တရုတ်အကူအညီဖြင့် ရေနံချက်စက်ရုံသစ်စီမံကိန်း အကောင်အထည်ဖော်ရန် ဆွေးနွေး

တရုတ်အစိုးရရဲ့ အကူအညီနဲ့ ရေနံချက်စက်ရုံသစ်စီမံကိန်းကို ပူးပေါင်းအကောင်အထည်ဖော် ဆောင်ရွက်ရေးအတွက် စွမ်းအင်ဝန်ကြီး ဦးကိုကိုလွင်က ဇွန်လ ၉ ရက်နေ့မှာ တရုတ်သံအမတ်ကြီး မစ္စမာကျားနဲ့ တွေ့ဆုံဆွေးနွေးခဲ့ပါတယ်။
ရေနံချက်စက်ရုံအတွက် လိုအပ်မယ့် ရေနံစိမ်းတွေကို အရှေ့တောင်အာရှ ရေနံစိမ်းပိုက်လိုင်းကနေ ရယူပြီး စီမံကိန်းကို အကောင်အထည်ဖော်မယ်လို့ ဆိုပါတယ်။
ရေနံပိုက်လိုင်းကို ရေနံနှင့်သဘာဝဓာတ်ငွေ့လုပ်ငန်း (MOGE) နဲ့ တရုတ်အမျိုးသားရေနံကော်ပိုရေးရှင်း(CNPC-SEAP) တို့က ပူးပေါင်းလုပ်ကိုင်နေပြီး အရှေ့တောင်အာရှရေနံပိုက်လိုင်းကုမ္ပဏီလီမီတတ်(South-East Asia Pipeline Company Limited-SEAOP) က ဦးစီးလုပ်ကိုင်နေတာပါ။
ရေနံပိုက်လိုင်းစီမံကိန်းဟာ မြန်မာနိုင်ငံမှာ တရုတ်ရဲ့ အကြီးမားဆုံး ရင်းနှီးမြှုပ်နှံမှုတွေထဲက တစ်ခုဖြစ်ပြီး နှစ်စဉ်အများဆုံး ရေနံတန်ချိန် ၂၂ သန်းခန့် သယ်ပို့နိုင်ဖို့ ရည်မှန်းထားပါတယ်။
နစကဝန်ကြီးနဲ့ တရုတ်သံအမတ်ကြီးတို့ တွေ့ဆုံမှုအတွင်း စွမ်းအင်ကဏ္ဍမှာ ပူးပေါင်းဆောင်ရွက်ဖို့ နှစ်နိုင်ငံခေါင်းဆောင်တွေ သဘောတူထားမှုအပေါ် အကောင်အထည်ဖော် ဆောင်ရွက်နေတဲ့ အခြေအနေတွေနဲ့ ဆက်လက်ဆောင်ရွက်သွားမယ့် အစီအမံတွေကို ဆွေးနွေးခဲ့ပါတယ်။
ဆောင်ရွက်ဆဲ ကမ်းလွန်လုပ်ကွက်မှာ ဆက်လက်ဆောင်ရွက်မယ့် ရှာဖွေ၊ တူးဖော်ရေးလုပ်ငန်းများအတွက် ပူးပေါင်းဆောင်ရွက်သွားမယ့် တရုတ်ကုမ္ပဏီတွေကို တွန်းအားပေး ကူညီဆောင်ရွက်ဖို့လည်း နစကဝန်ကြီးက တိုက်တွန်းခဲ့ပါတယ်။
ဒါ့အပြင် မြန်မာနိုင်ငံရဲ့ အလားအလာကောင်းတဲ့ ကမ်းလွန်လုပ်ကွက်တွေမှာ ရေနံနဲ့ သဘာဝဓာတ်ငွေ့ ရှာဖွေ၊ တူးဖော်၊ ထုတ်လုပ်ခြင်းတို့အတွက် တရုတ်နိုင်ငံမှ ကုမ္ပဏီတွေ လာရောက်ရင်းနှီးမြှုပ်နှံဖို့လည်း ဆွေးနွေးခဲ့ပါတယ်။
တရုတ်နိုင်ငံနဲ့ မြန်မာနိုင်ငံအကြား စွမ်းအင်ကဏ္ဍမှာ ပူးပေါင်းဆောင်ရွက်မှုတွေကို အရင်ကထက် ပိုမိုတိုးမြှင့် ဆောင်ရွက်သွားမယ်လို့လည်း နှစ်ဖက်ဆွေးနွေးမှုအရ သိရပါတယ်။
သတင်း - BETV Business