။
ဘီဘီစီ
