#ယနေ့ထုတ်သတင်းစာ_သတင်း
◼ မြန်မာနိုင်ငံ ငြိမ်းချမ်းရေးအတွက် ကြိုးပမ်းရာတွင် စုပေါင်း ဝါယမစိုက်ထုတ်မှု မြှင့်တင်ရန် မလေးရှားဝန်ကြီးချုပ် တိုက်တွန်း
မြန်မာနိုင်ငံ၌လက်ရှိဖြစ်ပွားဆဲ နိုင်ငံရေးနှင့်စစ်ရေးအကျပ်အတည်းကို ဖြေရှင်းရာတွင်အာဆီယံအဖွဲ့ဝင်နိုင်ငံများအနေဖြင့် စုပေါင်းဝါယမစိုက်ထုတ်မှု မြှင့်တင်ကြရန် မလေးရှားဝန်ကြီးချုပ် အန်ဝါအီဘရာဟင်က ဇွန် ၁၉ ရက်တွင် တိုက်တွန်းလိုက်ကြောင်း သိရသည်။
မြန်မာ့နိုင်ငံရေးအကျပ်အတည်းကို ဖြေရှင်းရေးအတွက် ကြိုးပမ်းရာတွင် အာဆီယံအဖွဲ့အနေဖြင့်လည်းကြေညာချက်များ ထုတ်ပြန်ရုံ၊ အစည်းအဝေးမှတ်တမ်းများ ထုတ်ပြန်ခြင်းဖြင့် မလုံလောက်ဘဲ ပုံစံသစ်ဖြင့်ချဉ်းကပ်သင့်ကြောင်း မလေးရှားဝန်ကြီးချုပ် အန်ဝါအီဘရာဟင်က(၃၈)ကြိမ်မြောက် အာရှ-ပစိဖိတ်စားပွဲဝိုင်းဆွေးနွေးပွဲ မိန့်ခွန်းတွင် ထည့်သွင်းပြောကြားခဲ့သည်။
မြန်မာ့အရေးကို ဖြေရှင်းရာတွင် ဥရောပ၊ အမေရိကနှင့် တရုတ်နိုင်ငံ အပါအဝင်အခြားနိုင်ငံများက ပါဝင်ကူညီမည်ဆိုပါကလည်း မိမိတို့ကြိုဆိုကြောင်း၊ သို့ရာတွင် မြန်မာပြဿနာကိုဖြေရှင်းရေးသည် အာဆီယံအနေဖြင့် မဆိုင်းမတွရယူရမည့် တာဝန်ဖြစ်ကြောင်း မလေးရှားဝန်ကြီးချုပ်ကပြောကြားထားသည်။
အကယ်၍မြန်မာနိုင်ငံ၌ ငြိမ်းချမ်းရေးဆွေးနွေးပွဲများ ဖြစ်မြောက်ရေးတာဝန်ကို မရယူနိုင်ခဲ့ပါကအာဆီယံအတွက် အရှက်ရဖွယ်ကိစ္စဖြစ်လာလိမ့်မည်ဖြစ်ကြောင်း မလေးရှားဝန်ကြီးချုပ်က သုံးသပ်ထားသည်။
ယခုနှစ် အာဆီယံအလှည့်ကျဥက္ကဋ္ဌအနေဖြင့် မြန်မာပြည်တွင်း ဖြစ်ပေါ် တိုးတက်မှုများကို မလေးရှားနိုင်ငံက အနီးကပ်စောင့် ကြည့်နေကြောင်း မလေးရှားဝန်ကြီးချုပ်က ထုတ်ဖော်ပြောကြားထားသည်။
လက်ရှိအခြေအနေအရ မြန်မာ့နိုင်ငံရေးပြဿနာသည် အရှေ့တောင်အာရှ ရင်ဆိုင်နေရသော မဖြေရှင်းနိုင်သေးသည့် အကြီးမားဆုံး စိန်ခေါ်မှုတစ်ခုအဖြစ် ဆက်ရှိနေကြောင်း မလေးရှားဝန်ကြီးချုပ်က သုံးသပ်ထားသည်။
Bernama
