#ပြည်တွင်းသတင်း
◼ငလျင်ဒဏ်သင့်ပြည်သူများအတွက် ကမ္ဘောဇကယ်ဆယ်ကူညီထောက်ပံ့ရေးစင်တာဖွင့်လှစ်
ငလျင်ဒဏ်သင့်ပြည်သူများအတွက် ကမ္ဘောဇကယ်ဆယ်ကူညီထောက်ပံ့ရေးစင်တာကို မန္တလေးမြို့၌ ဖွင့်လှစ်ထားကြောင်း KBZ Center မန္တလေး၏ထုတ်ပြန်ချက်အရသိရသည်။
မြန်မာနိုင်ငံတစ်ဝန်းရှိ ငလျင်ဒဏ်သင့်ပြည်သူများအား ကာလရှည်ကူညီထောက်ပံ့နိုင်ရန်ရည်ရွယ်၍ ယမန်နေ့ (ဇွန် ၁၀ ရက်)တွင် မန္တလေးမြို့၊ ချမ်းမြသာစည်မြို့နယ်၊ (၇၃) လမ်း၊ (၁၁၀) လမ်း၌ ဖွင့်လှစ်ခဲ့ခြင်းဖြစ်ကြောင်း၊ KBZ ဖောင်ဒေးရှင်းမှငလျင်ဘေးအတွက် ငွေကျပ် ၄၅ ဘီလျံ ကနဦး မတည်လှူဒါန်းထားသည့်အနက် ငလျင်ဘေးသင့်ပြည်သူများအား အနည်းဆုံးတစ်နှစ်မှငါးနှစ်အထိ ရေရှည်ကူညီပေးနိုင်မည့် KBZ Center မန္တလေးကို ကနဦးအနေဖြင့်ငွေကျပ် ၃၀ ဘီလျံအသုံးပြုကာ ဖွင့်လှစ်ခဲ့ခြင်းဖြစ်ကြောင်း ထုတ်ပြန်ထားသည်။
ယင်းစင်တာတွင် Call Center မှတစ်ဆင့် အကူအညီတောင်းခံနိုင်မည့် ထောက်ပံ့လှူဒါန်းရေးစင်တာ၊ အခမဲ့စားသုံးနိုင်မည့် နေ့လယ်စာ၊ ညစာထမင်းစားဆောင်၊သောက်ရေသန့်နှင့် သုံးရေအခမဲ့ ဖြန့်ဖြူး ပေးခြင်း၊ အခမဲ့အသုံးပြုနိုင်မည့် ရေချိုးခန်း၊ အိမ်သာနှင့်အဝတ်လျှော်စက်များစီစဉ်ထားရှိခြင်းနှင့် အခမဲ့ အသုံးပြုနိုင်မည့် LPG Gas မီးဖိုဆောင်များပါဝင်ကြောင်း ထုတ်ပြန်ချက်တွင်ဖော်ပြထားသည်။
ထို့ပြင်ကျန်းမာရေးစောင့်ရှောက်မှုအနေဖြင့် စိတ်ကျန်းမာရေးအပါအဝင် လူနာ ၇၀၀ ခန့်အား နေ့စဉ်အခမဲ့ကုသပေးနိုင်မည့် ဆေးကုသခန်းများလည်းပါဝင်ကြောင်းသိရသည်။
“အထွေထွေရောဂါနဲ့ပတ်သက်ပြီး ဝန်ဆောင်မှုပေးနေတယ်။ ငလျင်ဒဏ်ကြုံတွေ့ပြီးတော့ မိသားစုတွေ၊ အသက်တွေအိုးအိမ်တွေပျက်စီးဆုံးရှုံးရတဲ့လူတွေလည်းရှိတယ်။ ဒီလူတွေရဲ့ စိတ်ထဲမှာရနေတဲ့ စိတ်ဒဏ်ရာတွေအတွက်လည်း စိတ်ရောဂါအထူးကုဆရာဝန်တွေလည်းရှိပါတယ်။ သတ်မှတ်ချက် ကတော့ တကယ်ဒုက္ခကြုံတွေ့နေတဲ့၊ သဘာဝဘေးကြုံတွေ့နေတဲ့လူတွေဖြစ်ဖို့ကတော့ အရေးကြီးဆုံး အချက်ပေါ့။ ပြီးတော့ဆေးခန်းကိုလာပြတဲ့ ဆရာဝန် ကြည့်ရှုတဲ့စရိတ်လည်း အကုန်အခမဲ့ပဲ။ ဆေးပေးတာအပါအဝင်အခမဲ့ပဲ။ တကယ်လို့ လိုအပ်လို့ဆိုရင် X-ray၊ Ultrasound၊ ECG ဒီလိုအခြေခံ စစ်ဆေးမှုတွေလည်း အကုန်အခမဲ့ပဲ” ဟု KBZ Medical Team မှတာဝန်ခံဒေါက်တာ ထွေးသီရိကျော်ညွန့်က ပြောသည်။
KBZ Center မန္တလေးတွင် ငလျင်ဘေးသင့်ပြည်သူများ အိမ်ယာအမြန်ဆုံးတည်ဆောက်နိုင်ရန်နှင့် စီးပွားရေးလုပ်ငန်းများလည်ပတ်နိုင်ရန် KBZ Bank ၏သီးသန့် Home Loan အထူးချေးငွေဌာန (နှစ်ရှည်)၊ အထူးချေးငွေဌာန (SME အလျင်အမြန်) နှင့် Corporate Loan ထုတ်ချေးမှုတို့ တစ်ပါတည်း ထည့်သွင်းထားပြီး Center တွင် ဘဏ်ဝန်ဆောင်မှုများကို အမြန်ဆုံးနှင့်အထိရောက်ဆုံးဖြစ်စေရန် ကောင်တာများဖွင့်၍ ဆွေးနွေးပေးခြင်း၊ သတင်းအချက်အလက်များရယူ၍ လျှောက်လွှာ လက်ခံရယူ ပေးပြီး လုပ်ထုံးလုပ်နည်းများနှင့်အညီစိစစ်၍ ဘဏ်ခွဲများမှတစ်ဆင့် ချေးငွေများအမြန်ထုတ်ချေး ပေးမည်ဖြစ်ကြောင်း၊ KBZ Pay Center၊ KBZMS General Insurance၊ KBZ Life Insurance တို့မှလည်း စင်တာများတွင် ဝန်ဆောင်မှုများပေးအပ်သွားမည်ဖြစ်ကြောင်းသိရသည်။
သတင်း - အင်ကြင်း
ဓာတ်ပုံ - KBZ Center Mandalay
