သက်ဆင်ကို ဖြုတ်ချခဲ့တဲ့ ရှပ်ဝါတွေ ထိုင်းအစိုးရဆန့်ကျင်ရေး ဆန္ဒပြပွဲ စတင်
ဘန်ကောက်၊ ဇွန်-၁၉-၂၀၂၅
ရတီ(VOM)
ကမ္ဘောဒီးယားဝန်ကြီးချုပ်ဟောင်း ဟွန်ဆန်နဲ့ ဖုန်းခေါ်ဆိုမှု ပေါက်ကြားမှုကြောင့် ထိုင်းဝန်ကြီးချုပ် ပေတုန်တန်ရှင်နာဝပ်ထရာကို ရာထူးကနေ ဆင်းပေးဖို့ အတိုက်အခံတွေက တောင်းဆိုနေကြသလို အစိုးရအိမ်တော်အရှေ့မှာလည်း ရှပ်ဝါဝတ်ဆင်သူ ရာပေါင်းများစွာ ဒီကနေ့မှာ စတင်ဆန္ဒပြခဲ့ကြပါတယ်။
ထိုင်းနိုင်ငံရဲ့ဘုရင်စနစ်ကို ထောက်ခံတဲ့ ရှပ်ဝါတွေကတော့ အသက် ၃၈ နှစ်အရွယ် ဝန်ကြီးချုပ် ပေတုန်တန်ဟာ သံတမန်ရေးရာ ကျွမ်းကျင်မှုကင်းမဲ့ပြီး အမျိုးသားအကျိုးစီးပွားကို ထိခိုက်စေကာ အလွန်စိတ်ပျက်မိကြောင်း ဆန္ဒပြသူ တယောက်ကပြောပါတယ်။
ဆန္ဒပြသူတွေဟာ ဝန်ကြီးချုပ်ကို သစ္စာဖောက်လို့ စွပ်စွဲထားပြီး ရာထူးမှဆင်းပေးရေး ဆိုင်းဘုတ်တွေကို ကို်ငဆောင်ဆန္ဒပြခဲ့ကြပြီး အဓိကရုဏ်းနှိမ်နင်းရေးရဲတွေက အနီးနားမှာ စောင့်ကြည့်နေကြပါတယ်။ ဆန္ဒပြသူတွေဟာ ၂၀၀၀ ခုနှစ်ကတည်းက ရှင်နာဝပ်နိုင်ငံရေးမင်းဆက်တွေကို ပြင်းပြင်းထန်ထန် ဆန့်ကျင်ခဲ့ကြတဲ့ ရှေးရိုးစွဲတော်ဝင်ဝါဒီ ထောက်ခံသူ လူကြီးအရွယ်အများစု တွေဖြစ်ပါတယ်။
အသက် ၆၂ နှစ်အရွယ် ဘန်ကောက်က အိမ်ရှင်မတယောက်တော့ လွန်ခဲ့တဲ့ နှစ် ၂၀ က ဘန်ကောက် ဒီမိုကရေစီကျောက်တိုင်အနီး ရှပ်ဝါဆန္ဒပြပွဲမှာလည်း ပါဝင်ခဲ့တယ်လို့ ဆိုပါတယ်။ သူ့အနေနဲ့ ဘယ်နိုင်ငံရေးပါတီကိုမှ မထောက်ခံကြောင်းနဲ့ သက်ဆင်နဲ့ သူ့မိသားစုကို မုန်းတီးတယ်လို့ ပြောပါတယ်။
