အသက်နှစ်ဆယ့်ရှစ်နှစ်ရှိပြီဖြစ်တဲ့မိန်းမတစ်ယောက်
စာရေးသူ - နုနုရည်(အင်းဝ)
အဘွားရဲ့ မေတ္တာအဟုန်နဲ့ ကလေးရဲ့ နုနယ်လွန်းတဲ့ အသားလေးတွေနေသားတကျ ဖြစ်ပါစေတော့ရယ်လို့ ဘွားအေခမျာ မျက်လုံးကလေးတွေကို မနားမနေ လျှာနဲ့လျက်ပြီး ပင့်တင်လိုက်၊ နီရဲနုနယ်တဲ့ အသားလေးတွေ တဖြည်းဖြည်း ပြေပြစ်လာတာကို ကြည့်လိုက်နဲ့ ရှိတုန်းမှာပဲ ကလေးရဲ့ ဗိုက်ကလေးပေါ် ဖိထိန်းထားတဲ့ အဘွားရဲ့ ညာဘက်လက်မှာ ထိတ်ခနဲ ခံစားလိုက်ရတယ်။
နှေးကွေးညင်သာလှတဲ့ နှလုံးသားနုနုလေး လှုပ်ခုန်မှု။
'ဘုရား ဘုရား.. မြေးကလေးရယ်
ဒါဟာ တကယ်ပဲလားကွယ်'
◾️"နှင်းနှင်းဦး"ဆိုတဲ့ မိန်းကလေးငယ်လေးတစ်ယောက်ဟာ အဘွားဖြစ်သူရဲ့ ချစ်ခြင်းမေတ္တာအဟုန်ကြောင့် ကမ္ဘာလောကကြီးမှာ အသက်ရှင်နေထိုင်ခွင့်ရခဲ့သလို မွေးစကနေ ကျောင်းမနေခင်ထိ ငယ်ဘဝတွေကလည်း ဘိုးအေဘွားအေတွေရဲ့ အစွမ်းကုန်အကြွင်းမဲ့ အလိုလိုက်ခံရတဲ့ အင်မတန် ဆိုးသွမ်းတတ်တဲ့ မြေးဦးတွေရဲ့ ဘဝမျိုးနဲ့ ဖြတ်သန်းခဲ့ရတယ်။
◾️တက္ကသိုလ်ကျောင်းသူဘဝမှာလည်း မန္တလေးတက္ကသိုလ်ရဲ့ အလှတရားကို နောက်ခံထားလို့ အဆောင်နေကျောင်းသူဘဝရဲ့ လွတ်လပ်မှု၊ အိမ်ကို လွမ်းဆွတ်မှု၊ ပြီးတော့ စာဖတ်ဝါသနာတူ ချစ်သူကို တွေ့ရှိခဲ့ပြီး ချစ်ရသူနဲ့ လက်ထပ်ခဲ့ပေမယ့်လည်း လောကမှာ အချစ်တစ်ခုတည်းနဲ့ မပြည့်စုံတဲ့ သဘောတရားတွေကိုလည်း ဒီစာအုပ်မှာ တွေ့ရှိရပါလိမ့်မယ်။
◾️အသက်အရွယ်တစ်ခုကို ရောက်တဲ့အခါ လူဟာ ရပ်တည်ချက်တစ်ခုရှိမှသာ ဘဝမှာ နေပျော်ပါတယ်။ ကျောင်းသူဘဝက ကုန်ဆုံးလို့ အိမ်ထောင်သည်ဘဝကို ရောက်လာတဲ့အချိန် ချစ်သူလက်ကို ဆွဲပြီး မြို့ပြကို ရောက်လာတဲ့အခါမှာ မြို့ပြရဲ့ မွန်းကြပ်မှု၊ အလုပ်အကိုင်ခက်ခဲမှုတွေကို ကြုံတွေ့ခဲ့ရာကနေ စိတ်ဓာတ်တွေကျနေတဲ့အချိန် အပ်ချည်ဘူးထဲက ခဲတံလေးနဲ့ ဝတ္ထုလေးတစ်ပုဒ် စရေးမိရာက ပေဖူးလွှာမဂ္ဂဇင်းမှာ ဖော်ပြခံရပြီး စာရေးသူရယ်လို့ ဖြစ်လာခဲ့ပါတယ်။
ဒီစာအုပ်လေးက ဆရာမနုနုရည်(အင်းဝရဲ့) ဘဝ တစ်နည်းအားဖြင့် ကိုယ်တိုင်ရေးအတ္ထုပ္ပတ္တိလေးပါ။ မွေးဖွားချိန်ကစလို့ ကြုံတွေ့ခဲ့ရတဲ့ အဖြစ်အပျက်တွေ၊ ဇာတိမြေ အင်းဝရဲ့ အလှအပတွေ လူနေမှုစရိုက်တွေ၊ တက္ကသိုလ်ကျော်ငးသူဘဝရဲ့ ပျော်ရွှင်ဖွယ်ရာအဖြစ်အပျက်တွေကနေတဆင့် ဘဝတစ်ခု ထူထောင်ရာမှာ ကြုံတွေ့ခဲ့ရတဲ့ အဖြစ်အပျက်အလုံးစုံကို ဆရာမနဲ့ အတူလိုက်ပါစီးမျောလို့ရမယ့် စာအုပ်လေးမို့ ဖတ်ကြည့်ဖို့ ညွှန်းပေးချင်ပါတယ်။
#အသက်နှစ်ဆယ့်ရှစ်နှစ်ရှိပြီဖြစ်တဲ့မိန်းမတစ်ယောက်
