#နိုင်ငံတကာသတင်း
◼ယီမင်ဆိပ်ကမ်းမြို့ကို အစ္စရေးတိုက်ခိုက်
ယီမင်နိုင်ငံ၏ ပင်လယ်နီ ဆိပ်ကမ်းမြို့ ဟိုဒေဒါ မှ ဟူသီပစ်မှတ်များကို တိုက်ခိုက်ခဲ့ကြောင်း အစ္စရေးရေတပ်က ပြောကြားပြီး တစ်ချိန်တည်းမှာပင် ဟူသီအဖွဲ့က အစ္စရေးအား ဆက်လက်တိုက်ခိုက်နေခဲ့ပါက ၎င်းတို့အဖွဲ့အပေါ် လေကြောင်း နှင့် ရေကြောင်း ပိတ်ဆို့မှုများ လုပ်ဆောင်သွားနိုင်ကြောင်း ကာကွယ်ရေးဝန်ကြီး အစ္စရေးကတ်ဇ် က ခြိမ်းခြောက်လိုက်သည်။
ဟိုဒေဒါဆိပ်ကမ်းမှ သင်္ဘောကျင်းနှစ်ခုအား အစ္စရေးက နှစ်ကြိမ်တိုက်ခိုက်ခဲ့ကြောင်း ဟူသီအဖွဲ့ လက်အောက်ရှိ အယ်လ်မာဆီရာရုပ်သံ က တင်ပြခဲ့သည်။
ဟူသီတို့၏ ပစ်မှတ်များကို တိုက်ခိုက်ခဲ့ကြောင်း နှင့် ဟူသီအဖွဲ့ က လက်နက်များ လွှဲပြောင်းရယူရန် ယင်းဆိပ်ကမ်းကို အသုံံးပြုနေကြောင်း အစ္စရေးစစ်ဘက် က ထုတ်ပြန်ချက်တစ်ရပ်တွင် ပြောသည်။
အဆိုပါတိုက်ခိုက်မှုနှင့်ပတ်သက်၍ထိခိုက်ဒဏ်ရာရသော သတင်းများ ရုတ်တရက်ထွက်ပေါ်မလာသေးပေ။
အီရန်၏ အခြားအရှေ့အလယ်ပိုင်း လက်တွဲဖော်များအား အကြီးအကျယ် အားနည်းသွားစေခဲ့ပြီးနောက် အစ္စရေးက ဟူသီ စစ်ဆင်ရေးကို စတင်ခဲ့ကာ ဟူသီ ပစ်မှတ်များစွာကို လေကြောင်း မှ တိုက်ခိုက်ခဲ့သည်။
ဟူသီတို့ထိန်းချုပ်ထားသော ဟိုဒေဒါ ၊ ရက်စ်အီဆာ နှင့် ဆာလစ် ဆိပ်ကမ်းအနီးမှ လူများ ဘေးလွတ်ရာ ရွှေ့ပြောင်းနေကြရန် အစ္စရေးစစ်ဘက် က ယမန်နေ့တွင် တိုက်တွန်းခဲ့သည်။
“သူတို့အနေနဲ့ အစ္စရေးကို ဆက်ပြီး ပစ်ခတ်နေမယ်ဆိုရင် ပိုပြီးအင်အားပြင်းထန်တဲ့ တုံ့ပြန်မှုနဲ့ရင်ဆိုင်ရပြီး ရေကြောင်း နဲ့ လေကြောင်းပိတ်ဆို့မှုတွေ ခံစားရနိုင်တယ်ဆိုတာကို ကျွန်တော်တို့က ဟူသီ အကြမ်း ဖက်အဖွဲ့အစည်းကို သတိပေးလိုက်ပါတယ်။”ဟု ကာကွယ်ရေးဝန်ကြီး ကတ်ဇ် က လူမှုကွန်ရက် X ပေါ်တွင် ရေးသားသည်။
၂၀၂၃ ခုနှစ် အောက်တိုဘာလတွင် ဂါဇာစစ်ပွဲ စတင်ချိန်ကတည်းက ပါလက်စတိုင်းများနှင့် သွေး စည်းညီညွတ်မှုပြသနေကြောင်း ပြောကြားပြီး အီရန်နှင့်လက်တွဲထားသော ယီမင်နိုင်ငံမှ ဟူသီအဖွဲ့ က ပင်လယ်နီမှ သင်္ဘောများနှင့် အစ္စရေး အား ပစ်ခတ်တိုက်ခိုက်နေခဲ့ကြောင်း ရိုက်တာသတင်းက ဖော်ပြသည်။
သတင်း-ရဲမင်း
ကိုကား-Reuters