ရှပ်နီတွေ ထောက်ခံပေးထားတဲ့ သက်ဆင်ရဲ့ နိုင်ငံရေးလှုပ်ရှားမှုတွေနဲ့ ရှေးရိုးစွဲ တော်ဝင်ဝါဒီ ရှပ်ဝါတွေအကြား တွန်းတိုက်မှုတွေနဲ့ ပဋိပက္ခတွေက ထိုင်းနိုင်ငံရေးကို နှစ်ပေါင်း ၂၀ ကျော်လွှမ်းမိုးထားခဲ့ပါတယ်။ တော်ဝင်ဝါဒီတွေနဲ့ စီးပွားရေးအထက်တန်းစားတွေ ကျောထောက်နောက်ခံပေးထားတဲ့ ရှပ်ဝါတွေဟာ ဘန်ကောက်လေဆိပ်ကိုပိတ်ပစ်ရတဲ့ထိ ပြင်းထန်ခဲ့တဲ့ သက်ဆင်အစိုးရကို ဖြုတ်ချခဲ့တဲ့ ၂၀၀၈ခုနှစ် ဆန္ဒပြပွဲတွေကို ဦးဆောင်ခဲ့ပါတယ်။
၂၀၁၀ ခုနှစ်မှာတော့ သက်ဆင်ထောက်ခံတဲ့ ရှပ်နီဆန္ဒပြမှုတွေဟာ စစ်တပ်ကျောထောက်နောက်ခံပြု အစိုးရကို ဆန့်ကျင်တဲ့ဆန္ဒပြပွဲတွေ ဘန်ကောက်မှာပြုလု်ပခဲ့ပေမယ့် လူ ၉၀ ကျော်သေဆုံးမှုနဲ့အတူ အဆုံးသတ်ခဲ့ပါတယ်။
လက်ရှိမှာတော့ ပေတုန်တန်ရဲ့ ဖြူထိုင်းပါတီ အဓိက မိတ်ဖက်ပါတီဖြစ်တဲ့ ဘွန်ဂျိင်ထိုင်းပါတီ နုတ်ထွက်မှုနဲ့အတူ အသံဖိုင်ပေါက်ကြားမှုဟာ နိုင်ငံကို ထိခိုက်စေပြီး ထိုင်းစစ်တပ်ရဲ့ ဂုဏ်သိက္ခာကိုလည်း စော်ကားတယ်ဆိုတဲ့ စွပ်စွဲချက်တွေနဲ့အတူ ထိုင်းညွှန့်ပေါင်းအစိုးရအတွင်းမှာ မရေရာမှုတွေ တိုးပွားနေပါတယ်။
ပြည်သူလူထုကို နာကြည်းစေခဲ့တဲ့ ကမ္ဘောဒီးယားခေါင်းဆောင်တယောက်နဲ့ စကားပြောဆိုမှုတွေ ပေါက်ကြားခဲ့တဲ့အတွက် တောင်းပန်တယ်လို့ ထိုင်းဝန်ကြီးချုပ် ပေတုန်တန်က ဒီကနေ့ သတင်းစာရှင်းလင်းပွဲမှာ ပြောပါတယ်။
ဝန်ကြီးချုပ် ပေတုန်တန်ဟာ ထိုင်းစစ်တပ် အရှေ့မြောက်ပိုင်းတပ်မှူးကို သူနဲ့ပြိုင်ဘက်အဖြစ် ရည်ညွှန်းပြောဆိုခဲ့ပြီး ဟွန်ဆန်ကိုလည်း ဦးလေးလို့ သုံးနှုန်းခေါ်ဆိုခဲ့တဲ့ အသံဖိုင်ပေါက်ကြားမှုကြောင့် ထိုင်းပြည်သူတွေရဲ့ ဝေဖန်မှုနဲ့ ရင်ဆိုင်နေရကာ ထိုင်းစစ်တပ်နဲ့မပြေလည်ဘူးလို့ ယူဆချက်တွေလည်း ထွက်ပေါ်နေပါတယ်။
၁၉၃၂ ခုနှစ်မှာ ဘုရင်စနစ် အဆုံးသတ်ချိန်မှစပြီး ထိုင်းနိုင်ငံမှာ အာဏာသိမ်းမှု ဒါဇင်နဲ့ချီရှိခဲ့ပြီး လက်ရှိနိုင်ငံရေးအကျပ်အတည်းဟာလည်း နောက်တကြိမ်အာဏာသိမ်းမှုကို ဦးတည်သွားဖွယ်တယ်လို့ အကဲခတ်တွေက သုံးသပ်ထားပါတယ်။