ကောင်းတာတွေကို မျှော်လင့်ပါ ။ နောက်တစ်ခုက I live in the expectation of good . ကောင်းတာတွေကိုပဲ မျှော်လင့်ပြီး နေပါတယ် ။ ကောင်းတာတွေကို မျှော်လင့်ရင် ကောင်းတာတွေ ပိုဖြစ်တတ် တယ် ။ အဲဒီတော့ အဆိုးတွေ လုံးဝမဖြစ်ဘူးလို့ မဆိုလိုပါဘူးနော် ။ အဆိုးတွေ ဖြစ်တာ ရှိမှာပါ ။
ဒါပေမဲ့ အဆိုးတွေကို သိပ်မျှော်လင့်မနေပါနဲ့ ။ လူနဲ့ ပတ်သက်ပြီးတော့ပဲဖြစ်စေ ကျန်းမာရေးနဲ့ ပတ်သက်ပြီးတော့ပဲဖြစ်စေ ၊ စီးပွားရေးနဲ့ ပတ်သက်ပြီးတော့ပဲ ဖြစ်စေ ၊ စာမေးပွဲနဲ့ ပတ်သက်ပြီးတော့ပဲ ဖြစ်စေ ၊ ဘာနဲ့ ပတ်သက်ပြီးတော့ပဲဖြစ်ဖြစ် အဆိုးကို မမျှော်လင့်ပါနဲ့ ။ အဆိုးကိုမျှော်လင့်ရင် ဘာဖြစ်လဲဆိုတော့ အဆိုးတွေ ပိုဖြစ်တတ် တယ် ။ ကိုယ့်ကိုယ်ကိုကိုယ် ယုံကြည်မှုလည်း ကျသွားတယ် ။ စိတ်ဆင်းရဲပြီးတော့ စိတ်ဓာတ်အင်အားတွေ ကုန်သွားတယ် ။ depression ဖြစ်တတ်တယ် ။
depression ဖြစ်တဲ့သူတွေကို နည်းနည်း လေ့လာကြည့် ။ သူတို့က ဘာဖြစ်ဖြစ် မကောင်းတာဖြစ်တော့မယ်လို့ပဲ ကြိုတွေးထားတတ်တယ် ။ လူတစ်ယောက်နဲ့တွေ့ရင် ငါ့ကို သူ ကောင်းကောင်းမွန်မွန်ပြောမယ် မထင်ဘူး ။ ငါနှုတ်ဆက်ရင် သူပြန်နှုတ်ဆက်မယ် မထင်ဘူး ။ အဲသလို အဆိုးကို ကြိုပြီးတော့ တွေးတယ် ။ အဲလိုလူတွေက depression ပိုဖြစ်တယ် ။ ဒါကြောင့် အဆိုးတွေကို မမျှော်လင့်ပါနဲ့ ။ ကောင်းတာတွေကို မျှော်လင့်ပါ ။ ပြီးရင် အဲဒီကောင်းတာတွေ ဖြစ်လာဖို့ကို ကိုယ့်ဘက်က တတ်နိုင်သလောက် လုပ်ပါ ။ နောက်က လုပ်တာမပါဘဲနဲ့လည်း မရဘူးနော် ။ ကောင်းတာတွေ မျှော်လင့်နေရုံနဲ့လည်း မပြီးသေးဘူး ။ ကောင်းတာတွေ မျှော်လင့်ပြီးတော့ ကောင်းတာတွေကိုလည်း ဆက်လုပ်ပါ ။
#ဘဝကိုစိတ်ကဦးဆောင်သည် #‌ဆရာတော်ဦးဇောတိက