#ပြည်တွင်းသတင်း
◼အားကောင်းသောအပူပိုင်းမုန်တိုင်းနှင့် လေပွေလှိုင်းများ၏ အရှိန်ကြောင့် နေရာကွက်၍ မိုးကြီးနိုင်
အားကောင်းသောအပူပိုင်းမုန်တိုင်း“ဝူတစ်”(WUTIP) နှင့် လေပွေလှိုင်းများ၏ အရှိန်ကြောင့် နိုင်ငံတဝှမ်း နေရာကွက်၍ မိုးကြီးနိုင်ကြောင်း မိုးလေဝသ နှင့် ဇလဗေဒဒညွှန်ကြားမှုဦးစီးဌာနမှ ထုတ်ပြန်ထားသည်။
ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံလေ အားကောင်းရာမှ အားအလွန်ကောင်းနေခြင်းကြောင့်လည်းကောင်း၊ အရှေ့ဘက်မှ ရွေ့လျားလာသော လေပွေလှိုင်းများ၏ အရှိန် နှင့် အားကောင်းသောအပူပိုင်းမုန်တိုင်း“ဝူတစ်”(WUTIP)မှ ပြတ်ထွက်လာသည့် တိမ်တိုက်များကြောင့် လည်းကောင်း ဇွန်လ ၁၄ ရက် မှ ဇွန်လ ၁၉ ရက်အတွင်း နေရာကွက်၍ မိုးကြီးမည်ဖြစ်ကြောင်းထုတ်ပြန်ချက်အရ သိရသည်။
အဆိုပါ ရက်များအတွင်း နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ် နှင့် ရှမ်းပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်း ရွာပြီး၊ အချို့ဒေသများတွင် နေရာကွက်၍ မိုးကြီးမည်ဖြစ်ကြောင်း ထုတ်ပြန်ထားသည်။
မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည်တို့ ဖြစ်ပေါ်နိုင်၍ အဆိုပါဒေသများရှိ ကုန်းမြင့်ဒေသအနီး နှင့် မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများကို ကြိုတင်သတိပြုရန် မိုးဇလမှအသိပေးထားသည်။
ထို့ပြင် ပြည်တွင်းရေကြောင်း၊ လေကြောင်း သွားလာပျံသန်းရေး နှင့် ဆည်မြောင်းတာတမံများအနေဖြင့်လည်း လိုအပ်သည်များ ကြိုတင်ပြင်ဆင်ဆောင်ရွက်ထားရန် မိုးလေဝသ နှင့် ဇလဗေဒဒညွှန်ကြားမှုဦးစီးဌာနမှ ထပ်မံအသိပေးထားသည်။
သတင်း-အင်ကြင်း
ဓာတ်ပုံ-CJ
