#ယနေ့ထုတ်သတင်းစာ_သတင်း
◼ ထိုင်းနိုင်ငံသားများသာ လုပ်ကိုင်ခွင့်ရှိသည့်အလုပ်များတွင် ဝင်ရောက်လုပ်ကိုင်နေသော နိုင်ငံခြားသားများကို ထိုင်းအစိုးရ နှိမ်နင်းမည်
ထိုင်းနိုင်ငံသားများသာ လုပ်ကိုင်ခွင့်ရှိသည့် အလုပ်များတွင် ဝင်ရောက်လုပ်ကိုင်နေသော နိုင်ငံခြားသားအလုပ်သမားများအား နှိမ်နင်းရေးတိုးမြှင့်လုပ်ဆောင်သွားမည်ဟု အလုပ်သမားဝန်ကြီးဌာနပြောရေးဆိုခွင့်ရှိသူက ဇွန် ၁၅ ရက်တွင် ပြောကြားခဲ့ကြောင်း ထိုင်းသတင်းများ၌ဖော်ပြချက်အရ သိရသည်။
ထိုသို့ထိုင်းနိုင်ငံသားများသာ လုပ်ကိုင်ခွင့်ရှိသည့် အလုပ်အကိုင်များအနက် အမျိုးအစားသုံးခုတွင် လုပ်ကိုင်နေသော နိုင်ငံခြား သားအလုပ်သမား ၁၁ဝဝ ကျော်ကို ဥပဒေအရ အရေးယူထားပြီး လာအို၊ ကမ္ဘောဒီးယားနှင့် မြန်မာနိုင်ငံတို့မှ အလုပ်သမားများစွာကို အဆိုပါကန့်သတ်အလုပ်များတွင် ငှားရမ်းအလုပ်ခန့်ထားခြင်းတို့အား ပိုမိုပြင်းထန်စွာ နှိမ်နင်းသွားမည်ဖြစ်ကြောင်း သိရသည်။
ပြီးခဲ့သည့် ၂ဝ၂၄ ခုနှစ် အောက်တိုဘာ ၁ ရက်မှ ၂၀၂၅ ခုနှစ် ဇွန် ၁၃ ရက်ထိ တစ်နိုင်ငံလုံးအတိုင်းအတာဖြင့် လုံးဝတားမြစ်ထား သော အလုပ်အကိုင်များတွင် နိုင်ငံခြားသားအလုပ်သမား ၄၄၃၇ ဦးကို စစ်ဆေးခဲ့ပြီး ၄၁၇ ဦးအား တရားမဝင်အလုပ်လုပ်နေသည်ကို တွေ့ရှိခဲ့သည့်အတွက် အရေးယူခဲ့ကြောင်း သိရသည်။
ထို့ပြင် အလုပ်သမားဝန်ကြီးဌာနထုတ်ပြန်ချက်အရ ခွင့်ပြုချက်အောက်တွင်သာ လုပ်ကိုင်နိုင်သောအလုပ်များ လုပ်ကိုင်နေသည့် နိုင်ငံခြားသားအလုပ်သမား ၄၇၂ဝ ကိုလည်းစစ်ဆေးခဲ့ပြီး ၅၃ ဦးကို ဥပဒေအရအရေးယူခဲ့ကြောင်း သိရသည်။
ထိုင်းနိုင်ငံတွင် နိုင်ငံခြားသားအလုပ်သမားများ လုပ်ကိုင်ခွင့်မရှိသည့် အလုပ်အကိုင် ၂၇ မျိုးသတ်မှတ်ထားပြီး ဈေးရောင်းခြင်း၊ ဆံပင်ညှပ်ဆိုင်ဖွင့်ခြင်း၊ ဧည့်လမ်းညွှန်၊ ခရီးသည်ကြိုပို့၊ စားသောက်ဆိုင်ဖွင့်ခြင်း စသည့် လုပ်ငန်းများပါဝင်ကြောင်း သိရသည်။
