ကိုဗစ်-၁၉ ရောဂါပိုး တွေ့ရှိမှုနှုန်း မြင့်တက်လာ
- တစ်ပတ်အတွင်း ၃၁ ဦးအထိ တွေ့ရှိ
ရန်ကုန်၊ ဇွန် ၁၀
ပြီးခဲ့တဲ့ ရက်သတ္တပတ်အတွင်း ကိုဗစ်-၁၉ ရောဂါပိုး တွေ့ရှိမှုနှုန်း မြင့်တက်လာတာကို ကျန်းမာရေးဝန်ကြီးဌာနရဲ့ ဇွန်လ ၁၀ ရက်နေ့ သတင်းထုတ်ပြန်ချက်အရ သိရပါတယ်။
ဇွန်လ ၁ ရက်နေ့မှ ၈ ရက်နေ့အထိ ဓာတ်ခွဲနမူနာ (၂၁၅၄) ခုကို စစ်ဆေးပြီးစီးခဲ့ရာ ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် (၃၁) ဦး တွေ့ရှိရတယ်လို့ ဆိုပါတယ်။
ဒါ့ကြောင့် ရောဂါပိုးတွေ့ရှိမှုနှုန်းက မေလ ပထမပတ်မှာ (၀.၀၄) ရာခိုင်နှုန်းရှိရာကနေ တစ်လအတွင်း (၁.၄၄) ရာခိုင်နှုန်းအထိ မြင့်တက်လာပါတယ်။
ဇွန်လ ၁ ရက်နေ့မှ ၈ ရက်နေ့အထိ ရန်ကုန်တိုင်းဒေသကြီးမှ ၁၅ ဦးအထိ တွေ့ရှိခဲ့ပြီး၊ ရှမ်းပြည်နယ် တာချီလိတ်မြို့မှ ၁၃ ဦး၊ ကရင်ပြည်နယ် ဘားအံမြို့မှ ၁ ဦး၊ စစ်ကိုင်းတိုင်းဒေသကြီး ကျွန်းလှမြို့မှ ၁ ဦး၊ မွန်ပြည်နယ် ကျိုက်ထိုမြို့မှ ၁ ဦး ရောဂါပိုး ကူးစက်ခံခဲ့ရပါတယ်။
အစီရင်ခံကာလအတွင်း ပြင်းထန်လူနာ၊ အထူးကြပ်မတ်ကုသပေးရတဲ့လူနာနဲ့ ကိုဗစ်-၁၉ ရောဂါနဲ့ သေဆုံးလူနာမရှိကြောင်း ကျန်းမာရေးဝန်ကြီးဌာနက ထုတ်ပြန်ထားပါတယ်။
လက်တလောမှာ နိုင်ငံအတွင်း ကိုဗစ်-၁၉ ရောဂါ ကူးစက်ဖြစ်ပွား/သေဆုံးမှုနဲ့ စပ်လျဉ်းပြီး စိုးရိမ်ဖွယ်ရာအခြေအနေမရှိပေမယ့် ရောဂါဖြစ်ပွားမှုမှ ကြိုတင်ကာကွယ်နိုင်ဖို့ တစ်ကိုယ်ရေကာကွယ်ရေးနည်းလမ်းတွေကို လိုက်နာဆောင်ရွက်ကြဖို့ အသိပေးထားပါတယ်။
ရောဂါကူးစက်ခံရပါ ရောဂါပြင်းထန်နိုင်ခြေနဲ့ သေဆုံးနိုင်ခြေ မြင့်မားတဲ့ အသက် ၆၀ နဲ့အထက် အသက်အရွယ်ကြီးသူတွေ၊ ဆီးချိုရောဂါ၊ နာတာရှည်အဆုတ်ရောဂါ၊ ကင်ဆာရောဂါရှိသူတွေ၊ ကိုယ်ဝန်ဆောင်မိခင်တွေကို ဦးစားပေးအစီအစဉ်နဲ့ ကိုဗစ်-၁၉ ရောဂါ ထပ်ဆောင်းကာကွယ်ဆေး ထိုးနှံပေးသွားမှာဖြစ်လို့ ကာကွယ်ဆေးထိုးနှံမှု ခံယူကြဖို့ လိုအပ်ကြောင်း ထုတ်ပြန်ထားပါတယ်။
