မြောင်းမြမှာ ကျောင်းသူအချင်းချင်း အုပ်စုဖွဲ့အနိုင်ကျင့်တဲ့ကိစ္စ ထိရောက်တဲ့ အရေးမှုမလုပ်ရင်နေပြည်တော် အထိတိုင်ကြားမယ်
ဇွန် - ၁၉ ၂၀၂၅
GG (VOM)
ဧရာဝတီတိုင်း ၊မြောင်းမြမြို့ အ.ထ.က( ၆) ကျောင်းမှ ဖြစ်ပွားခဲ့တဲ့ ကျောင်းသူအချင်းချင်း အုပ်စုဖွဲ့အနိုင်ကျင့်ပြီး ပါးရိုက်ခြင်း ၊ ဒူးထောက်ပြီး ထိုင်ကန်တော့ခိုင်းခဲ့တဲ့ ကိစ္စနဲ့ ပတ်သက်ပြီး မြို့နယ်ပညာရေးမှူးနဲ့ ကျောင်းအုပ်ဆရာမကြီးဆိုသူတို့က ထိရောက်တဲ့အရေးယူမှုတွေ မပြုလုပ်ပေးတဲ့အတွက် နိုင်ငံတော်စီမံအုပ်ချုပ်ရေးကောင်စီ၊ ပညာရေးဝန်ကြီးဌာနအပါ သက်ဆိုင်ရာဌာနတွေကို တိုင်ကြားစာထပ်မံပေးပို့သွားမယ်လို့ အဆိုပါ အရေးကိစ္စကိုဆောင်ရွက်နေသူကပြောပါတယ်။
အဆိုပါ အုပ်စုဖွဲ့အနိုင်ကျင့်တဲ့ကိစ္စရပ်ဟာ အရင်နှစ်ကျောင်းဖွင့်ချိန်ကတည်းက ဖြစ်ပွားခဲ့တာဖြစ်ပြီး အဲဒီအချိန်ကလည်း ထိရောက်တဲ့အရေးယူမှုမရှိခဲ့ကြောင်း ၊ ရုပ်သံဖိုင်မှာ ကျောင်းသူတယောက်ကို အုပ်စုဖွဲ့အနိုင်ကျင့်ကာ လူမြင်ကွင်းမှာ ပါးကို ထပ်ခါထပ်ခါရိုက်ခြင်း၊ ဒူးထောက်ပြီး တောင်းပန်ခိုင်းနေတာကိုတွေ့မြင်ရပြီးနောက် ပြည်သူတွေအကြား ဝေဖန်ပြစ်တင်မှုတွေမြင့်တက်ခဲ့ပါတယ်။
ဒါကြောင့် မြို့နယ်ပညာရေးမှူးနဲ့ ကျောင်းအုပ်ဆရာမကြီးက ကျူးလွန်ခဲ့တဲ့ကျောင်းသူနှစ်ယောက်ကို ခေါ်ဆောင်ကာ ပါးရိုက်ခံခဲ့ရတဲ့ ကျောင်းသူအိမ်ကို သွားရောက်ပြီး တောင်းပန်းချိန် ဗွီဒီယို ရိုက်ကူးမှုအပေါ် ကျူးလွန်သူကျောင်းသူတွေက ငြင်းဆန်ပြီး ပြန်သွားခဲ့တယ်လို့ သိရပါတယ်။
ကျောင်းအုပ်ဆရာမကြီးနဲ့ တာဝန်ရှိသူတို့ကလည်း အဆိုပါ အုပ်စုဖွဲ့အနိုင်ကျင့်တဲ့ ကျောင်းသူတွေကို ကျောင်းထုတ်လို့မရကြောင်း ပြောဆိုပြီး ပြန်သွားတယ်လို့သိရပါတယ်။
"အရင်နှစ်က ဖြစ်ခဲ့တာကို ထိရောက်အောင် အရေးမယူခဲ့ဘူး။ခုလည်း ပါးရိုက်ပြီး ဒူးထောက်တောင်းပန်ခိုင်းခဲ့တဲ့ ကျောင်းသူအဖွဲ့ကို ဘာအရေးယူမှုမှမလုပ်ဘူး။ သန်ဘက်ခါနောက်ဆုံးစောင့်ပြီးတိုင်မှာပါ။ လုပ်ခဲ့တဲ့ကျောင်းသူတွေက ကျောင်းဆက်တက်ခွင့်ရပြီး
ခံခဲ့ရတဲ့ကျောင်းသူက ကျောင်းဆက်မတက်ရဲတော့ဘူး။ နစ်နာတဲ့ ကလေးအတွက်လည်း ကျောင်းဆက်တက်နိုင်အောင် မကူညီခဲ့ဘူး ကျောင်းတာဝန်ရှိသူတွေရောပညာရေးမှူးရောပါ။ " လို့ အုပ်စုဖွဲ့အနိုင်ကျင့်ခံခဲ့ရတဲ့ ကျောင်းသူ တရားမျှတမှုရရှိအောင် ဦးဆောင်လုပ်ကိုင်ပေးနေသူကပြောပါတယ်။
