ဒီဇာတ်ကားကို အစက ကိုရီးယားကားဆိုတော့ စကားတွေများပြီး ပေါတောတောကားပဲ ထင်မိတာပါ။
နောက်မှ Baseball သံဒုတ်ကြီးနဲ့ အခန်းထဲက လူ အကုန်လုံးကို သမနေတာကြီးတွေကြည့်ပြီး အားရလို့ ဇာတ်လမ်းကို အစကနေ အဆုံး တထိုင်ထဲ ကြည့်မိသွားပါတယ်။
MobLand ကြည့်ပြီး ကြည့်စရာ Gangster ဇာတ်ကားတွေမရှိတာနဲ့ Mercy for None က ရေငတ်တုန်း ရေတွင်းထဲကျသလိုပါပဲ။
ဇာတ်လမ်းက နမ်ဂီဂျွန်လို့ခေါ်တဲ့ ဂိုဏ်းသားဟောင်းတစ်ယောက်က အနားယူနေရင်းကနေ သူ့ညီ နမ်ဂီဆော့ခ် ရုတ်တရက် အသက်ခံလိုက်ရလို့ တရားခံကို ရှာပြီး လက်စားပြန်ချေတဲ့ ဇာတ်လမ်းဖြစ်ပါတယ်။
ဂိုဏ်းကတော့ ဂျူအန်နဲ့ ဘုန်ဆန်းဆိုတဲ့ ဂိုဏ်းနှစ်ခုက အတူတူပူးပေါင်းနေတဲ့ ကာလမှာ ဂျူအန်ဂိုဏ်က ဘိုးတော်က သူ့သားကို မယုံကြည်လို့ ဂိုဏ်ကို နမ်ဂီဆော့ခ် ဆိုတဲ့ လူကို ပေးမလို့ လုပ်နေပါတယ်။
အဲ့ဒီမှာ နမ်ဂီဆော့ခ် ကို မကျေနပ်တဲ့ ဘုန်ဆန်းဂိုဏ်းဘက်က ဂျွန်မိုဆိုတဲ့ ဂျော့ဖရေးလက်သစ်လေးက လူငှားပြီး သက်ခိုင်းလိုက်ပါတယ်။ ဒါပေမယ့် နမ်ဂီဆော့ခ် က မသေပဲ တခြားသူတစ်ယောက်က သူ့ကို ဝင်ပြီး လုပ်ကြံသွားခဲ့ပါတယ်။ ဒီမှာ ဇာတ်လမ်းက Plot တစ်ခုအနေနဲ့ စိတ်ဝင်စားဖို့ကောင်းလာပြီး ဆက်ကြည့်ချင်အောင်လုပ်သွားခဲ့ပါတယ်။
Mercy for None ထဲမှာ နမ်ဂီဂျွန်လို့ခေါ်တဲ့ So Ji-seob ကို လက်စားချေဖို့ စိတ်ခံစားမှုတွေ ပြည့်နှက်နေတဲ့ ဇာတ်ကောင်ကို ရှယ်ကြီး သရုပ်ဆောင်ပြသထားတာပါ။ ဝမ်းနည်းနေတဲ့ လူတစ်ယောက်က ဂိုဏ်းသားတွေကို အခန်းထဲမှာ ပယ်ပယ်နယ်နယ်ထိုးနေတာကို ကြည့်ရတာ ရှယ်ပါပဲ။
ဇာတ်လမ်းက ပုံမှန်မြင်နေကြ John Wick လိုဆိုပေမယ့် Over Action ဖြစ်တာတွေတော့နည်းနည်းပါပါတယ်။ ဒါပေမယ့် အဲ့လို Over Action တွေကို ဘဲကြီးတွေရဲ့ သရုပ်ဆောင်ကောင်းမှုနဲ့ ထိန်းပြီး ကယ်သွားတာက တော်တော်မိုက်ပါတယ်။
ဒီမှာ တစ်ခုပြောချင်တာက စစကြည့်ချင်းဆို ဘယ်ဇာတ်ကောင်က ဘယ်သူလည်း ဘယ်ဂိုဏ်းကလည်း စသဖြင့် ရှုပ်နေတယ်ခံစားရပေမယ့် နောက်ပိုင်းတဖြည်းဖြည်းချင်း လူတွေနည်းလာတဲ့ အခါ ဘယ်သူက ဘယ်ဂိုဏ်းကလည်းဆိုတာကို သိလာမှာပါ။
အပိုင်း ၇ ပိုင်းပါတဲ့ ဒီ Series က အခု Netflix ရဲ့ လူကြည့်အများဆုံး Series စာရင်းမှာ တက်နေပြီး၊ UK ရဲ့ Netflix ထိပ်တန်း Series ၁၀ ခု ရဲ့ အဆင့် ၁၀ နေရာမှာ ရပ်တည်နေပါတယ်။
Rating အနေနဲ့ကတော့ 7.6/10 ရထားပြီး Action ပိုင်းအသားပေးထားတဲ့ Gangster ဇာတ်ကားဖြစ်လို့ မကြည့်ရသေးရင် ကြည့်ဖို့ အကြံပေးလိုက်ပါတယ်။