#နိုင်ငံတကာသတင်း
◼အီရန်နှင့်ဆွေးနွေးရန် ဂျာမနီ၊ပြင်သစ်နှင့်ဗြိတိန်တို့ အသင့်ရှိကြောင်း ဂျာမနီနိုင်ငံခြားရေးဝန်ကြီးပြော
အရှေ့အလယ်ပိုင်းအခြေအနေအား အရှိန်လျော့ကျသွားစေရန် ကြိုးပမ်းမှုတွင် နျူက လီးယားအစီအစဉ်နှင့်ပတ်သက်၍ အီရန်နှင့်ဆွေးနွေးပွဲများ ချက်ချင်းလုပ်ဆောင်သွားရန် ဂျာမနီ၊ပြင်သစ် နှင့် ဗြိတိန်တို့က အသင့်ရှိနေကြောင်း ဂျာမနီနိုင်ငံခြားရေးဝန်ကြီး ဂျိုဟန်း ဝါဒီဖူးလ် က ပြောကြားသည်။
အစ္စရေး နှင့် အီရန်တို့ကြားက ပဋိပက္ခ အရှိန်ကျဆင်းလာစေရေး ပါဝင်လုပ်ဆောင်ရန် ၎င်းအနေဖြင့် ကြိုးပမ်းနေခြင်း ဖြစ်ကြောင်း အရှေ့အလယ်ပိုင်းသို့ အလည်အပတ်ရောက်ရှိနေသော မစ္စတာဝါဒီဖူးလ်က ပြောကြားပြီးယခင်ကလည်း အပြုသဘောဆောင်သော ဆွေးနွေးမှုများလုပ်နိုင်မည့် အခွင့်အရေးကို အီရန် က ရယူခြင်းမရှိကြောင်း မှတ်ချက်ပြုသည်။
“ ဒါဟာ ဖြစ်နိုင်သေးတယ်လို့ ကျွန်တော်မျှော်လင့်ပါတယ်။ ပြင်သစ်၊ ဗြိတိန်တို့နဲ့ အတူ ဂျာမနီ က အသင့်ပါပဲ ၊ နျူကလီးယားအစီအစဉ်နဲ့ ပတ်သက်ပြီး ချက်ချင်းညှိနှိုင်းမှုတွေလုပ်ဖို့ ကျွန်တော်တို့အီရန်ကို ကမ်းလှမ်းနေပါတယ်။ ဒါကို လက်ခံမယ်လို့ မျှော်လင့်ပါတယ်။” ဟု နိုင်ငံခြားရေးဝန်ကြီး က ဂျာမနီအစိုးရသတင်းဌာန ARD အား ယမန်နေ့ညတွင်ပြောကြားသည်။
“အီရန်သည် အရှေ့အလယ်ပိုင်းဒေသအတွက် ၊ အစ္စရေးနိုင်ငံအတွက် သို့မဟုတ် ဥရောပအတွက် အန္တရာယ်မရှိပါ” ဟူသောအချက်မှာ ယခုလက်ရှိပဋိပက္ခ ငြိမ်သက်သွားရေးအတွက် လိုအပ်ချက် တစ်ရပ် ဖြစ်ကြောင်းလည်း ဝါဒီဖူးလ်က ဆက်ပြောသည်။
အီရန်နှင့်အစ္စရေးအား အဖက်ဖက်က ဝိုင်းဝန်းဖိအားပေးမှသာ ပဋိပက္ခအဆုံးသတ်မှာ ဖြစ်ကြောင်း ယနေ့ နံနက်တွင် အိုမန်နိုင်ငံတွင် ရောက်ရှိနေသော ဂျာမနီနိုင်ငံခြားရေးဝန်ကြီး က ဆိုသည်။
အကြမ်းဖက်မှုသံသရာ အဆုံးသတ်စေရန် လာမည့်သီတင်းပတ်အတွင်း နှစ်ဖက်စလုံးက အလေးအနက်ကြိုးပမ်းကြလိမ့်မည်ဟု မိမိတို့မျှော်လင့်ထားကြောင်း ၎င်းက ဆက်ပြောသည်။
သတင်း-ရဲမင်း
ကိုးကား-Reuters