အုပ်စုဖွဲ့အနိုင်ကျင့်ခံခဲ့ရတဲ့ ကျောင်းသူလေးဟာ အဲဒီလို အနိုင်ကျင့်ခံရပြီး မနှစ်ကတည်းက ကျောင်းဆက်မတက်ရဲတဲ့အတွက် ကျောင်း ကနေနူတ်ထွက်ခဲ့ကာ ခုချိန်ထိ ကျောင်းတက်နိုင်ခြင်းမရှိပေမယ့် အနိုင်ကျင့်ခဲ့တဲ့ကျောင်းသူအုပ်စုကတော့ အ.ထ.က (၆)မှာဘဲခုချိန်ထိကျောင်းဆက်တက်နေဆဲ ဖြစ်တယ်လို့သိရပါတယ်။
" ကျုးလွန်ခံရတဲ့ဖက်ကတောင်းဆိုတာ ၂ ချက်တည်းပါ။ ကိုယ်ထိလက်ရောက်ကျူးလွန်တဲ့ ကျောင်းသူနှစ်ယောက်အပြင် အဖွဲ့လိုက်ဝိုင်းအနိုင်ကျင့်ခဲ့တဲ့ အဲဒီကိစ္စမှာ Video ရိုက်ခဲ့သူအပါ ပါဝင်ခဲ့သူအားလုံး
ပြန်တောင်းပန်ပေးဖို့နဲ့ ကျူးလွန်ခံရသူ သမီးငယ်လေးကျောင်းပြန်တက်နိုင်ရန် အဲဒီ ကျောင်းသူတွေကို အ.ထ.က ၆ မှ တခြားကျောင်းကို ပြောင်းရွှေ့ပေးဖို့ပါ။" လို့ ကူညီဆောင်ရွက်ပေးနေသူကပြောပါတယ်။
အဲဒီနှစ်ချက်မလုပ်ပေးနိုင်ပါက တရားမျှတမှု့ရှိအောင်ကျူးလွန်သူ ကျောင်းသူတွေကို
တနိုင်ငံလုံးမှ ကျောင်းသားကျောင်းသူတွေ
အတုယူမမှား စေရေးအတွက် ထိထိရောက်ရောက် စံပြအဖြစ်အရေးယူပြီးမင်နီတား ကျောင်းထုတ်ပေးသင့်တယ်လို့ ဆိုပါတယ်။
ခုလို စာသင်ကျောင်းတွေမှာ ကျောင်းသူ ၊ကျောင်းသားအချင်းချင်း အုပ်စုဖွဲ့အနိုင်ကျင့်ပြီး ကိုယ်ထိလက်ရောက်စော်ကားတဲ့ ကိစ္စဖြစ်တဲ့အပေါ် ကျောင်းသားမိဘတွေက သူတို့ရဲ့သားသမီးတွေအတွက် စိုးရိမ်မှုကြီးမားလာပါတယ်။
" ကလေးကျောင်းထားရမှာတောင်ကြောက်မိတယ်။ကိုယ့်ကလေးသာ အဲဒီလိုအနိုင်ကျင့်ခံရတာဆိုရင် ဒေါသကို ဘယ်လိုမှထိန်းချုပ်နိုင်မယ်မထင်ဘူး။ ဒါတွေက မဖြစ်သင့်ဘူး ။မိဘတွေက ကလေးတွေကိုကျောင်းကိုပို့တာ စာသင်ဖို့တခုတည်းမှမဟုတ်တာ။ လိမ္မာရေးခြားရှိအောင်နဲ့ အသိပညာဗဟုသုတကြွယ်ဝအောင်လည်းပါတယ် ။ဒါတွေကဆရာဆရာမတွေလုပ်ရမယ့်အရာတွေပဲလေ။ ခုရုပ်သံဆိုမနှစ်ထဲကဖြစ်တာကို သူတို့ဘာမှအရေးယူမှု မလုပ်ခဲ့ဘူးဆိုတာ အံ့သြလို့မဆုံးပါဘူး။ နောက်ကလေးတွေ ခုလိုအုပ်စုဖွဲ့အနိုင်ကျင့်တာမျိုးမလုပ်ရဲအောင် ထိရောက်တဲ့အရေးယူမှုလုပ်ကိုလုပ်ရမှာပါ။" လို့ ကျောင်းသားမိဘတယောက်ကပြောပါတယ်။
