#ယနေ့ထုတ်သတင်းစာ_နိုင်ငံတကာသတင်း
◼ ကွန်ဂိုမြို့တော် ကင်ရှာဆာတွင် ရေဘေးကြောင့် လူ ၂၉ ဦးသေဆုံး
ကွန်ဂိုဒီမိုကရက်တစ်သမ္မတနိုင်ငံ မြို့တော်ကင်ရှာဆာတွင် ပူပြင်းခြောက်သွေ့သောရာသီ၌ ပုံမှန်မဟုတ်သည့်မိုးရွာသွန်းမှုများကြောင့် ရေကြီးရေလျှံဖြစ်ပွားပြီး လူ ၂၉ ဦးထက်မနည်း သေဆုံး ခဲ့ကြောင်း ပြည်ထဲရေးဝန်ကြီးဌာနကဇွန် ၁၆ ရက်တွင် ထုတ်ပြန်သည်။
ရေကြီးရေလျှံမှုများကြောင့် နေအိမ်များမျောပါခြင်းနှင့် လမ်းများရေလျှံခဲ့ကာ မြို့၏သုံးပုံတစ်ပုံ လျှပ်စစ်ဓာတ်အား ပြတ်တောက်ခဲ့ကြောင်း မြို့တာဝန်ရှိသူများကပြောသည်။ လွန်ခဲ့သည့်ဇွန် ၁၄ ရက်တွင် မိုးရေချိန်မီလီမီတာ ၉ဝ ထိ ရွာသွန်းခဲ့ပြီး မိုးရာသီကာလ တစ်နေ့တာမိုးရေချိန်များထက် ပိုမိုများပြားသည်။
မြို့တော်ကင်ရှာဆာတွင် မြို့ပြစီမံကိန်းများနှင့် သင့်လျော်သော ရေနုတ်မြောင်းစနစ်မရှိခြင်းကြောင့် ရေကြီးရေလျှံမှုနောက်ဆက်တွဲ ဆိုးကျိုးများခံစားနေရသည်ဟု မြို့ခံများက ဝေဖန်သည်။ ကင်ရှာဆာသည်ကမ္ဘာပေါ်တွင် အရှည်လျားဆုံး မြစ်တစ်စင်းဖြစ်သော ကွန်ဂိုမြစ်ကမ်းပေါ်တွင်တည်ရှိသည်။
ကင်ရှာဆာမြို့တော်တွင် အခြားဒေသများမှ လာရောက်အခြေချမှုများနှင့်အတူ လူဦးရေတိုးပွားလာနေသည်။ မြို့လူဦးရေသည် ၁၈ သန်းနီးပါး ထိရှိမည်ဟုခန့်မှန်းထားပြီး ၂ဝ၂၄ ခုနှစ်ကထက် ၄ ရာခိုင်နှုန်းကျော်တိုးလာကြောင်း တာဝန်ရှိသူများက ဆိုသည်။
မေလအတွင်းကလည်း နိုင်ငံအရှေ့တောင်ပိုင်း ကီဗူပြည်နယ်တွင် ရုတ်တရက်ရေကြီးရေလျှံမှုများကြောင့်လူ ၁၀၀ ကျော်သေဆုံးခဲ့ပြီး ဧပြီလတွင်မူ မြို့တော်ကင်ရှာဆာ၌ ရေကြီးမှုကြောင့်လူ၃ဝ ကျော် သေဆုံးခဲ့သည်။
ဘီဘီစီ
