ဒေါ်အောင်ဆန်းစုကြည်ရဲ့ ကျန်းမာရေးအခြေအနေ သက်ဆိုင်ရာက နှုတ်ဆိတ်နေမှု မေးခွန်းထုတ်စရာလို့ ဒေါက်တာမျိုးညွှန့် ပြော
ဇွန် ၁၉ - ၂ဝ၂၅
KKO(VOM)
ဒေါ်အောင်ဆန်းစုကြည်ကို ဘယ်နေရာမှာထားတယ်ဆိုတာနဲ့ ကျန်းမာရေးအခြေအနေကို သက်ဆိုင်ရာက နှုတ်ဆိတ်နေပြီး ဒါဟာမေးခွန်းထုတ်စရာဖြစ်နေတယ်လို့ အမျိုးသားဒီမိုကရေစီအဖွဲ့ချုပ်(NLD)ပါတီရဲ့ပြောရေး ဆိုခွင့်ရှိသူ ဒေါက်တာမျိုးညွှန့်က VOM ကို ပြောပါတယ်။
"အဲဒီသတင်းကိုကြည့်ပြီး ယနေ့ ဒေါ်အောင်ဆန်းစုကြည်ရဲ့ကျန်းမာရေးအခြေအနေကို မသိနိုင်ပါဘူး။ သက်ဆိုင်ရာရဲ့ နှုတ်ဆိတ်နေမှုကြောင့် ဒေါ်အောင်ဆန်းစုကြည်ကို ဘယ်နေရာမှာထားတယ်။ ကျန်းမာရေးကောင်းတယ် ဆိုတဲ့ အချက်ကို မေးခွန်းထုတ်စရာဖြစ်မြဲ ဖြစ်နေပါတယ်"လို့ ဒေါက်တာမျိုးညွှန့် က ပြောပါတယ်။
ဒေါ်အောင်ဆန်းစုကြည်ရဲ့ အသက်(၈ဝ)ပြည့် မွေးနေ့မတိုင်ခင် တရက်အလို ယမန်နေ့ ဇွန်လ ၁၈ ရက်မှာ ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ရဲ့ တရားခွင် အမှုရင်ဆိုင်နေတဲ့ CCTV မှတ်တမ်းဗီဒီယိုနဲ့ ဒေါ်အောင်ဆန်းစုကြည်၏ ထောင်တွင်း နေ့စဉ်နေထိုင်မှုမှတ်တမ်းတွေကိုဗြိတိန်အခြေစိုက်ဂါးဒီးယန်းသတင်းဌာနက ဖော်ပြလာမှုအပေါ်မှာသုံးသပ် ချက်မျိုးစုံနဲ့ ယင်းကိစ္စရပ်အပေါ် ဝေဖန်သံမျိုးစုံလည်းထွက်ပေါ်လို့လာခဲ့တာဖြစ်ပါတယ်။
"ဒီတရားခွင်မှတ်တမ်းက တမင်ဖွင့်ချပေးလိုက်တာလို့ပဲထင်ပါတယ်"လို့ ပြည်တွင်းက နိုင်ငံရေးလေ့လာသုံးသပ်သူတယောက် က ပြောပါတယ်။
ဒါအပြင် ဒီကနေ့ ဇွန်လ ၁၉ ရက်ဟာ ဒေါ်အောင်ဆန်းစုကြည်ရဲ့အသက်(၈ဝ)ပြည့် မွေးနေ့လည်းဖြစ်ပါတယ်။
"ဒါကအကြောင်းအရင်းတခုခုကြောင့်ဖြစ်နိုင်ပါတယ်။ သူ့မွေးနေ့မှာ ဒီမှတ်တမ်းကတိုက်တိုင်ဆိုင်ဆိုင်ထွက်ပေါ်လာတာဟာ အကြောင်းအရင်းတခုကြောင့်ပဲဖြစ်ပါလိမ့်မယ်။ ဂါးဒီးယန်းသတင်းဌာနကရောဒါကိုဘယ်လိုရလဲ ၊ဒါကလည်းစိတ်ဝင်စားစရာကောင်းပါတယ်"လို့ နိုင်/ကျဉ်းဟောင်းတယောက်က သုံးသပ်ပြောပြပါတယ်။
လက်ရှိမှာတော့ ဒေါ်အောင်ဆန်းစုကြည်ဟာအမှု ၁၉ မှု အတွက် ထောင်ဒဏ် ၃၃ နှစ် ချမှတ်ခံထားရတာပါ။ နစက ရဲ့ ၂၀၂၃ ခုနှစ် သြဂုတ် ၁ ရက်လွတ်ငြိမ်းသက်သာခွင့် ထုတ်ပြန်ချက်အရ အမှု ၁၉ မှု ထဲက အမှု ၅ မှု အတွက် ၆ နှစ် ပြစ်ဒဏ်လွတ်ငြိမ်း ခွင့်ပေးခဲ့လို့ ကျန်တဲ့ ၁၄ မှုအတွက် ထောင် ဒဏ် ၂၇ နှစ် ဆက်လက်ကျခံနေရဆဲဖြစ်ပါတယ်။
ဒါအပြင် Suu Foundation ကတော့ လူထုခေါင်းဆောင် ဒေါ်အောင်ဆန်းစုကြည်အနေနဲ့အကျဉ်းချခံထားရစဉ် မတ်လ ၂၈ ရက်နေ့ လှုပ်ခတ်ခဲ့သော ပြင်းအား ၇ ဒသမ ၇ အဆင့်ရှိ ငလျင်ကြီးရဲ့ ဒဏ်ကြောင့် ဘယ်ဘက်လက်မောင်း ဒဏ်ရာရရှိခဲ့ပြီး စိုးရိမ်ရတဲ့အခြေအနေရှိတယ်လို့ ယမန်နေ့က ထုတ်ပြန်ထားပါတယ်။
ဒါအပြင် Suu Foundation က မြန်မာနိုင်ငံရဲ့ ငြိမ်းချမ်းရေးနဲ့ ပြန်လည်သင့်မြတ်ရေးအတွက် ယနေ့ အသက်(၈၀)ပြည့်ပြီဖြစ်တဲ့ ဒေါ်အောင်ဆန်းစုကြည်နဲ့ နိုင်ငံရေးအကျဉ် သားတွေကို ချက်ချင်း လွှတ်ပေးဖို့ကိုလည်းတောင်းဆိုထားပါတယ်။